ကရင်ပြည်နယ်၊ မြဝတီမြို့အနီး KK Park ဝင်းအတွင်းရှိ အဆောက်အအုံတခုကို လက်နက်အပြည့်အစုံနဲ့ စစ်တပ်က ဝင်ရောက်စီးနင်းနေပုံ ဓာတ်ပုံရိုက်ပြီး ဒီနေ့ အောက်တိုဘာ ၂၀ ရက်ထုတ် စစ်ကောင်စီဝါဒဖြန့် သတင်းစာတွေမှာ ဖော်ပြပါတယ်။
KK Park အတွင်းမှာ တရားမဝင် ဆက်သွယ်မှု ဆောင်ရွက်ဖို့ ရည်ရွယ်တပ်ဆင်ထားတဲ့ Star Link စလောင်း အစုံ ၃၀ နဲ့ ဆက်စပ်ပစ္စည်းတွေ သိမ်းဆည်းရမိခဲ့ပြီး အဆောက်အအုံတွေထဲက အလုပ်သမား အမျိုးသား ၁,၆၄၅ ယောက်၊ အမျိုးသမီး ၄၅၅ ယောက်နဲ့ လုံခြုံရေးအမျိုးသား ၉၈ ယောက် စုစုပေါင်း ၂,၁၉၈ ယောက် တွေ့ရှိခဲ့တယ်လို့လည်း သတင်းမှာ ဖော်ပြထားပါတယ်။
စစ်ကောင်စီတပ်ဟာ အရင်ကလည်း မကြာခဏ အဖမ်းအဆီးပြကာ သတင်းဖော်ပြမှုတွေ ရှိခဲ့တယ်လို့ ကျားဖြန့်လုပ်ငန်းမှာ လုပ်ကိုင်ခဲ့ဖူးသူတွေဆီက သိရပါတယ်။
KK Park ကျားဖြန့်လုပ်ငန်းထဲမှာ အလုပ်လုပ်ခဲ့ဖူးသူတယောက်က “ခု စစ်တပ်က ကျားဖြန့်လုပ်ငန်းကို ဝင်ရောက်စီးနင်းတာကတော့ အံ့သြစရာဖြစ်နေတာ ကရင်ပြည်နယ်မှာရှိတဲ့ ကျားဖြန့်လုပ်ငန်း အများစုက BGF တပ်ရဲ့ ထိပ်ပိုင်းခေါင်းဆောင်တွေ၊ စစ်တပ်က ထိပ်ပိုင်းခေါင်းဆောင်တွေနဲ့ ညှိနှိုင်းပြီး လုပ်နေတာ။ ခုမှ စစ်တပ်က ဝင်ရောက်စီးနင်းပြီး အဖမ်းပြတယ် ဆိုတာကတော့ အံ့သြစရာတခု ဖြစ်နေတာပေါ့။ ကျားဖြန့်လုပ်ငန်းတွေထဲမှာတော့ မကြာခဏ အဖမ်းပြနေတာပဲ။ သူတို့ အဖမ်းအဆီးလုပ်တော့မယ်ဆိုရင် အလုပ်သမားတွေ အကုန် နေရာပြောင်းရွှေ့ပေးရတယ်။ ပြီးရင် ထိုင်းနိုင်ငံဘက်အခြမ်းက အသင့်ဝယ်ပြီး သိမ်းထားတဲ့ ကွန်ပျူတာ လက်တော့တွေ၊ အဆိုပါပစ္စည်းနဲ့ ဆက်စပ်တဲ့ မော်ဒယ်နိမ့် ပစ္စည်းအစုတ်တွေကို ဖမ်းဆီးရမိတယ်ဆိုပြီး ပြတယ်။ နောက် မီးရှို့ဖျက်ဆီးပြပြီး သတင်းတွေမှာ ဖြန့်လေ့ရှိတယ်” လို့ ပြောပါတယ်။
တကယ် ကျားဖြန့်လုပ်ငန်းတွေကို အရေးယူမယ်ဆိုရင် မြန်မာနိုင်ငံထဲမှာ အများကြီးရှိပေမဲ့ ကရင်ပြည်နယ် တခုတည်းကိုတောင် အရေးယူလို့ ကုန်မှာမဟုတ်ဘူးလို့လည်း ကျားဖြန့်မှာလုပ်ဖို့ ခိုင်းစေခံခဲ့ရသူတယောက်က ပြောပါတယ်။
“ကရင်ပြည်နယ်မှာ ကျားဖြန့်လုပ်ငန်း လုပ်ကိုင်နေသူ ၈၀ ရာခိုင်နှုန်းက လက်နက်ကိုင် အဖွဲ့အစည်းတွေချည်းပဲ၊ ကျားဖြန့်လုပ်ငန်းတွေ လုပ်နေတာကလည်း စစ်ကော်မရှင်နဲ့ ပတ်သက်နေတဲ့သူတွေ၊ အလုပ်သမားတွေကို လစာကောင်းကောင်းပေးပြီး ခိုင်းထားတာ၊ တလကို ဖောက်သည် ၃ ယောက် ရှာပေးရတယ်၊ ဝင်ဝင်ချင်း ထိုင်းဘတ်ငွေ ၁၅,၀၀၀ ရတယ်၊ လုပ်သက်ကြာလာတာနဲ့အမျှ လစာကောင်းကောင်း ရလာတယ်၊ နေရာကောင်းကောင်းရလာတယ်၊ အမှားတော့မခံဘူး၊ တခါ နှစ်ခါ အမှားဖြစ်လာရင်တော့ အပြစ်ပေး အရေးယူတာတွေကို ခံရတယ်၊ လစာတွေ အဖြတ်တောက် လုပ်ခံရတယ်၊ သူလည်း အလုပ်ခံခဲ့ရဖူးတယ်၊ နောက် အဆင်မပြေတာနဲ့ အဲဒီအလုပ်ကနေ ထွက်ပြေးလာတာ။”
KK Park ဟာ မြဝတီမြို့နယ်အတွင်း တည်ရှိကာ စစ်ကောင်စီတပ် အနေနဲ့ လေးကေ့ကော်မြို့သစ်ကို တိုက်ခိုက်သိမ်းပိုက်ရာ အောက်တိုဘာ ၅ ရက်မှာ ပြန်ထိန်းချုပ်နိုင်ခဲ့ပြီး အဲဒီလို တိုက်ခိုက်စဉ်မှာပဲ KK Park ကိုလည်း တပြိုင်တည်း ဝင်ရောက်ရှင်းလင်းခဲ့တာလို့ စစ်ကောင်စီ သတင်းဌာနတွေမှာ ဖော်ပြပါတယ်။
ထိုင်း-မြန်မာနယ်စပ် ကျားဖြန့်လုပ်ငန်းတွေမှာ Star Link အင်တာနက်ကို အသုံးပြု လုပ်ကိုင်နေကြောင်း တွေ့ရှိချက်တွေကြောင့် အမေရိကန်ကွန်ဂရက်လွှတ်တော် စီးပွားရေးဆိုင်ရာ ပူးပေါင်းကော်မတီက Star Link ကုမ္ပဏီကို ဇူလိုင်လမှ စတင်ကာ ကြားနာမှုတွေ ပြုလုပ်လာခဲ့ပြီးနောက် မြဝတီမြို့နယ် နေရာတချို့မှာ Star Link နဲ့ အင်တာနက် အသုံးပြုမှုတွေ ပြတ်တောက်ခဲ့ပါတယ်။စစ်ကောင်စီတပ်ရဲ့ ဩဇာခံ ကရင်နယ်ခြားစောင့်တပ် (BGF) က အဓိက ထိန်းချုပ်ထားတဲ့ ရွှေကုက္ကို ဒေသနဲ့ KK Park ဟာ တရားမဝင် ကျားဖြန့်ငွေလိမ်ဂိုဏ်းတွေ၊ လူကုန်ကူးမှု၊ မူးယစ်ဆေးဝါး လုပ်ငန်းတွေနဲ့ ကမ္ဘာမှာ နာမည်ဆိုးနဲ့ ကျော်ကြားနေတဲ့နေရာ ဖြစ်ပါတယ်။
