ဧရာဝတီတိုင်း၊ လေးမျက်နှာ၊ အင်္ဂပူနဲ့ ကွင်းကောက် မြို့နယ်တွေက စစ်ရှောင် ၂၀၀၀ လောက် ဟင်္သာတမြို့နယ်ထဲကို မတ် ၂၀ ရက်ကစလို့ ရောက်ရှိလာတယ်လို့ ဒေသခံတွေက ပြောပါတယ်။

မတ်လ ဒုတိယပတ်ကစလို့ လေးမျက်နှာမြို့နယ်က ရိုးမအစပ်ရွာတွေမှာ တိုက်ပွဲတချို့ဖြစ်ပွားခဲ့ပြီး လေကြောင်း ဗုံးကြဲတာ၊ လက်နက်ကြီး ပစ်ခတ်တာတွေကြောင့် ကျေးရွာတချို့  ထိခိုက်လာလို့ ဒေသခံအများစုဟာ နီးစပ်ရာဒေသတွေဆီ မတ် ၂၀ ရက်စလို့ စစ်ရှောင်သွားကြတာ ဖြစ်ပါတယ်။

ဟင်္သာတမြို့ဒေသခံ တယောက်က “အခုရက်ထဲ စစ်ရှောင်တွေ ရောက်လာကြတယ်။ တချို့ ရပ်ကွက်အုပ်ချုပ်ရေးမှူးတွေ၊ ပျူစောထီးတွေက ဧည့်စာရင်းအကြောင်းပြပြီး ငွေတောင်းတယ်၊ တချို့ရပ်ကွက်တွေကတော့ ကူညီကြတယ်”လို့ ပြောပါတယ်။

အလားတူ မတ် ၂၆ ရက်ကလည်း အင်္ဂပူမြို့နယ် ကွင်းကောက်မြို့၊ ပိန္နဲကွင်းရွာမှာ တိုက်ပွဲ ဖြစ်ပွားခဲ့ပြီး စစ်တပ်က လက်နက်ကြီးနဲ့ပစ်တာကြောင့် ဒေသခံတွေ စစ်ရှောင်လာကြရတယ်လို့ သိရပါတယ်။ 

၂၀၂၅ ခုနှစ်အတွင်း   ပုသိမ်၊ သာပေါင်း၊ ငသိုင်းချောင်း၊ လေးမျက်နှာနဲ့ အင်္ဂပူမြို့နယ်တွေမှာ  အာရက္ခတပ်တော် (AA) ပူးပေါင်းတပ်နဲ့ အာဏာသိမ်းစစ်တပ်တို့ တိုက်ပွဲတွေ ဖြစ်လာတာပါ။