ကရင်နီ (ကယား) ပြည်နယ်မှာရှိတဲ့ အမှတ် ၆ ဗျူဟာအတွင်းက KNDF တပ်ရင်း ၅ တာဝန်ယူထားတဲ့ ရှေ့တန်းတနေရာမှာ စစ်ကောင်စီရဲ့ တပ်ဖွဲ့ဝင်တယောက်နဲ့ ပြည်သူ့စစ်မှုထမ်း ၃ ယောက်တို့ တပ်ရင်း ၅ ဆီမှာ အလင်းဝင်လာခဲ့တယ်လို့ မတ် ၂၇ ရက်က ထုတ်ပြန်ပါတယ်။
တပ်သား ၄ ယောက်က မတ် ၂၆ ရက်မှာ စစ်ကောင်စီတပ်ဆီကနေ ထွက်ပြေးလာခဲ့ပြီး MA 1 သေနတ်တလက်ကိုလည်း ယူဆောင်ကာ ဘက်ပြောင်းခိုလှုံခဲ့တယ်လို့ ဆိုပါတယ်။
KNDF တပ်ရင်း ၅ တာဝန်ရှိသူက “ပစ တွေက အပတ်စဥ် ၅ နဲ့ ၆ ကပါ။ စစ်ကောင်စီ လက်အောက်မှာ တာဝန်ထမ်းဆောင်နေတဲ့ ကျန်ရှိနေတဲ့ တပ်သားတိုင်း ပြည်သူလူထုကို မျက်နှာမူပြီး မိမိတို့နဲ့အတူ လာရောက်ပူးပေါင်းဖို့ ပြောကြားချင်ပါတယ်” လို့ ပြောပါတယ်။
စစ်ကောင်စီတပ်ရဲ့ အတင်းအဓမ္မ တပ်သားစုဆောင်းမှုကြောင့် စစ်သင်တန်းကို ရောက်နေရပြီး သင်တန်းပို့ချချိန် ထွက်ပြေးဖို့ ကြိုးစားပေမဲ့ မအောင်မြင်ဘဲ ရှေ့တန်းထိ ရောက်လာခဲ့ရာကနေ မတ် ၂၆ ရက်မှာတော့ ထွက်ပြေးလွတ်မြောက်လာတယ်လို့ သိရပါတယ်။
တော်လှန်ရေးကာလ ၄ နှစ်ကျော်အကြာမှာ စစ်ကောင်စီတပ်က တပ်သားအင်အား ချည့်နဲ့လာတဲ့အတွက် ပေါ်တာဆွဲတာ၊ မဲဖောက်ပြီး စစ်မှုထမ်းခိုင်းတာတွေအပြင် တအိမ်တယောက် မဲမနှိုက်မနေရစနစ်နဲ့ တပ်သားစုဆောင်းတာ အပတ်စဥ် ၁၂ အထိ ရှိလာပြီ ဖြစ်ပါတယ်။
ထွက်ပြေးလွတ်မြောက်လာသူ ၄ ယောက်ကို လုံခြုံတဲ့နေရာမှာ ရွှေ့ပြောင်းပေးထားပြီး စောင့်ရှောက်ပေးထားတယ်လို့ သိရပါတယ်။
မတ်လထဲမှာ ကရင်နီနဲ့ ရှမ်းပြည်ရဲ့ စစ်မျက်နှာပြင်ကနေ တပ်ရင်းအသီးသီးကို ဘက်ပြောင်းခိုလှုံလာတဲ့သူတွေလည်း အများအပြားရှိနေပြီး ကရင်နီပြည် အမျိုးသားများကာကွယ်ရေးတပ် (KNDF) ဆီမှာ အလင်းဝင်လာသူ အယောက် ၁၀၀ ကျော်ထိ ရှိတယ်လို့ တပ်ရင်းပြန်ကြားရေး တာဝန်ရှိသူက ပြောပါတယ်။
