နေရပ်စွန့်ခွာ ပြည်သူတွေအတွက် ဒေသခံတွေဦးဆောင်တဲ့ နယ်စပ်ဖြတ်ကျော် အကူအညီတွေ ရရှိဖို့ ဇွန် ၂၀ ရက် ကမ္ဘာ့ဒုက္ခသည်များနေ့မှာ အရပ်ဘက်အဖွဲ့ ၁၂၂ ဖွဲ့က ပူးတွဲကြေညာချက်တစောင် ထုတ်ပြန်ခဲ့ပါတယ်။

အိမ်နီးချင်းနိုင်ငံတွေအနေနဲ့ နေရပ်စွန့်ခွာ ပြည်သူတွေကို ရှေ့တန်းမှာ လှုပ်ရှားနေကြတဲ့ လူသားချင်းစာနာထောက်ထားမှု အကူအညီပေးနေသူတွေကို နယ်စပ်ဖြတ်ကျော် လမ်းကြောင်းတွေကို အသုံးပြုခွင့်ပေးဖို့ တောင်းဆိုလိုက်ပါတယ်။

နိုင်ငံတကာ အသိုက်အဝန်းနဲ့ အိမ်နီးချင်းနိုင်ငံတွေအနေနဲ့ နေရပ်စွန့်ခွာသူတွေကို အတင်းအကျပ် နေရပ်ပြန်မပို့ရေး မူဝါဒကို လေးစားလိုက်နာကာ တရားလက်လွတ် ဖမ်းဆီးတာ၊ အတင်းအကျပ် ပြန်ပို့တာနဲ့ ပြည်နှင်ဒဏ်ပေးတာတွေကို ရပ်တန့်ဖို့နဲ့ မြန်မာပြည်သူတွေကို ဥပဒေအရ အကာအကွယ်ပေးဖို့ ပါရှိပါတယ်။

စစ်ကောင်စီဟာ နေရပ်စွန့်ခွာ ထွက်ပြေးနေရသူ IDP စခန်းတွေ၊ စာသင်ကျောင်း၊ ဆေးဘက်ဆိုင်ရာ အဆောက်အအုံ၊ သာသနိကနယ်မြေတွေကို ပစ်မှတ်ထားကာ တိုက်ခိုက်နေတယ်လို့ သိရပါတယ်။

၂၀၂၁ ခုနှစ် စစ်အာဏာာသိမ်းချိန်ကစလို့ လက်ရှိအချိန်အထိ ပြည်တွင်းမှာ နေရပ်စွန့်ခွာ ထွက်ပြေးနေရသူ ၂ ဒသမ ၈ သန်းကျော် ရှိလာပြီဖြစ်တဲ့အတွက် နိုင်ငံတကာ အသိုက်အဝန်း အနေနဲ့ စစ်ကောင်စီရဲ့ အကြမ်းဖက်မှုတွေ ရပ်တန့်ဖို့အတွက် အရေးယူဆောင်ရွက်မှုတွေ လုပ်ဆောင်ဖို့ တောင်းဆိုထားပါတယ်။