အာကာသယာဉ်မှူးတွေ လိုက်ပါလာတဲ့ အီလွန်မတ်စ်ခ်ရဲ့ SpaceX ကုမ္ပဏီက အာကာသယာဉ်ဟာ မတ် ၁၆ ရက်က နိုင်ငံတကာသစခန်း (ISS) မှာ ဆိုက်ကပ်နိုင်ခဲ့ပါတယ်။

ဘိုးအင်း အာကာသယာဉ် ချွတ်ယွင်းမှုကြောင့် သောင်တင်နေခဲ့တဲ့ အာကာသယာဉ်မှူး ၂ ယောက်လည်း ဒီယာဉ်နဲ့အတူ ကမ္ဘာမြေကို အခုအပတ်ထဲ ပြန်လည်လိုက်ပါနိုင်တော့မှာ ဖြစ်ပါတယ်။

အမေရိကန် အမျိုးသားအာကာသအေဂျင်စီ (နာဆာ) က ဘုချ်ဝီလ်မိုးရ်နဲ့ ဆူနီး ဝီလျံစ်တို့ဟာ ဘိုးအင်းကုမ္ပဏီကထုတ်တဲ့ Starliner အာကာသယာဉ်နဲ့ လိုက်ပါလာခဲ့ကြတာ ဖြစ်ပါတယ်။

ISS စခန်းမှာ ၈ ရက်နေဖို့ ရည်ရွယ်ခဲ့ပေမဲ့ Starliner ယာဉ်ရဲ့ ချွတ်ယွင်းချက်ကြောင့် ကမ္ဘာမြေ မပြန်နိုင်ဖြစ်ခဲ့ပြီး ၉ လကြာ သောင်တင်နေခဲ့တာ ဖြစ်ပါတယ်။ နောက်ပိုင်းမှာလည်း ယာဉ်ကို လူမပါဘဲ အလွတ်ပြန်လွှတ်ခဲ့ပါတယ်။

ဒါကြောင့် အီလွန်မတ်စ်ခ်ရဲ့ SpaceX ကထုတ်တဲ့ Crew Dragon ယာဉ်က အခြားယာဉ်မှူးတွေကို အာကာသစခန်းကို လာရောက်ပို့ဆောင်ချိန်မှသာ ပြန်ခွင့်ရတာ ဖြစ်ပါတယ်။

သောင်တင်နေသူ ၂ ယောက်ကို သီးခြားပြန်မခေါ်တော့ဘဲ စခန်းမှာနေတဲ့ အာကာသယာဉ်မှူးတွေ ပုံမှန်အပြောင်းအလဲလုပ်တဲ့ အစီအစဉ်နဲ့ တပါတည်းပြန်ခေါ်ဖို့ နာဆာက ဆုံးဖြတ်ခဲ့ပါတယ်။

အခု SpaceX ယာဉ် အပြန်ခရီးမှာ သောင်တင်နေသူ ၂ ယောက်နဲ့အတူ နာဆာက နောက်ထပ်တယောက်၊ ရုရှားကတယောက်ပါ ပြန်လိုက်ကြမှာ ဖြစ်ပါတယ်။

သူတို့နေရာမှာ အမေရိကန်က ၂ ယောက်၊ ရုရှားက တယောက်၊ ဂျပန်က တယောက် အစားဝင် တာဝန်ယူမှာ ဖြစ်ပါတယ်။

၂ ရက်ကြာ တာဝန်လွှဲပြောင်းမှုလုပ်ငန်းစဉ် ပြီးရင် ပြန်လာကြမှာ ဖြစ်ပေမဲ့ ကမ္ဘာမြေကို ပြန်လာဖို့ အဝင်လမ်းကြောင်းသင့်တဲ့အထိ ရက်အနည်းငယ်တော့ စောင့်ရမယ်လို့ သိရပါတယ်။

သူတို့ ၂ ယောက်စလုံးကို ဒီထက်စောစော ပြန်ခေါ်နိုင်ပေမဲ့ ‘ဘိုင်ဒင်’ ကြောင့် ရက် ၃၀၀ လောက် နေလိုက်ရတာလို့ အမေရိကန်သမ္မတ ဒေါ်နယ်ထရမ့်ပ်နဲ့ SpaceX CEO အီလွန်မတ်စ်ခ်တို့က Fox News နဲ့ အင်တာဗျူးမှာ စွပ်စွဲထားပါတယ်။

နာဆာတာဝန်ရှိသူ စတိဗ်စတစ်ချ်ကတော့ အဲဒီပြောဆိုချက်ကို ငြင်းထားပြီးတော့ ဒီလိုကြာမြင့်တာဟာ SpaceX အပါအဝင် အကုန်လုံးနဲ့ညှိပြီးမှ အကောင်းဆုံးစီစဉ်ခဲ့တာလို့ ဖြေရှင်းပါတယ်။

Source : Reuters