မြန်မာစစ်တပ်နဲ့ ဆက်စပ်နေတဲ့ စီးပွားရေးလုပ်ငန်းတွေနဲ့ ဝါဒဖြန့်ချိရေး အကောင့်တွေကို ဖေ့စ်ဘွတ်ကနေ ဖယ်ရှားလိုက်ပါတယ်။

စာမျက်နှာ၊ ဂရုနဲ့ ပရိုဖိုင်းအကောင့် စုစုပေါင်း ၂၇၀ ခုကို ပိတ်လိုက်တာဖြစ်တယ်လို့ ဇန်နဝါရီ ၂၇ ရက်နေ့မှာ Justice for Myanmar က ထုတ်ပြန်လာတာပါ။ 

ဒီလုပ်ဆောင်ချက်ဟာ ဖေ့စ်ဘွတ်ကုမ္ပဏီ Meta က ၂၀၂၁ ခုနှစ်ကတည်းက စတင်ထားတဲ့ စစ်တပ် ထိန်းချုပ် စီးပွားရေးလုပ်ငန်းတွေ၊ မီဒီယာတွေကို ပိတ်ပင်တဲ့ မူဝါဒအရ လုပ်ဆောင်ခဲ့တာလို့ သိရပါတယ်။

ဖယ်ရှားခံရတဲ့ အကောင့်အများစုဟာ စစ်တပ်ပိုင် မိုင်တဲလ်ထုတ်ကုန်နဲ့ ဝန်ဆောင်မှုတွေ ရောင်းချနေတဲ့ အကောင့်တွေ ဖြစ်ပြီး၊ ကျန်တဲ့အကောင့်တွေကတော့ MEC၊ MEHL နဲ့ ဆက်စပ်တဲ့ ကုမ္ပဏီခွဲတွေ၊ ဘဏ်တွေ၊ စီးပွားရေးအမှတ်တံဆိပ်တွေ ဖြစ်ပါတယ်။ 

ဒါ့အပြင် စစ်တပ်ဝါဒဖြန့်နေတဲ့ a Light for Justice 3၊ News Service Station နဲ့ Myanmar Information Community တို့ကိုလည်း ဖယ်ရှားခဲ့ပါတယ်။ 

အခုလို အကောင့်တွေ ပိတ်သိမ်းဖို့အတွက် Justice For Myanmar က တိုင်ကြားခဲ့တာဖြစ်ပြီး Alphabet၊ Apple၊ TikTok နဲ့ Telegram တို့ကိုလည်း စစ်တပ်နဲ့ဆက်စပ်တဲ့ အကောင့်တွေကို ချက်ချင်းပိတ်ပင်ဖို့ တောင်းဆိုထားတယ်လို့ ထုတ်ပြန်ပါတယ်။