မြန်မာနိုင်ငံဆန်စပါးအသင်းချုပ်က ဆန်တင်ပို့မှုကို လာမယ့်အောက်တိုဘာလကစပြီး လစဉ် တန်ချိန် ၃ သိန်းအထိ တိုးမြှင့်တင်ပို့နိုင်ဖို့ ကြိုးပမ်းသွားမယ်လို့  အသိပေးကြေညာထားပါတယ်။

၂၀၂၅–၂၀၂၆ ဘဏ္ဍာနှစ် ဧပြီလကနေ စက်တင်ဘာလအထိ တလကို ဆန်တန်ချိန် ၂ သိန်း ပုံမှန်တင်ပို့ခဲ့ပြီး၊ အောက်တိုဘာလကနေ ၂၀၂၆ ခုနှစ် မတ်လအထိ တလကို တန်ချိန် ၃ သိန်းစီ တင်ပို့နိုင်ရေး ကြိုးပမ်းဆောင်ရွက်နေတယ်လို့ အသင်းချုပ်က ဆိုပါတယ်။

အသင်းဝင် ပို့ကုန်တင်ပို့တဲ့ ကုမ္ပဏီတွေကိုလည်း စပါးဈေးကျဆင်းနေချိန် တောင်သူဆီက စပါး/ဆန် ဝယ်ယူမှုတွေကို အင်တိုက်အားတိုက်ဆောင်ရွက်ဖို့ တိုက်တွန်းထားပါပြီး စပါးဝယ်ယူရာမှာ ငွေကြေး သို့မဟုတ် လုပ်ငန်းအခက်အခဲတွေရှိပါက အချိန်မီ အသင်းချုပ်ကို ချိတ်ဆက်တင်ပြဖို့လည်း ညွှန်ကြားထားပါတယ်။

ဒါ့အပြင် ဝယ်ယူမှုအခြေအနေတွေကို အပတ်စဉ် မှတ်တမ်းပြုစုတင်ပြပေးဖို့လည်း တိုက်တွန်းထားတာ တွေ့ရပါတယ်။

လက်ရှိမှာ မိုးရာသီ ကောက်စော စပါးအနည်းငယ် စတင်ထွက်ပေါ်နေပြီး ဒေသတချို့မှာ စပါး/ ဆန် ဝယ်လိုအားကျဆင်းနေလို့ ဈေးနှုန်းတွေ ကျဆင်းကာ တောင်သူတွေ စိတ်ရိမ်ပူပန်နေရကြောင်းနဲ့ ဝင်ငွေထိခိုက်နိုင်ကြောင်း သုံးသပ်တင်ပြချက်တွေ ပေါ်ထွက်နေတယ်လို့လည်း အသင်းချုပ်ကနေ သိရပါတယ်။

မြန်မာနိုင်ငံဟာ ပြီးခဲ့တဲ့ ၂၀၂၄-၂၀၂၅ ဘဏ္ဍာနှစ်တခုလုံးမှာ ဆန်နဲ့ ဆန်ကွဲတန်ချိန် ၂ ဒသမ ၄၈ သန်းကျော် တင်ပို့မှုကနေ ပို့ကုန်ဝင်ငွေအဖြစ် အမေရိကန်ဒေါ်လာ ၁ ဒသမ ၁၂၉ ဘီလီယံ ရရှိခဲ့ပါတယ်။

အခုဘဏ္ဍာနှစ်မှာတော့ဆန်နဲ့ဆန်ကွဲ တန်ချိန် ၃ သန်းထိ တင်ပို့ဖို့ လျာထားပြီးလက်ရှိ ၅ လအတွင်းမှာ တန်ချိန် ၁ သန်းကျော်၊ ရာခိုင်နှုန်းအနေနဲ့ ၃၅ ရာခိုင်နှုန်း‌ကို တင်ပို့ထားပြီးဖြစ်ပါတယ်။

ပြီးခဲ့တဲ့ နှစ်ကာလတူထက် တန်ချိန် ၃ သိန်း ကျော် တိုးတတ် တင်ပို့ထားနိုင်ပေမဲ့ ဝင်ငွေပိုင်းမှာတော့ မနှစ်က ကာလတူထက်ဒေါ်လာ ၂ သန်းသာပိုမိုရရှိထားတာ တွေ့ရပါတယ်။

လက်ရှိမှာ နိုင်ငံတကာ ဆန်စပါးဈေးကွက်ကျဆင်းနေသလို ပြည်တွင်း ဆန်စပါး ဈေးကွက်လည်း ကျဆင်းနေတဲ့အတွက် မိုးစပါးပေါ်ချိန် တောင်သူတွေဆီက သင့်တင့်မျှတတဲ့ ဈေးနဲ့ဝယ်ယူပေးဖို့ လည်းမြန်မာနိုင်ငံ ဆန်စပါးအသင်းချုပ်က ဧရာဝတီတိုင်းက အသင်းဝင် ပို့ကုန်တင်ပို့တဲ့ ကုမ္ပဏီတွေကို တိုက်တွန်းထားပါတယ်။