ဧရာဝတီတိုင်း၊ လေးမျက်နှာမြို့နယ်၊ ဝါးတောကွင်းကျေးရွာက အမျိုးသမီးတယောက် မြေမြှုပ်မိုင်း နင်းမိပေါက်ကွဲပြီး သေဆုံးသွားတယ်လို့ ဒေသခံတွေဆီက သိရပါတယ်။
အောက်တိုဘာ ၁၈ ရက် မနက် ၁၀ နာရီလောက်က ဝါးတောကွင်းကျေးရွာမှာ နေထိုင်တဲ့ အသက် ၃၇ နှစ်အရွယ် ဒေါ်လှလှရီဟာ ကျေးရွာအနီး တောထဲကို မျှစ်သွားရှာရင်း မြေမြှုပ်မိုင်းနင်းမိခဲ့တာ ဖြစ်ပါတယ်။
ဒေသခံတယောက်က “တောထဲကို မျှစ်သွားရှာရင်း မိုင်းနင်းမိတာလို့ သိရပါတယ်။ ခန္ဓာကိုယ်တခုလုံးမှာ ဒဏ်ရာတွေရရှိပြီး သေဆုံးသွားတာပါ။ အခုလိုဖြစ်စဉ်တွေကြောင့် ဒေသခံတွေ အနေနဲ့ တောထဲသွားလာရမှာကို စိုးရိမ်နေကြရတယ်” လို့ ပြောပါတယ်။
ဝါးတောကွင်းကျေးရွာအနီးမှာ တောတောင်တွေရှိပြီး ဒေသခံတွေဟာ စားဝတ်နေရေးအတွက် တောထဲကို မျှစ်ရှာဖွေတာနဲ့ သဘာဝသစ်တောထွက်ပစ္စည်းတွေ ရှာဖွေတာတွေ ပြုလုပ်လေ့ရှိတယ်လို့ သိရပါတယ်။
အမျိုးသမီး နင်းမိခဲ့တဲ့ မြေမြှုပ်မိုင်းကို ဘယ်အဖွဲ့အစည်းက ထောင်ထားတယ် ဆိုတာကိုတော့ အတည်ပြုနိုင်ခြင်း မရှိသေးပါဘူး။
စစ်တပ်အာဏာသိမ်းပြီးနောက်ပိုင်း မြန်မာနိုင်ငံအတွင်း မြေမြှုပ်မိုင်းနင်းမိတဲ့ ဖြစ်စဉ်တွေ မကြာခဏ ဖြစ်ပွားနေပြီး အရပ်သားတွေ ထိခိုက်သေဆုံးမှုတွေလည်း ရှိနေတယ်လို့ သိရပါတယ်။
