ကမ္ဘာ့လူကြိုက်အနည်းဆုံး ခေါင်းဆောင်တယောက်ဖြစ်တဲ့ ပီရူး အမျိုးသမီးသမ္မတ ဒီနာ ဘိုလွာတေးကို ကိုယ်ကျင့်တရားပျက်ယွင်းမှု စွဲချက်နဲ့ လွှတ်တော်က တခဲနက် ဖြုတ်ချလိုက်ပါတယ်။

လွှတ်တော်မှာ လာရောက်ရှင်းလင်းဖို့ ဆင့်ခေါ်ခဲ့ပေမဲ့ ရောက်မလာခဲ့တာကြောင့် နာရီပိုင်းအတွင်းမှာပဲ ဖြုတ်ချခဲ့တာဖြစ်ပြီး လွှတ်တော်ဥက္ကဋ္ဌ ဟိုဆေး ဟာရီကို သမ္မတသစ်အဖြစ် တင်မြှောက်ခဲ့ပါတယ်။

အသက် ၃၈ နှစ်အရွယ် ဟာရီဟာ လက်ရှိ ကမ္ဘာ့ခေါင်းဆောင်တွေထဲမှာ ၇ ယောက်မြောက် အသက်အငယ်ဆုံးခေါင်းဆောင် ဖြစ်လာပါတယ်။

ကွန်ဆာဗေးတစ်ဝါဒီ ဆိုမော့စ်ပီရူးပါတီက ဟာရီဟာ ဇူလိုင်လကမှ လွှတ်တော်ဥက္ကဋ္ဌ ဖြစ်လာတာဖြစ်ပြီး ပီရူးနိုင်ငံရဲ့ ၉ နှစ်အတွင်း ၇ ယောက်မြောက် သမ္မတအဖြစ် တင်မြှောက်ခံရတာ ဖြစ်ပါတယ်။

သမ္မတသစ် ဟာရီက  တိုင်းပြည်ရဲ့ လုံခြုံရေးပြဿနာကို အဓိကကိုင်တွယ်ပြီး ရာဇဝတ်မှုတွေကို စစ်ကြေညာရမယ်လို့ ကတိပြုခဲ့ပါတယ်။

အသက် ၆၃ နှစ်အရွယ် ဘိုလွာတေးဟာ အဂတိလိုက်စားမှုစွဲချက်တွေ၊ ဆန္ဒပြမှုတွေအပေါ် ပြင်းပြင်းထန်ထန် နှိမ်နင်းမှုတွေကြောင့် လူထုထောက်ခံမှု ၂ ကနေ ၄ ရာခိုင်နှုန်းပဲ ရှိခဲ့တယ်လို့ စစ်တမ်းတွေက ဖော်ပြပါတယ်။

မကြေညာထားတဲ့ ပိုင်ဆိုင်မှုတွေနဲ့ ရိုးလက်စ်နာရီတွေ အရှုပ်တော်ပုံကြောင့် ပိုနာမည်ပျက်ခဲ့ရသလို ဇူလိုင်လထဲမှာ ကိုယ့်ကိုယ်ကိုယ် လစာ နှစ်ဆတိုးပေးတဲ့ကိစ္စကလည်း ဝေဖန်စရာ ဖြစ်ခဲ့ရပါတယ်။

Source:Reuters