ရှမ်းပြည်နယ်နဲ့ ကရင်နီနယ်စပ်၊ ဖယ်ခုံမြို့နယ် အနောက်ဘက်ခြမ်းက လအိကျေးရွာကို စစ်ကောင်စီတပ်က ဇွန် ၁၆ ရက်မှာ အသေခံဒရုန်း ၂ စင်းနဲ့ တိုက်ခိုက်ခဲ့လို့ စာသင်နေတဲ့ ကလေးငယ် ၂ ယောက်ထိခိုက်သွားတယ်လို့ ဒေသခံတွေက ပြောပါတယ်။

ဇွန် ၁၆ ရက် မနက် ၁၀ နာရီကျော်မှာ အသေခံဒရုန်း ၂ စင်းက ပရဟိတ ဘုန်းတော်ကြီး စာသင်ကျောင်းမှာ ကျရောက်ပေါက်ကွဲပြီး မူလတန်း ကလေးငယ် ၂ ယောက်ထိခိုက်ကာ ကျောင်းက မှန်နဲ့ အဆောက်အအုံအနည်းငယ်ထိခိုက်မိတယ်လို့ သိရပါတယ်။

ဒေသခံတယောက်က “ကလေးနှစ်ယောက် ထိတယ် မစိုးရိမ်ရဘူး။ ရွာလယ်တည့်တည့်က ဘုန်းကြီးကျောင်းနဲ့ စာသင်ကျောင်းကပ်လျက်ရှိတဲ့ နေရာလေးကို ကျတာ”လို့ ပြောပါတယ်။

အသေခံဒရုန်းနဲ့ မတိုက်ခိုက်ခင်မှာလည်း လက်နက်ကြီးနဲ့က ၄ ၊ ၅ ကြိမ် ပစ်ခတ်တာတွေရှိနေပြီး အသေခံဒရုန်းနဲ့ပစ်ချိန်မှာ ထိခိုက်မိတာ ဖြစ်ပါတယ်။

လအိကျေးရွာက တိုက်ပွဲဖြစ်ပွားမှုမရှိဘဲ ဒေသခံနဲ့ စစ်ဘေးရှောင်အချို့ နေထိုင်တဲ့နေရာဖြစ်ပေမဲ့ စစ်ကောင်စီတပ်က အသေခံဒရုန်းတွေနဲ့ တိုက်ခိုက်နေလို့ ပြည်သူတွေ စိုးရိမ်နေကြပါတယ်။

ကရင်နီပြည် ကြားကာလအုပ်ချုပ်ရေးကောင်စီ IEC အတွင်းရေးမှူး ၂ ဦးဗညားက “အဲဒီနေရာက ကလေးတွေ စာသင်နေတဲ့ကျောင်းဖြစ်တယ်၊ ကျောင်းက စာသင်တယ်၊ နောက် ခိုလှုံတဲနေရာ ဖြစ်တယ်ပေါ့နော်၊ အဲဒါကို ရည်ရွယ်ချက်ရှိရှိ စစ်တပ်ကနေ အသေခံဒရုန်းနဲ့ တိုက်ခိုက်တယ် ဆိုတာက စစ်ရာဇဝတ်မှုရော၊ လူသားမျိုးနွယ်စုအပေါ်မှာရော ကျူးလွန်တဲ့ ရာဇဝတ်မှုဖြစ်တယ်” လို့ ပြောပါတယ်။

ပြီးခဲ့တဲ့ မတ် ၄ ရက်ကလည်း ကရင်နီပြည်နယ်ထဲက ဒီးမော့ဆို အနောက်ဘက်ခြမ်းကို အသေခံဒရုန်းနဲ့ တိုက်ခိုက်ခဲ့လို့ တဲအိမ်တလုံး ထိခိုက်ပျက်စီးခဲ့ပါတယ်။