အာဏာသိမ်းစစ်တပ်က ဖမ်းဆီးထားတဲ့ သတင်းစာဆရာ ဦးစည်သူအောင်မြင့်၊ ဘီဘီစီ မီဒီယာအက်ရှင် (BBC- Media Action) ရဲ့ “ခံစားကြည့်” အစီအစဉ်က မထက်ထက်ခိုင်နဲ့ အဆိုတော် သံသာဝင်းတို့ လွတ်ငြိမ်းချမ်းသာခွင့်တွေနဲ့ ပြန်လည်လွတ်မြောက်လာကြောင်း သိရပါတယ်။
ဝါရင့်သတင်းစာဆရာ ဦးစည်သူအောင်မြင့်ကိုတော့ စစ်ကောင်စီက ပုဒ်မ ၅၀၅-က နိုင်ငံတော် အကြည်ညိုပျက်စေမှု ပုဒ်မ ၁၂၄-က တို့နဲ့ တရားစွဲဆို ထောင်ချထားတာဖြစ်ပြီး ပြန်လည်လွတ်မြောက်လာကြောင်းကို မိသားစုဝင်တယောက်က လူမှုကွန်ရက်မှာ အတည်ပြု ရေးသားထားပါတယ်။
BBC - Media Action ရဲ့ ခံစားကြည့်အစီအစဉ်ရဲ့ အစီအစဉ်တင်ဆက်သူ၊ အလွတ်တန်းသတင်းထောက် တယောက်လည်းဖြစ်တဲ့ မထက်ထက်ခိုင် ကိုတော့ ပုဒ်မ ၅၀၅-က၊ ပုဒ်မ ၁၇/၁ နဲ့ စုစုပေါင်း ထောင် ၆ နှစ် ချမှတ်ထားတာဖြစ်ပြီး သာယာဝတီအကျဉ်းထောင်ကနေ လွတ်မြောက်လာကြောင်း သိရပါတယ်။
ဒါ့အပြင် ၂၀၂၃ နှစ်ကုန်ပိုင်းက အစ်ကိုဖြစ်သူနဲ့အတူ ဖမ်းဆီးခံခဲ့ရပြီး ပုဒ်မ ၅၀၅-က၊ ပုဒ်မ ၅၀-ည တို့နဲ့ တရားစွဲဆို ထောင်ချခံထားရတဲ့ အဆိုတော် သံသာဝင်းလည်း နိုဝင်ဘာ ၃၀ ရက်မှာ ပြန်လည်လွတ်မြောက်လာပြီဖြစ်ကြောင်း သံသာဝင်းရဲ့ မိတ်ဆွေတွေက သူတို့ရဲ့ လူမှုကွန်ရက်မှာ ရေးသားထားပါတယ်။
နိုဝင်ဘာ ၂၆ ရက်နဲ့ ၂၇ ရက်တွေမှာ နိုင်ငံရေးအကျဉ်းသား ၃၅၀ လွတ်မြောက်ခဲ့ပြီး ဒီဇင်ဘာ ၁ ရက်နေ့မှာတော့ နိုင်ငံရေးအကျဥ်းသား ၂၆၈ ယောက် လွတ်မြောက်လာကြောင်း မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများကွန်ရက် (PPNM) ရဲ့ ကနဦး ထုတ်ပြန်ထားချက်တွေအရ သိရပါတယ်။
PPNM ဦးဆောင်ကော်မတီဝင် ကိုသိုက်ထွန်းဦးက “ဟုတ်တယ်၊ မန္တလေး အိုးဘို သရက် မကွေး စတဲ့ထောင်တွေနဲ့ တခြားထောင်တွေကလည်း လွှတ်နေတာ ရှိပါတယ်။ ကျနော်တို့ထင်တာကတော့ အထူးသဖြင့် ၅၀၅-က ဖြုတ်ပေးတဲ့အခါ သူတို့ မူလအကျဉ်းထောင်မှာ နေခဲ့တာကို နေ့စားအားဖြင့် ကာလတခု ပြည့်မီတဲ့သူတွေကို လွှတ်ပေးနေတာကို ကျနော် တွေ့မြင်ရပါတယ်” လို့ ပြောပါတယ်။
စစ်ကောင်စီရဲ့ ကြေညာထားချက်အရ တရားစွဲခံထားရဆဲဖြစ်သူ ၅,၅၈၀ ယောက်ကို အမှုပိတ်သိမ်းပေးလိုက်ပြီး ထောင်ဒဏ်ကျခံနေရသူ ၂,၃၆၁ ယောက်ကို ၅၀၅-က အတွက် ချမှတ်ထားတဲ့ ပြစ်ဒဏ်တွေကို ခံဝန်နဲ့ လျှော့ပေါ့ပေးလိုက်တယ်လို့ ဆိုပါတယ်။
ဒါ့အပြင် ၅၀၅-က အမှုတခုတည်းနဲ့ ထောင်ဒဏ်ကျခံနေရသူ ၇၂၄ ယောက်ကိုတော့ ခံဝန်နဲ့ လွတ်ငြိမ်းချမ်းသာခွင့် ပေးလိုက်တာလို့ သိရပါတယ်။
