အာဏာသိမ်းစစ်တပ် လက်အောက်မှာ ဆက်လက်တာဝန်ထမ်းဆောင်နေတဲ့ Non-CDM ဝန်ထမ်းမိသားစုဝင်တွေကို ဌာနတခုကို လူနှစ်ယောက်နှုန်းနဲ့ စစ်မှုထမ်းဖို့ စေခိုင်းခံနေရကြောင်း ဝန်ထမ်းတွေဆီက သိရပါတယ်။
ဩဂုတ်လ တတိယပတ်ထဲမှာ ရန်ကုန်က လျှပ်စစ်ဝန်ထမ်း မိသားစုတွေ နေထိုင်တဲ့ ဝန်ထမ်းအိမ်ရာဝင်းထဲက လူငယ် ၂ ယောက်ကို စစ်မှုထမ်းကို လာရောက်ခေါ်ယူသွားကြောင်း ဝန်ထမ်းတယောက်က ပြောပါတယ်။
“ဝန်ထမ်းတွေရဲ့ မိသားစုဝင်တွေပါ စစ်မှုထမ်းအင်အား ပေးနေရပြီ။ ကိုယ့်ဌာနမှာဆိုရင် ခွဲတမ်း တဌာနကို ၂ ယောက်ပေးရတယ်။ တခြားဌာနတွေဆိုလည်း အဲဒီအတိုင်းပဲ ပေးနေရတယ် ပြောတယ်။ အခုက အသက် ၁၈ ပြည့်တာ မပြည့်တာ၊ ကျောင်းသားလား ဘာလား၊ ဝန်ထမ်းဟုတ်တာ မဟုတ်တာ ဆိုတာတွေနဲ့ မသက်ဆိုင်တော့ဘူး။ မအလရဲ့ သေစားသေစေအမိန့်နဲ့ အခုတော့ အိမ်ရာဝင်းထဲက ကလေး ၂ ယောက် ပါသွားပြီ။”
နေရာနဲ့ ဌာနခွဲ အတိအကျကို လုံခြုံရေးအရ ဖော်ပြဖို့ခက်ခဲပေမဲ့ စစ်မှုထမ်းဖို့ ခွဲတမ်းနဲ့ ကောက်ခံနေတာ မှန်ကန်ကြောင်း DVB က သက်သေအထောက်အထား ရရှိထားပြီးဖြစ်ပါတယ်။
စစ်မှုထမ်းဥပဒေ အသက်သွင်းပြီး မကြာခင်မှာပဲ စစ်မှုထမ်းဖို့ တပ်သားသစ်တွေ အတင်းအကျပ် စုဆောင်းနေချိန်ကတည်းက ဝန်ထမ်းတွေရဲ့ မိသားစုဝင်တွေပါ စစ်မှုထမ်းဖို့ စေခိုင်းခံရတာ ဖြစ်တယ်လို့လည်း သိရပါတယ်။
အများစုကိုတော့ လုပ်ငန်းခွင် ရာထူးတိုး မက်လုံးပေးတာမျိုးတွေနဲ့ ဆွဲဆောင်တဲ့အတွက် မိသားစုဝင်တွေရဲ့ သဘောဆန္ဒနဲ့ စစ်မှုထမ်းဖို့ ရွေးချယ်ခဲ့ကြတာတွေလည်း ရှိတယ်လို့ လက်ရှိ တာဝန်ထမ်းဆောင်နေတဲ့ ဝန်ထမ်းတယောက်ကလည်း ပြောပါတယ်။
“တဌာနကို ၂ ယောက်နှုန်းနဲ့ ခေါ်ယူနေတယ် ဆိုတာကတော့ အဲဒီလိုသတင်းမျိုးတော့ မကြားဘူး။ ဒါပေမဲ့ အရင်ကတည်းကတော့ ဝန်ထမ်းမိသားစုဝင်တွေထဲကနေ ပေးကိုပေးရမယ် ဆိုတာမျိုးတွေတော့ ကြားတယ်၊ တကယ်လည်း ခေါ်ခဲ့တယ်ပေါ့။ ဒီစစ်တပ်ကကျ သူတို့သားသမီးတွေ ပါမှာ ကြောက်တာ၊ နောက် ဝန်ထမ်း ထွက်တာတွေဘာတွေ လုပ်မှာစိုးတဲ့အတွက် လှုပ်သွားမှာစိုးလို့ သတင်းမထွက်တာလည်း ပါတယ်ပေါ့။ အပတ်စဉ် ၅၊ ၆၊ ၇ လောက်ကတည်းက ဒါတွေက ခေါ်နေတာ။ ဝန်ထမ်းမိသားစုဝင်တွေကိုပဲ ပတ်ပြီးတော့ ခေါ်နေတာ။ ဝန်ထမ်းတွေကို ရာထူးတိုးပေးတာမျိုး၊ သူတို့လိုချင်တဲ့နေရာကို ရွှေ့ပြောင်းပေးတာမျိုးတွေ အဲဒီလိုလုပ်တာမျိုးတွေ ရှိတဲ့အတွက် တချို့ဝန်ထမ်းတွေက အသံမထွက်တာလည်း ပါတာပေါ့။”
လက်ရှိမှာတော့ စစ်မှုထမ်းအပတ်စဉ် ၁၆ အတွက် တပ်သားသစ်တွေ စုဆောင်းကာ သက်ဆိုင်ရာ သင်တန်းကြောင်းတွေဆီ ပို့ဆောင်နေပြီဖြစ်ပြီး အမျိုးသမီးစစ်မှုထမ်း အပတ်စဉ် ၁ ကိုလည်း စတင်ဖွင့်လှစ်နေ ပါတယ်။
ဝေဝေ
