အင်အားပြင်း ငလျင်ကြောင့် အိမ်ထောင်ဦးစီး ဆုံးရှုံးပြီး သား၊ သမီး ကျန်ရှိခဲ့တဲ့ Single Mother မိခင်တွေကို ကူညီထောက်ပံ့ပေးသွားမယ်လို့ သရုပ်ဆောင်နန်းမြတ်ဖြိုးသင်းက သူ့ရဲ့ လူမှုကွန်ရက်စာမျက်နှာမှာ ကြေညာထားပါတယ်။

မိခင်တွေကို လစဉ်ငွေကျပ် ၁ သိန်းစီ ၁ နှစ်တိတိထောက်ပံ့သွားမှာဖြစ်ပြီး နန်းမြတ်ဖြိုးသင်းက  ၅ ယောက်စာ ကျပ်သိန်း ၆၀  မတည်ထောက်ပံ့ပေးဖို့စီစဉ်ထားတယ်လို့ သိရပါတယ်။

တခြားပါဝင်ချင်သူတွေလည်း လှူဒါန်းနိုင်မှာဖြစ်ပြီး တယောက်ကို တနှစ်စာရေရှည်ထောက်ပံ့ ပေးရမယ်လို့ ဆိုပါတယ်။

ငွေ ၁ သိန်းဟာ များတဲ့ ပမာဏမဟုတ်ပေမဲ့ နောက်လမှာ သုံးဖို့စာရိတ်လေးရှိမယ်ဆိုတဲ့ စိတ်လုံခြုံမှုလေးထောက်ပံ့ပေးချင်တာာကြောင့် ထောက်ပံ့ပေးမှာဖြစ်တယ်လို့ သရုပ်ဆောင် နန်းမြတ်ဖြိုးသင်းရဲ့ လူမှုကွန်ရက်မှာ ရေးသားထားပါတယ်။

မတ် ၂၈ ရက်က စစ်ကိုင်းမြို့အနီးကို ဗဟိုပြုပြီးလှုပ်ရှားခဲ့တဲ့ အင်အား ရစ်ချ်တာစကေး ၇ ဒသမ ၇ ရှိတဲ့ ငလျင်ကြီးကြောင့် မြန်မာနိုင်ငံအနှံ့ကပြည်သူ ၄၃၅၅ ယောက်သေဆုံးခဲ့တယ်လို့ DVB က ကောက်ယူရရှိထားတဲ့အချက်အလက်တွေအရ သိရပါတယ်။