ရွေးကောက်ပွဲ မဲဆွယ်စည်းရုံးရာမှာ တော်လှန်ရေးဆိုတဲ့ စကားလုံးကို သုံးနှုန်းခဲ့တဲ့ ပြည်သူ့ပါတီရဲ့ သင်္ဃန်းကျွန်းမြို့နယ် ပြည်သူ့လွှတ်တော်ကိုယ်စားလှယ်လောင်း ဦးလွင်မြင့်ကို သင်္ဃန်းကျွန်းမြို့နယ် တရားရုံးက အလုပ်နဲ့ထောင်ဒဏ် ၁ နှစ် ချလိုက်တယ်လို့ ပါတီဝင်တွေဆီက သိရပါတယ်။
ဇန်နဝါရီ ၈ ရက် မနက် ၁၁ နာရီခွဲမှာ လွှတ်တော်ကိုယ်စားလှယ်လောင်း ဦးလွင်မြင့်ကို ရွေးကာဥပဒေပုဒ်မ ၅၈(ဂ) အရ အလုပ်နဲ့ ထောင်ဒဏ် ၁ နှစ် ချလိုက်တာလို့ ပါတီဝင်တယောက်က DVB ကို ပြောပါတယ်။
“ဒီဇင်ဘာလ ၂၃ ရက်ကတည်းက တရားရင်ဆိုင်နေရတာ၊ အဲဒီကတည်းက အမိန့်ချလို့ရတယ်။ အမိန့်ချလိုက်ရင် ရုပ်ပျက်ဆင်းပျက်ဖြစ်မှာစိုးလို့ ဝင်ပြိုင်ခိုင်းပြီး ရွေးကောက်ပွဲပြီးမှ အမိန့်ချတာ။ ထောင်ဒဏ် ၁ နှစ်ကို အလုပ်ကြမ်းပါ ထည့်ပြီးချတာ။”
သင်္ဃန်းကျွန်းမြို့နယ် ပြည်သူ့လွှတ်တော်ကိုယ်စားလှယ်လောင်း ဦးလွင်မြင့်ဟာ နိုဝင်ဘာ ၁၂ ရက်က U Lwin Myint Tiktok Account ကနေ မဲဆွယ်စည်းရုံးမှာ တော်လှန်ရေးဆိုတဲ့ စကားလုံး သုံးစွဲခဲ့တဲ့အတွက် စစ်တပ်သြဇာခံ ရွေးကောက်ပွဲကော်မရှင် UEC က ဖမ်းဆီး စစ်ဆေးခဲ့တာပါ။
ဒီလို ဖမ်းဆီးစစ်ဆေးပြီး ပြန်လွှတ်ပေးလိုက်ပေမဲ့ ကြံ့ခိုင်ရေးသတင်းထောက်တွေက ဖေ့စ်ဘွတ်ခ် ပရိုဖိုင်မှာ NUG လိုဂိုတင်ထားတဲ့အတွက် ထပ်မံတိုင်ကြားလို့ ဒီဇင်ဘာ ၁၇ ရက်မှာ စရဖအဖွဲ့က ထပ်မံဖမ်းဆီးပြီး ရွေးကာဥပဒေပုဒ်မ ၅၈(ဂ) နဲ့ သင်္ဃန်းကျွန်းမြို့နယ် တရားရုံးမှာ တရားစွဲဆိုခဲ့တာ ဖြစ်ပါတယ်။
တရားစွဲဆိုပြီး ဒီဇင်ဘာ ၂၃ ရက်မှာ ပထမအကြိမ် ရုံးထုတ်စစ်ဆေးခဲ့ပေမဲ့ အဲဒီနေ့က အမိန့်မချဘဲ ရွေးကောက်ပွဲ ဝင်ပြိုင်ခိုင်းကာ ဒီကနေ့မှ ဦးလွင်မြင့်ကို အလုပ်နဲ့ထောင်ဒဏ် ၁ နှစ် ချလိုက်တာပါ။
စစ်အုပ်စုရဲ့ ဝါဒဖြန့် ကြံ့ခိုင်ရေးသတင်းထောက်တွေရဲ့တိုင်ကြားချက်ကြောင့် ပီသုံးလုံး ပါတီဥက္ကဋ္ဌ ဒေါ်သက်သက်ခိုင်၊ ရခိုင်တိုင်းရင်းသားရေးရာဝန်ကြီး ကိုယ်စားလှယ်လောင်း ဦးတင်ထူးအောင်နဲ့ လေဘာပါတီက အမျိုးသားလွှတ်တော်ကိုယ်စားလှယ်လောင်း ဦးကျော်သူရ တို့ကို UEC က ကိုယ်စားလှယ်အဖြစ် ရပ်နားခဲ့ပါတယ်။
