စစ်ကောင်စီရဲ့ ဖမ်းဆီးထောင်ချခံထားရတဲ့ အလုပ်သမားခေါင်းဆောင် ကိုသက်နှင်းအောင်နဲ့ အဆက်အသွယ် ပြတ်တောက်နေတာကြောင့် စိုးရိမ်စရာအခြေအနေ ဖြစ်တယ်လို့ မြန်မာနိုင်ငံ စက်မှုလက်မှုနှင့် ဝန်ဆောင်မှုလုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ် (MICS-TUsF) က အရေးပေါ် ကြေညာချက် ထုတ်ပြန်ပါတယ်။
MICS-TUsF ရဲ့ အထွေထွေအတွင်းရေးမှူးချုပ်လည်းဖြစ်တဲ့ ကိုသက်နှင်းအောင်ကို စစ်ကောင်စီက ၂၀၂၁ ဇွန်လမှာ မတရားအသင်း ဆက်သွယ်မှုနဲ့ ထောင် ၂ နှစ်နဲ့ ငွေဒဏ် ကျပ် ၂၀,၀၀၀ ချခဲ့တာဖြစ်ပါတယ်။
၂၀၂၃ ဇွန်လမှာ လွတ်ရက်စေ့လို့ လွှတ်ပေးလိုက်ပေမဲ့ ထောင်ပြင်ပမရောက်ခင်မှာတင် ပြန်ဖမ်းဆီးကာ ရန်ကုန်စစ်ခုံရုံးကနေ အလုပ်ကြမ်းနဲ့ ထောင် ၇ နှစ် ထပ်ချခဲ့တာလည်း ဖြစ်ပါတယ်။
ကိုသက်နှင်းအောင်ကို အင်းစိန်ထောင်မှာ ဖမ်းဆီးထိန်းသိမ်းထားတာဖြစ်ပြီး ဒီနှစ်ဆန်းပိုင်းအတွင်း နိုင်ငံရေးအကျဥ်းသားတွေရဲ့ အခက်အခဲ ပြဿနာတွေကို ပြောဆိုတယ်ဆိုတဲ့ အကြောင်းပြချက်နဲ့ တိုက်ပိတ်အရေးယူခံရသလို မိသားစု ထောင်ဝင်စာပို့ခွင့်ပါ ပိတ်ခံထားရတယ်လို့ MICS-TUsF တာဝန်ရှိသူတယောက်က ဆိုပါတယ်။
“အခုနောက်ပိုင်း အဆက်သွယ်မရတော့လို့ သူ့အတွက်ကို အရမ်းစိုးရိမ်နေရတာ။ မိသားစုနဲ့လည်း တွေ့ခွင့်မရတော့ ဘယ်လိုအခြေအနေဖြစ်နေလဲ မသိရဘူး။”
ကိုသက်နှင်းအောင် အနေနဲ့ ကျန်းမာရေးအခြေအနေကြောင့် ဆေးစွဲသောက်နေရပြီး အခုလို ကာလရှည် တိုက်ပိတ်ခံရတာ၊ အဆက်အသွယ် ဖြတ်ခံရတာနဲ့ ပတ်သက်လို့ စိုးရိမ်ထိတ်လန့်ရတယ်လို့ MICS-TUsF ရဲ့ ကြေညာချက်မှာ ဖော်ပြထားပါတယ်။
ဒါ့ကြောင့် ပြည်တွင်း ပြည်ပက မိတ်ဖက်အဖွဲ့အစည်းတွေအနေနဲ့ ကိုသက်နှင်းအောင်ကို ခြွင်းချက်မရှိ ပြန်လွှတ်ပေးရေးအတွက် ဝိုင်းဝန်းကူညီပေးဖို့နဲ့ ဖိအားပေး တောင်းဆိုပေးဖို့ကိုလည်း အဲဒီအလုပ်သမားအဖွဲ့ချုပ်က တိုက်တွန်းထားပါတယ်။
ကိုသက်နှင်းအောင် အပါအဝင် ဖမ်းဆီးထိန်းသိမ်းခံထားရတဲ့ အလုပ်သမားအရေး လှုပ်ရှားသူတွေကို ပြန်လွှတ်ပေးဖို့ အပြည်ပြည်ဆိုင်ရာ အလုပ်သမားရေးရာအဖွဲ့ (ILO) နဲ့ ကမ္ဘာ့အလုပ်သမား အဖွဲ့အစည်းတွေကလည်း အစဥ်တစိုက် တောင်းဆိုထားပါတယ်။
