ထိုင်း-မြန်မာနယ်စပ်၊ ထားဝယ်မြို့နယ်ရှိ စစ်ကောင်စီရဲ့ ဘောတိစခန်း (ခေါ်) ပွိုင့် ၂၅၆၆ ရှေ့တန်းစခန်းကို ကရင်အမျိုးသားကာကွယ်ရေးတပ်ဖွဲ့ (KNDO) နဲ့ တော်လှန်ရေး ပူးပေါင်းတပ်ဖွဲ့တွေက သိမ်းပိုက်ခဲ့တယ်လို့ KNU မြိတ်-ထားဝယ်ခရိုင် အတွင်းရေးမှူး ပဒိုစောအယ်နားက ပြောပါတယ်။
ဘောတိစခန်းကို ဇွန် ၈ ရက်မှာ စတင်တိုက်ခိုက်ခဲ့ပြီး ဇွန် ၁၀ ရက် မနက်ပိုင်းမှာ အောင်မြင်စွာ သိမ်းပိုက်နိုင်ခဲ့တယ်လို့ ပဒိုစောအယ်နားနဲ့ ရဲဘော်တွေက ပြောပါတယ်။
KNU မြိတ်-ထားဝယ်ခရိုင် အတွင်းရေးမှူး ပဒိုစောအယ်နားက “အဲဒီစခန်းမှာ စကစအင်အား ၄၀ လောက်ရှိမယ်။ စခန်းသိမ်းပြီးနောက်ပိုင်းမှာ စကစတပ်သားတွေ အကုန်လုံး ထိုင်းဘက် ထွက်ပြေးသွားတယ်။ စခန်းထဲမှာတော့ စကစဘက်က အလောင်း ၂ လောင်းတော့ ကျန်တယ်” လို့ ပြောပါတယ်။
အဲဒီစခန်းသိမ်းတိုက်ပွဲမှာ လက်နက်အနည်းငယ်ရရှိပြီး တချို့လက်နက်ကိုတော့ ထွက်ပြေးသွားတဲ့ စစ်သားတွေ ယူဆောင်သွားကာ စကစဘက်က ဖျက်ဆီးထားတဲ့ လက်နက်တွေလည်းရှိပြီး အသေးစိတ်ကိုတော့ မသိသေးဘူးလို့ ပဒိုစောအယ်နားက ပြောပါတယ်။
နယ်စပ်မျဥ်းပေါ်မှာရှိတဲ့ ဘောတိစခန်းသိမ်းတိုက်ပွဲမှာ စစ်ကောင်စီဘက်က လေကြောင်းတိုက်ခိုက်မှု မလုပ်ပေမဲ့ ဘောတိစခန်းအနီးရှိ အမိုရွာကို ဇွန် ၉ ရက်မှာ လေကြောင်းနဲ့ တိုက်ခိုက်တာကြောင့် အရပ်သားတယောက် ထိခိုက်ဒဏ်ရာရခဲ့တယ်လို့ ဒေသခံတွေနဲ့ ရဲဘော်တွေဆီက သိရပါတယ်။
ထိုင်း-မြန်မာနယ်စပ်ရှိ ဘောတိစခန်းကို မြန်မာစစ်တပ်က ၁၉၉၇ ခုနှစ်မှာ စတင် ဝင်ရောက် တပ်စွဲခဲ့တာ ဖြစ်ပါတယ်။
