ဧရာဝတီတိုင်း၊ ဟင်္သာတခရိုင်၊ လေးမျက်နှာမြို့နယ်မှာ စစ်ကောင်စီတပ်က ရခိုင်တိုင်းရင်းသား စစ်ဘေးရှောင် ၂ ယောက်ကို ဖမ်းဆီးထားပြီး အဆက်အသွယ်ပြတ်နေတယ်လို့ ဒေသခံတွေဆီကနေ သိရပါတယ်။
မတ် ၁၅ ရက် ည ၈ နာရီခန့်က လေးမျက်နှာမြို့နယ်၊ ကွင်းကြီးကျေးရွာအုပ်စုကို စစ်ကောင်စီတပ်က ဝင်ရောက်စီးနင်းခဲ့ပြီး အောင်ဇံကွင်းနဲ့ ဇီးပင်ကွင်းကျေးရွာက ရခိုင်တိုင်းရင်းသား စစ်ဘေးရှောင် ဦးအောင်ဝင်းနဲ့ နောက်ထပ် လူငယ်တယောက်ကို ဖမ်းဆီးထားတာလို့ ဆိုပါတယ်။
အဖမ်းခံရသူတွေနဲ့ နီးစပ်သူတယောက်က “အဖမ်းခံရတဲ့ ၂ ယောက်က ရခိုင်တိုင်းရင်းသားတွေပါ။ တိုက်ပွဲကြောင့် စစ်ရှောင်လာသူတွေ။ စစ်ကောင်စီတပ်က ၁၅ ရက်နေ့က ရွာကိုစီးနင်းပြီး ဖမ်းတာ။ AA တပ်နဲ့ ပတ်သက်တယ်ဆိုပြီး ဖမ်းဆီးခဲ့တာ” လို့ ပြောပါတယ်။
အဲဒီ အဖမ်းခံရသူတွေဟာ ဒီနေ့ မတ် ၁၇ ရက်အထိ အဆက်အသွယ်မရဖြစ်ပြီး ဘယ်မှာဖမ်းဆီးထားတယ် ဆိုတာကို မသိရသေးဘူးလို့ ဆိုပါတယ်။
စစ်ကောင်စီတပ်က အောင်ဇံကွင်းနဲ့ ဇီးပင်ကွင်းကျေးရွာက ဒေသခံ ၂ ယောက်ကို ဖမ်းဆီးခဲ့တဲ့အပြင် ရွာထဲကအိမ်တွေ AA တပ်ဖွဲ့ဝင်တွေ ဝင်ရောက်ပုန်းအောင်းနေတယ်ဆိုပြီး ဝင်ရောက်ရှာဖွေ စစ်ဆေးခဲ့သေးတယ်လို့ ဒေသခံတွေဆီက သိရပါတယ်။
