ရီးရဲလ်မက်ဒရစ်အသစ်ကို အနိုင်ရပြီး ဆီမီးဖိုင်နယ်တက်သွားတဲ့ အာဆင်နယ်အသင်းဟာ အခုနှစ် ဥရောပချန်ပီယံလိဂ်ပြိုင်ပွဲမှာ ချန်ပီယံဖြစ်ဖို့ ရေပန်းအစားဆုံးအသင်း ဖြစ်လာခဲ့ပါတယ်။
အချက်အလက်စုဆောင်းရေး ဝက်ဘ်ဆိုက်တခုဖြစ်တဲ့ Opta Analyst ရဲ့ ဖော်ပြချက်အရ အာဆင်နယ်အသင်းက ဆီမီးဖိုင်နယ်ရောက် ၄ သင်းထဲမှာ ချန်ပီယံဖြစ်ဖို့ ရာခိုင်နှုန်းအများဆုံး အသင်းအဖြစ် သတ်မှတ်ခံခဲ့ရတာပါ။
Opta ရဲ့ စူပါကွန်ပျူတာနဲ့ လေ့လာတွက်ချက်မှုအရ အာဆင်နယ်အသင်းက ချန်ပီယံဖြစ်ဖို့ ၂၈ ဒသမ ၇ ရာခိုင်နှုန်းနဲ့ အများဆုံးဖြစ်ပြီး အင်တာမီလန်က ၂၅ ဒသမ ၅ ရာခိုင်နှုန်းနဲ့ ဒုတိယနေရာမှာ သတ်မှတ်ခံရပါတယ်။
ပီအက်စ်ဂျီအသင်းက ချန်ပီယံဖြစ်ဖို့ ၂၄ ရာခိုင်နှုန်းနဲ့ ဘာစီလိုနာက ချန်ပီယံဖြစ်ဖို့ ၂၁ ဒသမ ၈ ရာခိုင်နှုန်း သတ်မှတ်ခံရပါတယ်။
စူပါကွန်ပျူတာရဲ့ တွက်ချက်ပုံအရ အသင်းတသင်းရဲ့ သမိုင်းအစဉ်အလာနဲ့ နောက်ဆုံးပွဲစဉ်တွေက စွမ်းဆောင်ရည်ကို အသုံးပြုပြီး ပွဲတပွဲချင်းစီရဲ့ ဖြစ်နိုင်ချေရလဒ်တွေကို တွက်ချက်ပြီး ချန်ပီယံဖြစ်ဖို့ ရာခိုင်နှုန်း သတ်မှတ်တာပါ။
အာဆင်နယ်အသင်းဟာ ချန်ပီယံလိဂ်ပြိုင်ပွဲမှာ ဗိုလ်လုပွဲတက်ခဲ့တာက အမြင့်မားဆုံး အောင်မြင်မှုဖြစ်ပြီး ချန်ပီယံ တကြိမ်တခါမှ မဖြစ်ဘူးသေးတာ ဖြစ်ပါတယ်။
