ထိုင်ဝမ်ဟာ အမေရိကန်ကုမ္ပဏီတခုနဲ့ ပူးပေါင်းထုတ်လုပ်မယ့် ပထမဆုံးဒုံးကျည်ကို စက်တင်ဘာ ၁၇ ရက်မှာ ထုတ်ဖော်ပြသခဲ့ပါတယ်။

ထိုင်ဝမ်အစိုးရနဲ့ အမေရိကန်အစိုးရတို့ကြား ကာကွယ်ရေးပူးပေါင်းဆောင်ရွက်မှု အရှိန်အဟုန်နဲ့ တိုးတက်နေတဲ့ အစိုးရနှစ်ရပ်ဟာ တရုတ်စစ်တပ်ရဲ့ ခြိမ်းခြောက်မှုကို တန်ပြန်ဖို့ ဆောင်ရွက်နေတာပါ။

ဒီမိုကရက်တစ်နည်းနဲ့ အုပ်ချုပ်နေတဲ့ ထိုင်ဝမ်ကျွန်းဟာ သူ့ကို ပိုင်နက်အဖြစ် ရှုမြင်တဲ့ တရုတ်နိုင်ငံနဲ့ အပြိုင် လက်နက်ကိုင်တပ်ဖွဲ့တွေ အားကောင်းစေဖို့ လုပ်ဆောင်နေပါတယ်။

တရုတ်က စစ်ရေးစွမ်းရည်ပြပွဲတွေ ဆင်နွှဲတာ၊ ထိုင်ဝမ်ကျွန်းနားက ကောင်းကင်ယံနဲ့ ရေပြင်ထဲကို စစ်လေယာဉ်တွေနဲ့ စစ်သင်္ဘောတွေ ပုံမှန်စေလွှတ်တာ အပါအဝင် စစ်ရေးဖိအားပေးတာတွေကို မြှင့်တင်နေပါတယ်။

ထိုင်ပေ အာကာသနဲ့ ကာကွယ်ရေး နည်းပညာပြပွဲမှာ စစ်တပ်ပိုင် အမျိုးသား ချွန်းရှန်း သိပ္ပံနဲ့ နည်းပညာတက္ကသိုလ် (NCSIST) ဟာ အမေရိကန် ကာကွယ်ရေးနည်းပညာလုပ်ငန်း အန်ဒူရယ် အင်ဒပ်စထရီက အလိုအလျောက် စီမံခန့်ခွဲနိုင်ပြီး ဘာရာခူဒါ-၅၀၀ လို့ နာမည်ပေးထားတဲ့ တန်ဖိုးနည်း ခရုဇ်ဒုံးကျည်ကို ပြသခဲ့ပါတယ်။

နည်းပညာလွှဲပြောင်းမှုကတဆင့် NCSIST ဟာ စစ်သင်္ဘောတွေကို အုပ်စုဖွဲ့တိုက်ခိုက်ဖို့ ဒီဇိုင်းထုတ်ထားတဲ့ ဉာဏ်ရည်ထက်မြက်တဲ့ ဒုံးကျည်ကို ထိုင်ဝမ်မှာ အမြောက်အမြားထုတ်လုပ်ဖို့ စီစဉ်နေပါတယ်။

ထုတ်လုပ်မှုအချိန်ဇယားနဲ့ ပမာဏတို့လို အသေးစိတ် အချက်အလက်တွေကို ကမ်းလှမ်းဖို့ကိုတော့ ငြင်းဆိုခဲ့ပါတယ်။

ထိုင်ဝမ်ဟာ ၂၀၃၀ ခုနှစ်မှာ သူ့ GDP ရဲ့ ၅ ရာခိုင်နှုန်းကို ကာကွယ်ရေးအတွက် သုံးဖို့ ရည်မှန်းချက် ထားရှိပြီး လာမယ့်နှစ်မှာ ၃ ဒသမ ၃ ရာခိုင်နှုန်းအထိ သုံးဖို့ ရည်မှန်းထားပါတယ်။

အမေရိကန်သာမက နိုင်ငံတကာရဲ့ ပံ့ပိုးကူညီမှုတွေ ပိုရဖို့ကိုလည်း စိတ်အားထက်သန်နေပါတယ်။

Source: Reuters