ပေါ်တူဂီနိုင်ငံ၊ ကွင်းမ်ဘရာဒေသမှာ မွန်းဒေဂို မြစ်ရေလျှံတက်ပြီးကာ ရေထိန်းတာဘောင်တခု ကျိုးပေါက် သွားခဲ့ပြီးနောက် ဖေဖော်ဝါရီ ၁၂ ရက်က လူနေအိမ်တွေနဲ့ လယ်ယာစိုက်ခင်းတွေကို ရေလွှမ်းမိုးခဲ့ပါတယ်။

ဒါ့အပြင် ရက်သတ္တပတ်ပေါင်းများစွာ မိုးသည်းထန်စွာရွာသွန်းပြီး  ရေကြီးရေလျှံမှုတွေကြားမှာ ရေကာတာတခု ကျိုးသွားခဲ့ပြီးနောက် ဗုဒ္ဓဟူးညပိုင်းမှာ ပေါ်တူဂီနိုင်ငံရဲ့ A1 အဓိကလမ်းမကြီးရဲ့ အစိတ်အပိုင်းတခုလည်း ပြိုကျခဲ့ပါတယ်။

လမ်းပိုင်းပြင်ဆင်ရေးအတွက် ရေလျှံမှုတွေ ကျဆင်းဖို့အတွက် ပြုပြင်မှုတွေ လိုအပ်နေတာကြောင့် ရေပြန်ကျချိန်အထိ စောင့်ဆိုင်းရမှာဖြစ်လို့ သီတင်းပတ်ပေါင်းများစွာ ကြာမြင့်နိုင်တယ်လို့ အခြေခံအဆောက်အအုံဝန်ကြီး မီဂွဲလ်ပင်တိုလုဇ်က ပြောပါတယ်။ 

ကွင်းမ်ဘရာ မြို့အာဏာပိုင်တွေဟာ ကြိုတင်ကာကွယ်ရေးအဖြစ် လူပေါင်း ၃,၀၀၀ လောက်ကို အရေးပေါ် ရွှေ့ပြောင်းဖို့ အမိန့်ထုတ်ခဲ့ပါတယ်။

ဗုဒ္ဓဟူးနေ့မှာလည်း ရွှေ့ပြောင်းရေးလုပ်ငန်းတွေ ဆက်လက်ဆောင်ရွက်နေပြီး ရဲတပ်ဖွဲ့ဝင်တွေက အိမ်တိုင်းကို လိုက်စစ်ဆေးကာ နေထိုင်သူတွေကို ကယ်ဆယ်ရေးစခန်းတွေဆီ ဘတ်စ်ကားတွေနဲ့ ပို့ဆောင်ခဲ့ပါတယ်။

ကြာသပတေးနေ့ မနက်ပိုင်းမှာတော့ ကွင်းမ်ဘရာမှာ အခြေအနေတွေ ပြန်တည်ငြိမ်လာပြီဖြစ်လို့ ထပ်မံရွှေ့ပြောင်းဖို့ မလိုအပ်တော့ကြောင်း အရပ်ဘက်ကာကွယ်ရေးဌာနက ထုတ်ပြန်ပါတယ်။ 

ဇန်နဝါရီ လကုန်ပိုင်းမှစပြီး ဆက်တိုက်ဖြစ်ပွားခဲ့တဲ့ အားပြင်းမုန်တိုင်းတွေကြောင့် နိုင်ငံရဲ့ အလယ်ပိုင်းနဲ့ တောင်ပိုင်းဒေသတွေမှာ အိမ်ခေါင်မိုးတွေ ပျက်စီးတာ၊ မြို့တွေ ရေလွှမ်းမိုးတာနဲ့ လူပေါင်းသိန်းချီ  ရက်အတော်ကြာ လျှပ်စစ်မီး ပြတ်တောက်တာတွေ ဖြစ်ပေါ်ခဲ့ပါတယ်။

မုန်တိုင်းတွေကြောင့် သေဆုံးသူ အနည်းဆုံး ၁၅ ယောက်ရှိခဲ့ပြီး သွယ်ဝိုက်တဲ့အကြောင်းတွေကြောင့် ထိခိုက်သူတွေလည်း ပါဝင်ပါတယ်။

အခုသီတင်းပတ်အတွင်း မုန်တိုင်းတွေ အရှိန်လျော့သွားပေမဲ့ “လေထုအတွင်းရှိ အစိုဓာတ်စီးကြောင်း” ရာသီဥတုဖြစ်စဉ်ကြောင့် အပူပိုင်းဒေသမှ ရေငွေ့တွေ ပါဝင်တဲ့ မိုးရွာသွန်းမှုအသစ်တွေ ထပ်မံဖြစ်ပေါ်ခဲ့ပြီး နိုင်ငံရဲ့ မြောက်ဘက်ပိုင်း တွေကို ပိုမိုထိခိုက်ခဲ့ပါတယ်။ 

Source: Reuters