ပဲခူးတိုင်း ပန်းတောင်းမြို့နယ် ဥသျှစ်ပင်တပ်နယ်ရှိ ပွိုင့်-၆၆၆ စခန်းကုန်းကို အာရက္ခတပ်တော် (AA) ပူးပေါင်းတပ်တွေက သိမ်းပိုက်လိုက်ပြီးတဲ့နောက် စစ်ကောင်က လေကြောင်းကနေ အပြင်းအထန်တိုက်ခိုက်ခဲ့တယ်လို့ ဒေသခံတွေက ပြောပါတယ်။
ပွိုင့်-၆၆၆ စခန်းကုန်းကို AA နဲ့ ပူးပေါင်းတပ်တွေက ဇန်နဝါရီ ၂၈ ရက်နေ့ ညနေပိုင်းမှာ အပြီးသတ် သိမ်းပိုက်လိုက်ပြီးတဲ့နောက် ဇန်နဝါရီ ၂၉ နဲ့ ၃၀ ရက်တို့မှာ စစ်ကောင်စီက လေကြောင်းတိုက်ခိုက်မှုတွေကို အပြင်းအထန် ပြုလုပ်ခဲ့တာလို့ စစ်ရေးအခြေအနေကို သိရှိသူ အမျိုးသားတယောက်က ပြောပါတယ်။
“ပွိုင့်- ၆၆၆ စခန်းကုန်းကို ၃ လနီးပါးကြား ပိတ်ဆို့ထားတာကနေ ဇန်နဝါရီလ ၂၈ ရက်နေ့ သိမ်းပိုက်နိုင်ခဲ့တာရှိတယ်။ စစ်ကောင်စီတပ်တွေ ရိက္ခာနဲ့ လက်နက်အင်အား ဖြည့်တင်းနိုင်မှု မရှိတော့တာကြောင့် ခုခံနိုင်စွမ်းမရှိဘဲ စခန်းကုန်းကို လက်လွတ်လိုက်ကြတာ။ စခန်းသိမ်းပိုက်ခံရပြီးနောက် စခန်းကုန်း ပတ်ဝန်းကျင်းကို လေကြောင်းကနေ အပြင်းအထန် တိုက်ခိုက်နေတာရှိတယ်။”
ပွိုင့်-၆၆၆ စခန်းကုန်းကို ပြီးခဲ့တဲ့ အောက်တိုဘာလအတွင်းကလည်း အာရက္ခတပ်တော်က သိမ်းပိုက်နိုင်ခဲ့ပေမဲ့ စစ်ကောင်စီက ပြန်လည်ထိုးစစ်ဆင်တိုက်ခိုက်ခဲ့တဲ့အတွက် နောက်ဆုတ်ပေးခဲ့ရတာ ဖြစ်ပါတယ်။
အဲဒီနောက် AA ဘက်က စခန်းကုန်းကို ပြန်လည်ပိတ်ဆို့ဖြတ်တောက်ခဲ့တာကြောင့် စစ်ကောင်စီက ရိက္ခာနဲ့ လက်နက်ခဲ့ယမ်းတွေ ဖြည့်တင်းမရဘဲ ပြတ်တောက်မှုကြောင့် ပြန်လည် လက်လွှတ်လိုက်ရတာလည်း ဖြစ်ပါတယ်။
စစ်ကောင်စီက ပွိုင့်-၆၆၆ စခန်းကုန်းကို အင်အားနဲ့ လက်နက်ခဲယမ်းဖြည့်တင်းနိုင်ဖို့ အားဖြည့်ရာကနေ AA ရဲ့ တိုက်ခိုက်မှုကြောင့် စကခ-၁၀ တပ်မမှူး ဗိုလ်မှူးကြီး ဟန်လင်းအောင်၊ ဗိုလ်မှူးဝေယံလင်းနဲ့ စစ်ကောင်စီတပ်ဖွဲ့ ၁၀၀ ထက်မနည်းလည်း သေဆုံးခဲ့ကြတယ်လို့ စစ်ရေးသတင်းရင်းမြစ်တွေက ပြောပါတယ်။
စစ်ကောင်စီနဲ့ အာရက္ခတပ်တော်တို့ဟာ ပဲခူးရိုးမအတွင်း ၂၀၂၅ ခုနှစ် ဇန်ဝါရီလကတည်းက တိုက်ပွဲတွေ ပြင်းထန်နေကြတာဖြစ်သလို စစ်ကောင်စီရဲ့ မိုထိဗျူဟာ၊ ပုဂံကွဲစခန်း၊ ညောင်းကျိုးစခန်းနဲ့ ပွိုင့်-၆၆၆ စခန်းကုန်းတို့အပါဝင် တပ်စခန်း ၅ ခုထက်မနည်းကို AA ပူးပေါင်းတပ်က သိမ်းပိုက်ထားတာလည်းဖြစ်ပါတယ်။
လက်ရှိမှာ စစ်ကောင်စီက ဆင်လန်ကျေးရွာမှာ ခံစစ်တည်ဆောက်ထားသလို AA ဘက်ကလည်း ညောင်ကျိုးမှာ အထိုင်ချလှုပ်ရှားနေကြတာဖြစ်ပြီး စစ်ကောင်စီရဲ့ ကပစ စစ်ရုံးတွေကို သိမ်းပိုက်နိုင်ဖို့ ကြိုးပမ်းနေပါတယ်။
ပန်းတောင်းမြို့နယ်မှာ စစ်ကောင်စီရဲ့ ကပစ စက်ရုံ ၄ ခုအထိရှိပြီး လက်ရှိမှာ ကပစ-၁၆ နဲ့ ကပစ-၆ နဲ့ ၁၀ အတွင်းအထိ အာရက္ခတပ်တော် (AA) နဲ့ ပူးပေါင်းတပ်တွေရဲ့ ထိုးစစ်ရောက်ရှိလာတာလည်း ဖြစ်ပါတယ်။
