နာဇီအာဏာရှင် ဟစ်တလာဟာ ဝှေးစေ့တလုံးတည်းရှိတဲ့ “နတ်ကွပ်” ဖြစ်နိုင်တဲ့အပြင် Micropenis လို့ခေါ်တဲ့ လိင်တံသေးငယ်တဲ့ ရောဂါလက္ခဏာပါ ရှိနိုင်တယ်လို့ DNA လေ့လာမှုတခုက ဖော်ပြပါတယ်။
ဆေးပညာအရ သူ့မှာ လိင်အင်္ဂါဖွံ့ဖြိုးမှုကို ဟန့်တားတဲ့ ကဲလ်မန်းဆင်ဒရုန်း (Kallmann syndrome) ဆိုတဲ့ ရှားပါးမျိုးဗီဇရောဂါ ရှိနေနိုင်ပြီး ဒီရောဂါရှိသူ ၁၀ ရာခိုင်နှုန်းဟာ လိင်တံသေးငယ်လေ့ ရှိတယ်လို့ ဆိုပါတယ်။
၁၉၄၅ ခုနှစ်တုန်းက ဟစ်တလာ ကိုယ့်ကိုယ်ကိုယ် အဆုံးစီရင်သွားတဲ့ မြေအောက်ဗုံးခိုကျင်းထဲက ဆိုဖာကနေ အမေရိကန်ဗိုလ်မှူးကြီးတယောက် ဖြတ်တောက်ယူထားတဲ့ သွေးပေနေတဲ့ အဝတ်စကနေ DNA ရယူစစ်ဆေးခဲ့တာ ဖြစ်ပါတယ်။
၂၀၁၅ ခုနှစ်ကမှ ရှာဖွေတွေ့ရှိခဲ့တဲ့ ၁၉၂၃ ခုနှစ် ဆေးစစ်ချက်မှာလည်း ဟစ်တလာဟာ နတ်ကွပ် ဖြစ်တယ်ဆိုတာ ဖော်ပြထားပါတယ်။
သုတေသနကို ဦးဆောင်တဲ့ ပါမောက္ခ တူရီကင်းက “သူ့ရဲ့ မျိုးဗီဇရလဒ်ကို ကြည့်မယ်ဆိုရင် သူကိုယ်တိုင်ဟာ ဓာတ်ငွေ့ခန်းထဲလွှတ်ပြီး ရှင်းခံရဖို့ ကျိန်းသေတဲ့ အခြေအနေမှာ ရှိနေပါတယ်” လို့ ပြောပါတယ်။
ဒုတိယကမ္ဘာစစ်တုန်းက ထင်ရှားခဲ့တဲ့ သူ့ကို လှောင်ပြောင်သီဆိုခဲ့ကြတဲ့ “Hitler Has Only Got One Ball” သီချင်းနဲ့လည်း တိုက်ဆိုင်နေတာ တွေ့ရပါတယ်။
ဒီလေ့လာတွေ့ရှိမှုကို ဗြိတိန်နိုင်ငံက Channel 4 ရုပ်သံလိုင်းမှာ နိုဝင်ဘာ ၁၅ ရက်ကျရင် “Hitler’s DNA: Blueprint of a Dictator” လို့ အမည်ပေးထားတဲ့ ရုပ်သံမှတ်တမ်းအဖြစ် ပြသမှာဖြစ်ပါတယ်။ နောက်ပိုင်းမှာ သိပ္ပံဂျာနယ်တခုမှာ ပုံနှိပ်ဖော်ပြဖို့လည်း စီစဉ်ထားပါတယ်။
ဒါပေမဲ့ ဒီမှတ်တမ်းရုပ်ရှင်ရဲ့ လေ့လာဆန်းစစ်မှုတွေအပေါ် သံသယရှိတဲ့ မေးခွန်းထုတ်မှုတွေလည်း ထွက်ပေါ်လာခဲ့ပါတယ်။
အထူးသဖြင့် ဟစ်တလာမှာ ADHD၊ Autism နဲ့ Schizophrenia လို စိတ်ပိုင်းဆိုင်ရာ အခြေအနေတွေ ရှိနိုင်ခြေများတယ်လို့ သုံးသပ်ဖို့ အငြင်းပွားဖွယ်ရာ Polygenic Risk Score (PRS) စမ်းသပ်မှုတွေကို အသုံးပြုခဲ့တာကို ဝေဖန်နေကြပါတယ်။
ကျွမ်းကျင်သူတွေက ဒီ PRS စမ်းသပ်မှုတွေဟာ လူများစုအတွက် ယေဘုယျဆန်တဲ့ အဖြေသာဖြစ်ပြီး လူတယောက်ချင်းစီအတွက် အတိအကျ အဖြေထုတ်ပေးနိုင်တာ မဟုတ်ဘူးလို့ ဆိုပါတယ်။
ဒီမှတ်တမ်းရုပ်ရှင်ဟာ မျိုးဗီဇက လူတယောက်ရဲ့ ကံကြမ္မာကို ဆုံးဖြတ်တယ်ဆိုတဲ့ “မျိုးရိုးဗီဇဆိုင်ရာ အဆုံးအဖြတ်ပေးခြင်း” (genetic determinism) ဘက်ကို ရောက်သွားတယ်လို့ ဝေဖန်ကြပါတယ်။
ဒီအယူအဆဟာ နာဇီတွေ လက်ခံကျင့်သုံးခဲ့တဲ့ “မျိုးနွယ်စုသိပ္ပံ” အယူအဆရဲ့ အဓိကအချက် ဖြစ်နေတာကြောင့် အခုလို ချဉ်းကပ်မှုမျိုးကို အင်မတန် သတိထားသင့်တယ်လို့ သုံးသပ်သူတွေက ဝေဖန်နေကြပါတယ်။
