စစ်ရေးတင်းမာနေတဲ့ ထိုင်း-မြန်မာနယ်စပ် ကုန်သွယ်ရေးလမ်းပိုင်းမှာ ပြီးခဲ့တဲ့ ၉ လကျော်အတွင်း ထိတွေ့တိုက်ပွဲ အကြိမ်ပေါင်းများစွာဖြစ်ခဲ့ပြီး စစ်တပ်ဘက်က ၁၀၀ ကျော် သေဆုံး၊ တော်လှန်ရေးပူးပေါင်းတပ်တွေဘက်က ၂၀ ကျော်ကျဆုံးခဲ့တယ်လို့ သိရပါတယ်။

ပြီးခဲ့တဲ့ စက်တင်ဘာလကနေ အောက်တိုဘာလပထမအပတ်အတွင်း တိုက်ပွဲပေါင်း ၃၀ လောက်ဖြစ်ခဲ့ပြီး စစ်ကောင်စီက နေ့တိုင်းနီးပါး လေကြောင်းကနေ ဗုံးကြဲတိုက်ခိုက်ခဲ့တယ်လို့ ကော်သူးလေတပ်မတော် KTLA( ထီးဆဲ့မဲ့ရွာတပ်ရင်း)ရဲ့ တာဝန်ခံတယောက်က ပြောပါတယ်။

“တိုက်ပွဲအငယ်တွေ၊ အကြီး‌တွေ အကုန်ပါတယ်။ အကြီးအကျယ်ဖြစ်တာက ၁၀ ကြိမ်ထက် မနည်းဘူး။ ကျနော်တို့ဘက်က သွားပစ်တာရှိသလို သူတို့ဘက်က ရှေ့တိုးလာလို့ ပစ်တာရှိမယ်။ အဲဒီပွဲတွေမှာ ဒီကောင်တွေ အထိများတယ်။ သူတို့ဘက်က မြေပြင်မှာ ရှေ့ဆက်မထိုးဖောက်နိုင်တော့ လေကြောင်းပစ်ကူနဲ့ လာတိုက်ခိုက်တာဖြစ်တယ်”

နယ်စပ်ကုန်သွယ်ရေးလမ်းပိုင်းပေါ်က ရှေ့တန်းစစ်မျက်နှာပြင်ဖြစ်တဲ့ သိန်ခွန်းဒေသမှာ တိုက်ပွဲတွေ ဖြစ်နေတာ ၁၀ လကြာရှိလာပြီး တိုက်ပွဲတွေအတွင်း တော်လှန်ရေးပူးပေါင်းတပ်တွေဘက်က ကျဆုံးသူ ၂၅ ယောက်လောက်၊ စစ်ကောင်စီဘက်က သေဆုံးသူ ၁၀၀ ကျော်ရှိတယ်လို့ မြေပြင်ကရရှိတဲ့ အချက်အလက်တွေအရ သိရတယ်လို့ သူက ဆက်ပြောပါတယ်။

“ကျနော်တို့ အကြမ်းဖျင်းရထားတဲ့ မြေပြင်သတင်းတွေအရ သူတို့ဘက်က ကျဆုံးတာ ၁၃၀ နဲ့ ၁၉၀ ကြားရှိပါတယ်။ အဲဒါက ထွက်ပြေးတာတွေ၊ ကျနော်တို့ဆီ လာပူးပေါင်းတာ မပါသေးပါဘူး။ သူတို့ဘက်က ကျဆုံးအရေအတွက်လောက်ပါပဲ။ အဓိကအားဖြင့် မြေပြင်မှာ နှစ်ဦးနှစ်ဖက် ထိတွေ့တိုက်ပွဲတွေမှာ ကျဆုံးတာ များပါတယ်။ ဒရုန်းစစ်ဆင်ရေးကြောင့် ကျတာရှိတယ်”

ပြီးခဲ့တဲ့နှစ် ဒီဇင်ဘာ ၁၈ ရက်နေ့မှာ တနင်္သာရီ-မောတောင်လမ်းပိုင်းက သိန်ခွန်းကျေးရွာဘက်မှာ စစ်ကောင်စီက အင်အား ၃၀၀ ဝန်းကျင်နဲ့စစ်ကြောင်းထိုးလာပြီးနောက် တော်လှန်ရေး ပူးပေါင်းတပ်တွေနဲ့ ထိတွေ့တိုက်ပွဲစတင်ဖြစ်လာခဲ့တာပါ။

ရွေးကောက်ပွဲလုပ်ဖို့ နီးကပ်လာတာနဲ့အမျှ စစ်ကောင်စီဘက်က ကုန်သွယ်ရေးလမ်းပိုင်းကို အပြည့်အဝထိန်းချုပ်ဖို့ အခုအချိန်ထိ ရှေ့ဆက်တိုးဖို့ ပြင်ဆင်နေသလို တော်လှန်ရေး ပူးပေါင်းအဖွဲ့တွေဘက်ကလည်း ခုခံစစ်တွေနဲ့ ပြန်လည်တိုက်ခိုက်နေတာပါ။

တိုက်ပွဲတွေကြောင့် စစ်ရေးမတည်ငြိမ်တဲ့အတွက် တနင်္သာရီ-မောတောင် လမ်းပိုင်းကို ပိတ်ထားတာ ၁၀ လကြာခဲ့ပြီဖြစ်လို့ ခရီးသွားတွေနဲ့ လမ်းပိုင်းကိုအသုံးပြုပြီး ကုန်သွယ်ရေး လုပ်ကိုင်နေကြသူတွေအတွက် အခက်အခဲတွေ အများကြီးကြုံရတယ်လို့လည်း ဒေသခံတွေက ပြောပါတယ်။