စစ်ကောင်စီဟာ ၂၀၂၅ ခုနှစ် ဇူလိုင်လ ၃၁ ရက်နေ့မှာ စစ်ကော်မရှင်အဖြစ် ပြောင်းလဲဖွဲ့စည်းကာ တရားဝင်မှုရရှိဖို့ အထွေထွေရွေးကောက်ပွဲ ကျင်းပဖို့ ပြင်ဆင်နေပြီး “စစ်တပ်ကို အကျိုးပြုမည့် လူနှင့် ပါတီရွေးချယ်ပွဲ” ကို ပြည်သူလူထု တရပ်လုံးက အကြမ်းမဖက်သောနည်းနဲ့ ဆန့်ကျင်ကြဖို့ ကရင်အမျိုးသားအစည်းအရုံး (KNU) က ဩဂုတ် ၂၆ ရက်မှာ ထုတ်ပြန်ထားပါတယ်။
အာဏာသိမ်း စစ်ကော်မရှင်က ပြုလုပ်မယ့် အထွေထွေရွေးကောက်ပွဲဟာ ဥပဒေကြောင်းအရ တရားဝင်မှုမရှိခြင်း၊ ပြည်သူအားလုံးပါဝင်နိုင်တဲ့ အခြေအနေမှာ မရှိဘဲ လိုသလို အဖြေထုတ်နိုင်တဲ့ လုပ်ငန်းစဉ်ကြောင့် ရွေးကောက်ပွဲကို KNU က လက်မခံနိုင်ဘူးလို့ ထုတ်ပြန်ချက်မှာ ပါရှိပါတယ်။
ဒီရွေးကောက်ပွဲဟာ စစ်အာဏာရှင်စနစ်ကို သက်ဆိုးရှည်ရုံအတွက်သာဖြစ်ပြီး လက်ရှိနိုင်ငံရေး အကျပ်အတည်းအတွက် အဖြေမဟုတ်ဘဲ နိုင်ငံတွင်း ပဋိပက္ခကို ပိုပြင်းထန်လာစေမှာပြီး ဒေသတွင်း မတည်ငြိမ်မှုကိုပါ ဆက်လက်ဖြစ်လာစေမှာပါ။
ရွေးကောက်ပွဲကျင်းပဖို့ ကြိုးပမ်းတာဟာ အာဆီယံ ဘုံသဘောတူညီချက် ၅ ရပ်ကို မျက်ကွယ်ပြုတဲ့ အတုအယောင်ရွေးကောက်ပွဲသာဖြစ်ပြီး နိုင်ငံရေးပါတီတွေက အတုအယောင်ရွေးကောက်ပွဲမှာ ပါဝင်တာဟာ အနာဂတ် ဖက်ဒရယ် ဒီမိုကရေစီစနစ်သစ် တည်ဆောက်မှုအတွက် အဟန့်အတားဖြစ်စေမှာ ဖြစ်ပါတယ်။
ဒါကြောင့် စစ်ကောင်စီက ကျင်းပမယ့် ရွေးကောက်ပွဲကို ကရင်အမျိုးသားလူထု၊ ကရင်လက်နက်ကိုင်အဖွဲ့အစည်း၊ ကရင်နိုင်ငံရေးအင်အားစု အပါအဝင် နိုင်ငံရေးပါတီနဲ့ ပြည်သူတရပ်လုံးက မပါဝင်ဖို့ KNU က တိုက်တွန်းထားပါတယ်။
အာဏာသိမ်းစစ်တပ်က ကျင်းပမယ့် ရွေးကောက်ပွဲဟာ တရားမဝင်တဲ့ အကြောင်းနဲ့ အတုအယောင် ရွေးကောက်ပွဲ ဖြစ်တယ်လို့ အမျိုးသားညီညွတ်ရေးအစိုးရ (NUG) နဲ့ တော်လှန်ရေးအင်အားစုတွေကလည်း ထုတ်ပြန်ထားပါတယ်။
