မြန်မာပြည်သူတွေအတွက် လူသားချင်းစာနာထောက်ထားမှု အကူအညီတွေ ပေးဖို့နဲ့ ရေရှည်တည်တံ့တဲ့ ရပ်ရွာဖွံ့ဖြိုးတိုးတက်မှုတွေ တည်ဆောက်ဖို့အတွက် အာရှဖွံ့ဖြိုးရေးရန်ပုံငွေ (ADF) ကနေ အမေရိကန်ဒေါ်လာ သန်း ၁၀၀ တန်ဖိုးရှိတဲ့ အကူအညီတွေပေးဖို့ အတည်ပြုလိုက်ပြီလို့ အာရှဖွံ့ဖြိုးရေးဘဏ် (ADB) က ထုတ်ပြန်ပါတယ်။
မတ် ၂၈ ရက်က မြန်မာနိုင်ငံမှာ လှုပ်ခတ်ခဲ့တဲ့ ပြင်းအား ၇ ဒသမ ၇ ရှိတဲ့ ငလျင်အပြီး အရေးပေါ်ကယ်ဆယ်ရေးအတွက် အမေရိကန်ဒေါ်လာ ၃ သန်းကို ထောက်ပံ့ခဲ့ပြီးနောက် အခုလို အမေရိကန်ဒေါ်လာ သန်း ၁၀၀ အကူအညီ ထပ်ပေးဖို့ ဆုံးဖြတ်လိုက်တာလည်း ဖြစ်ပါတယ်။
ADB ဥက္ကဋ္ဌ မာဆာတို ကန်ဒါက “ဒီ ဒေါ်လာ သန်း ၁၀၀ တန်ဖိုးရှိတဲ့ အကူအညီဟာ ADB က မြန်မာပြည်သူတွေအတွက် ပေးအပ်ခဲ့ဖူးသမျှ အကြီးဆုံး ထောက်ပံ့ငွေဖြစ်ပြီး အစားအသောက်၊ ရေ၊ အမိုးအကာနဲ့ ဆေးဝါးကုသမှုတွေကို အရေးပေါ်လိုအပ်နေတဲ့ မိသားစုတွေဆီ ပေးပို့သွားမှာ ဖြစ်သလို ရေရှည်စားဝတ်နေရေး၊ အလုပ်အကိုင်နဲ့ ရပ်ရွာတွေရဲ့ ပြန်လည်နာလန်ထူနိုင်စွမ်းကိုလည်း ပံ့ပိုးပေးသွားမှာပါ” လို့ ပြောပါတယ်။
ADB က အရေးပေါ်အမိုးအကာ၊ ရေနဲ့ မိလ္လာစနစ်ဝန်ဆောင်မှုတွေ၊ အစားအသောက်၊ အမျိုးသမီးတွေအတွက် မရှိမဖြစ်လိုအပ်တဲ့ ကျန်းမာရေးပစ္စည်းတွေနဲ့ စိတ်ဒဏ်ရာကုသမှုတွေကို ပံ့ပိုးပေးသွားမှာဖြစ်ပြီး ယာယီသင်ကြားရေးနေရာတွေ ပြုပြင်တာ၊ ရပ်ရွာစာကြည့်တိုက်တွေ အတွက် ပစ္စည်းတွေ ဖြည့်ဆည်းပေးတာ၊ ပညာပေးသူတွေ လေ့ကျင့်ပေးတာနဲ့ ငွေသားနဲ့ ပစ္စည်းအကူအညီ နှစ်မျိုးလုံးကို ပေးအပ်တာတွေ ပြုလုပ်သွားမယ်လို့ သိရပါတယ်။
မတ်လ ငလျင်မလှုပ်ခင်တုန်းက မြန်မာနိုင်ငံမှာ လူပေါင်း ၄ ဒသမ ၃ သန်းဟာ အရေးပေါ်အကူအညီနဲ့ လူမှုကာကွယ်စောင့်ရှောက်မှုတွေ လိုအပ်နေတယ်လို့ ကုလသမဂ္ဂက ခန့်မှန်းထားခဲ့ပါတယ်။ ငလျင်လှုပ်ပြီးနောက်မှာတော့ အဲဒီအရေအတွက်ဟာ ၆ ဒသမ ၃ သန်းအထိ မြင့်တက်လာခဲ့ပါတယ်။
ပြီးခဲ့တဲ့ မတ်လအတွင်းက လှုပ်ခတ်ခဲ့တဲ့ ငလျင်ကြောင့် မြန်မာနိုင်ငံရဲ့ စီးပွားရေး၊ ကုန်ထုတ်လုပ်မှု ထိခိုက်ခဲ့ရပြီး ၂၀၂၅-၂၀၂၆ ဘဏ္ဍာနှစ်မှာ စုစုပေါင်း ပြည်တွင်းအသားတင်ထုတ်လုပ်မှုတန်ဖိုး GDP ဟာ ၂ ဒသမ ၅ ရာခိုင်နှုန်း ကျဆင်းမယ်လို့လည်း ကမ္ဘာ့ဘဏ်က ခန့်မှန်းထားပါတယ်။
ဒါ့အပြင် အာဏာသိမ်းပြီးကတည်းက ဖြစ်ပွားနေတဲ့ ပဋိပက္ခတွေ၊ နိုင်ငံရေး မတည်ငြိမ်မှုတွေကြောင့် ခိုင်မာအားကောင်းမှုနည်းနေတဲ့ မြန်မာနိုင်ငံရဲ့ စီးပွားရေးအခြေအနေဟာ ငလျင်ကြောင့် အထိနာခဲ့ပြီး ကိုဗစ်-၁၉ ကာလမတိုင်ခင်က စီးပွားရေးအခြေအနေအောက် ၁၃ ရာခိုင်နှုန်း လျော့ကျမယ်လို့လည်း ကမ္ဘာ့ဘဏ်က ခန့်မှန်းထားပါတယ်။
