ထိုင်းနိုင်ငံ၊ မဲဆောက်မြို့မှာ E-BIKE ဘက်ထရီစက်ဘီးတွေကို ထိုင်းရဲတပ်ဖွဲ့နဲ့ ထိုင်းယာဥ်ထိန်းရဲတွေက ဖမ်းဆီးနေကြောင်း ထိုင်းရဲတပ်ဖွဲ့နဲ့ နီးစပ်သူတွေဆီကနေ သိရပါတယ်။
ဇွန် ၁ ရက်ကနေ ၇ ရက်အထိ E-BIKE စီးနင်းသူ အယောက် ၂၀ ထက်မနည်း ဖမ်းဆီးခံထားရပြီး အရည်အသွေးမမီတဲ့ E-BIKE ၅ စီးကိုတော့ အပြီးအပိုင် ဖမ်းဆီးသိမ်းလိုက်တယ်လို့ ဆိုပါတယ်။
E-BIKE စီးနင်းလို့ ဖမ်းဆီးခံခဲ့ရတဲ့ မြန်မာနိုင်ငံသားတယောက်က “ကြိုတင်အသိပေးတာ မရှိဘူး၊ လမ်းပြောင်းပြန်လည်း မဟုတ်ဘူး၊ သတ်မှတ်ထားတဲ့ ယာဥ်စည်းကမ်း လမ်းစည်းကမ်းနဲ့အညီ မောင်းနှင်တယ်။ အဲဒါကို ဖမ်းခံထိတာ၊ ဒဏ်ငွေ ဘတ် ၁,၀၀၀ ပေးခဲ့ရတယ်။ ဟိုင်းဝေးလမ်းမှာ E-BIKE ဘက်ထရီဘီး စီးခွင့်မရှိဘူးဆိုရင် စီးစရာနေရာက မရှိသလောက်ဘဲ၊ မဲဆောက်မြို့မှာရှိတဲ့ ဈေး၊ စာသင်ကျောင်းနဲ့ ဆေးရုံ ဆေးခန်းတွေကအစ ဟိုင်းဝေးလမ်းတွေကို ဖြတ်ပြီး သွားနေကြရတာလေ၊ မစီးရဘူးဆိုပြီး အမိန့်ထုတ်ထားတာမရှိတော့ စီးကြတာပေါ့၊ မဲဆောက်မြို့မှာ E-BIKE ဘက်ထရီဘီး စီးတဲ့လူဦးရေ အနည်းဆုံး ၅,၀၀၀ နဲ့ ၁၀,၀၀၀ ကြားရှိတယ်၊ ကလေးကျောင်းပို့တာ၊ ဆေးခန်းပြတာနဲ့ ဈေးဝယ်ရာတွေမှာ အဓိက E-BIKE ဘက်ထရီဘီးကိုပဲ စီးနေကြတာ ဆိုတော့ အရမ်းကို အခက်အခဲ ဖြစ်နေကြရပြီ” လို့ ပြောပါတယ်။
မဲဆောက်မြို့မှာ မြန်မာဘက်က တိုက်ပွဲတွေကြောင့် ခေတ္တပြောင်းရွှေ့လာကြသူတွေနဲ့ ရွှေ့ပြောင်းအလုပ်သမား အများအပြားရှိနေပြီး ယာဥ်မတော်တဆမှုတွေကြောင့် သေဆုံးခဲ့ရသူတွေရှိခဲ့ပါတယ်။
ထိုင်းအာဏာပိုင်တွေက ယာဥ်စည်းကမ်း လမ်းစည်းကမ်းတွေ တင်းကျပ်စွာ ကြေညာခဲ့တာဖြစ်ပြီး ယာဥ်စည်းကမ်း မလိုက်နာတဲ့သူတွေကို ထိထိရောက်ရောက် အရေးယူ ဆောင်ရွက်တာတွေ လုပ်ဆောင်နေပါတယ်။
