ဗြိတိန်ဝန်ကြီးချုပ် ကီယာစတာမာက ပီတာမန်ဒယ်လ်ဆန်ကို အမေရိကန်ပြည်ထောင်စုဆိုင်ရာ သံအမတ်ကြီးအဖြစ် ခန့်ခဲ့မိတဲ့အတွက် နောင်တရတယ်လို့ ဖေဖော်ဝါရီ ၄ ရက်မှာ ပြောပါတယ်။

ကွယ်လွန်သွားပြီဖြစ်တဲ့ အမေရိကန် လိင်ပိုင်းဆိုင်ရာ ရာဇဝတ်သား ဂျက်ဖရီ အက်ပ်စတိန်းနဲ့ မန်ဒယ်လ်ဆန်ကြား ဆက်နွှယ်မှုကို မန်ဒယ်လ်ဆန်က ‘ထပ်ခါတလဲလဲ’ လိမ်ညာပြီး မှားယွင်းစွာ ဖော်ပြခဲ့တယ်လို့လည်း စတာမာက ပြောပါတယ်။

မန်ဒယ်လ်ဆန်ဟာ အက်ပ်စတိန်းကို ဈေးကွက်ဆိုင်ရာ အချက်အလက်တွေ ပေါက်ကြားခဲ့တယ် ဆိုတဲ့ စွပ်စွဲချက်တွေ ထွက်ပေါ်အပြီးမှာ အစိုးရရာထူးအတွင်း အမှားအယွင်း လုပ်ခဲ့တယ်ဆိုတဲ့ စွပ်စွဲချက်နဲ့ ဗြိတိန်ရဲတပ်ဖွဲ့က မန်ဒယ်လ်ဆန်ကို ဖေဖော်ဝါရီ ၃ ရက်က စပြီး စုံစမ်းစစ်ဆေးခဲ့ပါတယ်။

စတာမာက မန်ဒယ်လ်ဆန် ရာထူးခန့်အပ်ခံရချိန်က ပေးခဲ့တဲ့ အချက်အလက်တွေကို ထုတ်ပြန်မယ်လို့လည်း ပြောခဲ့ပါတယ်။

သတင်းအချက်အလက်အားလုံး ထွက်မလာသေးလို့ စိတ်ချလက်ချ မရှိသေးဘူးလို့ စတာမာက အင်္ဂါနေ့မှာ အစိုးရအဖွဲ့ကို ပြောခဲ့တယ်လို့ စတာမာရဲ့ ပြောရေးဆိုခွင့်ရှိသူက ပြောပါတယ်။

အစိုးရအဖွဲ့ အစည်းအဝေးအတွင်း စတာမာက မန်ဒယ်လ်ဆန်ရဲ့ အက်ပ်စတိန်းဆီ ပေါက်ကြားမှုတွေက ရှက်စရာကောင်းတယ်လို့ ပြောခဲ့ပြီး နာရီအနည်းငယ်အကြာမှာ မန်ဒယ်လ်ဆန်က အထက်လွှတ်တော် House of Lords ကနေ အနားယူမယ်လို့ ပြောခဲ့ပါတယ်။

အက်ပ်စတိန်းနဲ့ ဆက်နွှယ်မှုကြောင့် မန်ဒယ်လ်ဆန်ကို ပရီဗီကောင်စီဝင်အဖြစ် လူသိများတဲ့ ဘုရင့်နိုင်ငံတော် အကြံပေးအဖွဲ့ကနေ ဖယ်ရှားဖို့ ချားလ်စ်ဘုရင်နဲ့ သဘောတူခဲ့တယ်လို့ စတာမာက လွှတ်တော်ကို ပြောခဲ့ပါတယ်။

အသက် ၇၂ နှစ် ရှိပြီဖြစ်တဲ့ မန်ဒယ်လ်ဆန်ဟာ အရင်က ဝန်ခံထားတာထက် အက်ပ်စတိန်းနဲ့ ပိုနီးနီးကပ်ကပ် ရှိနေခဲ့တာကို ပြနေတဲ့ စာရွက်စာတမ်းတွေ ပေါ်ပေါက်လာပြီးတဲ့နောက် ရာထူးခန့်အပ်ခံရပြီး ၇ လအကြာ စက်တင်ဘာလမှာ သံအမတ်ရာထူးကနေ ထုတ်ပယ်ခံခဲ့ရပါတယ်။

မက်ဆေ့ချ်တခုမှာ ပြည့်တန်ဆာလုပ်ငန်းအတွက် ကလေးတယောက်ကို ရှာဖွေပေးမှုအတွက် အစောပိုင်း ပြစ်ဒဏ်ချမှတ်ခံရမှုက မှားယွင်းပြီး လွတ်မြောက်ရေးအတွက် စောစောစီးစီး တိုက်ပွဲဝင်သင့်တယ်လို့ အက်ပ်စတိန်းကို မန်ဒယ်လ်ဆန်က ပြောထားပုံရတယ်လို့ ရိုက်တာ သတင်းဌာနက ဖော်ပြပါတယ်။

မန်ဒယ်လ်ဆန်နဲ့ သူ့ခင်ပွန်းအတွက် ငွေပေးချေမှုဆိုင်ရာ အကြံပြုချက်တွေ အပါအဝင် စာရွက်စာတမ်း သန်းပေါင်းများစွာကို ထုတ်ပြန်ပြီးတဲ့နောက် မန်ဒယ်လ်ဆန်ဟာ “နောက်ထပ် အရှက်ရစရာတွေ မဖြစ်စေဖို့” လေဘာပါတီကနေ တနင်္ဂနွေနေ့နှောင်းပိုင်းမှာ နုတ်ထွက်ခဲ့ပါတယ်။

Source: Reuters