ရန်ကုန်-မန္တလေး လမ်းဟောင်းက စစ်ကောင်စီရဲ့ ရေနီမြို့ စစ်ဆေးရေးဂိတ်မှာ ဖြတ်သန်းသွားလာသူ တယောက်ချင်းစီကို ဓာတ်ပုံရိုက်ယူပြီး စစ်ဆေးနေတယ်လို့ ကိုယ်တိုင်ကြုံခဲ့ရသူတွေဆီက သိရပါတယ်။
ရေနီမြို့မှာ ပဲခူးတိုင်းနဲ့ မန္တလေးတိုင်း အစပ်မှာရှိသလို နေပြည်တော်နဲ့ နီးကပ်နေပြီး အဲဒီစစ်ဆေးရေးဂိတ်အနေနဲ့ အရင်က ဖြတ်သွားတဲ့ ကားတွေကို သာမန်စောင့်ကြည့်တဲ့ အနေအထားပဲ ရှိပေမဲ့ အခုရက်ပိုင်းအတွင်း စစ်ဆေးမှု ပုံစံပြောင်းလဲလာတာလို့ ဆိုပါတယ်။
အဲဒီ စစ်ဆေးရေးဂိတ်ကနေ ဖြတ်သန်းအသုံးပြုတဲ့ ကားပေါ်လိုက်ပါသူတွေကို ဆင်းခိုင်းပြီး ဓာတ်ပုံရိုက်ကာ စစ်ဆေးလာသလို လူငယ်ပိုင်းတွေကို အဓိကထား စစ်ဆေးမေးမြန်းနေတာလို့ ရန်ကုန်-မန္တလေး လမ်းဟောင်းကနေ ပုံမှန်ဖြတ်သန်းသွားလာနေသူတယောက်က ပြောပါတယ်။
“ကားပေါ်က ဆင်းပြီး ဓာတ်ပုံရိုက်ဖို့ ပြင်ထားတဲ့အခန်းထဲ ဝင်ရတယ်။ ပြီးရင် တယောက်ချင်း ကင်မရာရှေ့မှာ ဓာတ်ပုံရိုက်ခံရတယ်။ မှတ်ပုံတင် စမတ်ကတ် လုပ်ရင် ရိုက်တဲ့ပုံစံမျိုးပဲ။ ဒီလမ်းက အမြဲသွားနေတာ။ တခြားဂိတ်တွေမှာ ဒီလိုမရှိဘူး။ စစ်လည်း မှတ်ပုံတင်လောက်ပဲ ပြရတာ။”
အဲဒီလို ဓာတ်ပုံရိုက် စစ်ဆေးတာ သိပ်မကြာသေးဘဲ အစပိုင်းမှာ ယာဥ်မောင်းသူကို စစ်တာလောက်နဲ့ ပြီးပြတ်ပေမဲ့ အခုနောက်ပိုင်း ကားပေါ်ပါသူအားလုံး အစစ်ခံရတာလို့ ဆိုပါတယ်။
အာဏာသိမ်းပြီးနောက်ပိုင်း စစ်ဆေးရေးဂိတ်တွေမှာ လုံခြုံရေး အကြောင်းပြချက်နဲ့ ပိုမိုစစ်ဆေးလာပြီး မှတ်ပုံတင်ကို PSMS စနစ်သုံးကာ နိုင်ငံရေး ပြစ်မှုနဲ့ ဝရမ်းထုတ်ခံထားရသူ၊ CDM လုပ်ထားသူတွေကို ဖော်ထုတ် ဖမ်းဆီးတာတွေလည်း ရှိနေပါတယ်။
အခုလို ဓာတ်ပုံရိုက်ယူတာက နည်းပညာအသုံးပြုပြီး ဖမ်းဆီးအရေးယူဖို့ အလိုရှိသူရဲ့ မျက်နှာပုံရိပ်နဲ့ တိုက်ဆိုင်စစ်ဆေးတဲ့သဘော ဖြစ်နိုင်တယ်လို့ နည်းပညာပိုင်း အကျွမ်းဝင်သူတယောက်က ပြောပါတယ်။
“PSMS လိုမျိုး သုံးတာလို့ ယူဆရတယ်။ စကစ ဘက်က အလိုရှိသူတွေရဲ့ မျက်နှာပုံရိပ်နဲ့ တိုက်ဆိုင်စစ်ဆေးတဲ့ သဘောဖြစ်ဖို့ များတာ။ ဒီနည်းပညာက တရုတ်မှာ အသုံးပြုနေတာ ကြာပြီ။ အာဏာဖီဆန်ရေး လုပ်နေသူတွေအတွက် သတိတော့ထားရမှာ။”
ရန်ကုန်-မန္တလေး လမ်းဟောင်းတလျှောက်မှာ စစ်ကောင်စီရဲ့ ဂိတ်တွေ ခပ်စိပ်စိပ်ရှိနေပြီး အဲဒီလမ်းပိုင်းကို အဓိက အသုံးပြုသွားလာတဲ့ ကုန်ကားတွေဆီက ပေါ်ပေါ်ထင်ထင် ပိုက်ဆံတောင်းယူတာတွေနဲ့ ပတ်သက်လို့ ဝေဖန်မှုတွေရှိနေတဲ့ လမ်းပိုင်းလည်း ဖြစ်ပါတယ်။
အဲဒီလမ်းပိုင်းအချို့နေရာတွေမှာ တော်လှန်ရေး တပ်ဖွဲ့တွေက မကြာခဏ တက်ရောက် စိုးမိုးတာ၊ စစ်တပ် ကင်းစခန်း၊ ရဲကင်းတွေကို စီးနင်းပစ်ခတ်တာတွေ ရှိလို့ လုံခြုံရေး အဆင့်မြှင့်လာတာ ဖြစ်နိုင်တယ်လို့ စစ်ရေးနဲ့ နီးစပ်သူတွေက ဆိုပါတယ်။
ပြီးခဲ့တဲ့ရက်ပိုင်းကလည်း ပဲခူးတိုင်းအတွင်း ရန်ကုန်-မန္တလေး လမ်းဟောင်းမှာရှိတဲ့ အောင်မြင်မြို့က စစ်တပ်စခန်း အပါအဝင် အရေးပါတဲ့ နေရာတွေကို PDF တွေက စီးနင်းပစ်ခတ်ကာ မြို့ကို ယာယီ ထိန်းချုပ်ခဲ့ပါတယ်။
အခုနောက်ပိုင်းမှာ တော်လှန်ရေး အင်အားစုတွေက ရန်ကုန်-မန္တလေး လမ်းဟောင်းအပြင် အမြန်လမ်းအသစ်ရဲ့ လမ်းပိုင်းအချို့အထိ တက်ကာ ကားတွေကို စစ်ဆေးတဲ့အထိ လုပ်လာသလို ရန်ကုန်-ပြည် လမ်းပိုင်းမှာလည်း တိုက်ပွဲဖော်ဆောင်တာတွေ ခပ်စိပ်စိပ် ရှိနေပါတယ်။
