ရခိုင်ပြည်နယ်ရဲ့ မြို့တော် စစ်တွေမြို့နယ်မှာ မတ် ၁၁ ရက်က စစ်ကောင်စီနဲ့ အာရက္ခတပ်တော် (AA) တို့အကြား လက်နက်ကြီးတွေနဲ့ အပြန်အလှစ်ပစ်ခတ်ခဲ့ကြပြီး စစ်ကောင်စီလေတပ်က ပုဏ္ဏားကျွန်းမြို့နယ်ဘက်ကို လေကြောင်းတိုက်ခိုက်မှုတွေ ပြုလုပ်ခဲ့တယ်လို့ ဒေသခံတွေက ပြောပါတယ်။

စစ်ကောင်စီရဲ့တပ်စခန်းတွေကို AA ကလည်း လက်နက်ကြီးတွေနဲ့ပစ်ခတ်ခဲ့သလို စစ်ကောင်စီကလည်း ပုဏ္ဏားကျွန်းမြို့နယ် ကျေးရွာတွေကို ပြန်လည်ပစ်ခတ်ခဲ့တယ်လို့  စစ်တွေဒေသခံက ပြောပါတယ်။

“မနေ့ကတိုက်ပွဲက ပြင်းတယ်လို့ပြောရမယ်။ နှစ်ဖက် လက်နက်ကြီးတွေနဲ့ အပြန်အလှန် တိုက်ခိုက်ကြတာပေါ့။ စစ်ကောင်စီရဲ့ တပ်စခန်းတွေကို AA ဘက်က ပစ်ခတ်မှုရှိသလို စစ်ကောင်စီကလည်း ပုဏ္ဏားကျွန်းမြို့နယ်ဘက်ကို လက်နက်ကြီးရော၊ အတွဲလိုက်ဒုံးရော၊ လေကြောင်းနဲ့ ပါတိုက်ခိုက်ခဲ့တာ။ အရပ်သား ထိခိုက်မှုတော့ မရှိဘူး။”

စစ်တွေမြို့နယ်မှာ ဖေဖော်ဝါရီ ၂၃ နောက်ပိုင်း နှစ်ဖက် လက်နက်ကြီးပစ်ခတ်မှုတွေ ရပ်တန့်ခဲ့ရာကနေ အပြန်အလှန်ပစ်ခတ်မှုတွေ ပြန်ဖြစ်နေတာပါ။

စစ်ကောင်စီတပ်ရဲ့ အတွဲလိုက်ဒုံးတွေနဲ့ လေကြောင်းတိုက်ခိုက်မှုတွေကြောင်း ပုဏ္ဏားကျွန်းမြို့ ဦးရာဇ်တောင် စေတီအနီး ကျရောက်ပေါက်ကွဲခဲ့ပြီး၊ ကွမ်းတောင်ကျေးရွာမှာလည်း လေကြောင်းတိုက်ခိုက်မှုကြောင့် နေအိမ်တချို့ ထိခိုက်ပျက်စီးခဲ့တယ်လို့ ပုဏ္ဏားကျွန်းဒေသခံက ပြောပါတယ်။

“စစ်ကောင်စီရဲ့ ပါဒလိတ် အခြေစိုက် ခမရ ၂၃၂ တပ်ရင်းက အတွဲလိုက်ဒုံးပစ်လိုက်တာ ပုဏ္ဏားကျွန်းမြို့က ဦးရာဇ်တောင် ဘုရားမှာအနီးမှာ ၄ လုံးကျပြီး ပေါက်ကွဲခဲ့တယ်။ နောက် ကွန်းတောင်ရွာကိုလည်း ဂျက်ဖိုက်တာကနေ ပေါင်း ၅၀၀ ဗုံးနဲ့ လေကြောင်းတိုက်ခိုက်မှု ပြုလုပ်ခဲ့ပြီးတော့ အိမ်တချို့လည်း ထိခိုက်ပျက်စီးသွားတယ်။”

ကွမ်းတောင်ကျေးရွာမှာ ရွာသားတွေ စစ်ဘေးရှောင်နေကြရတာကြောင့် ထိခိုက်မှုမရှိပေမဲ့ ဦးရာဇ်တောင်စေတီအနားက ကျေးရွာတွေမှာ အရပ်သားတွေ နေထိုင်ကြတာကြောင့် စိုးရိမ်မှုတွေ မြင့်တက်နေပါတယ်။

စစ်တွေမြို့နယ်မှာ ၂၀၂၅ ခုနှစ် ဇန်နဝါရီ ၁၆ ရက်ကတည်းကစပြီး စစ်ကောင်စီတပ်နဲ့ AA တို့ တိုက်ပွဲစတင်ဖြစ်ပွားခဲ့ကြတာဖြစ်ပြီး လက်နက်ကြီးနဲ့ ပြင်းပြင်းထန်ထန်ပစ်ခတ်ခဲ့သလို၊ ဒရုန်းတွေ စနိုက်ပါတွေနဲ့လည်း အပြန်အလှန် ပစ်ခတ်မှုတွေ နေတိုင်းရှိကြနေပါတယ်။

စစ်တွေမှာ တိုက်ပွဲဖြစ်ပွားပြီးနောက် စစ်ကောင်စီတပ်က လူအင်အားတွေနဲ့ လက်နက်ခဲယမ်းတွေကို လေကြောင်း၊ ရေကြောင်းကနေ ဖြည့်တင်းနေတယ်လို့ သိရပါတယ်။

ရခိုင်ပြည်နယ်မှာ အာရက္ခတပ်တော်က မြို့နယ် ၁၄ ခု သိမ်းပိုက်ထားပြီး၊ စစ်ကောင်စီက မြို့နယ် ၃ မြို့နယ်ကိုသာ ထိန်းချုပ်နိုင်တော့ကာ  စစ်တွေနဲ့ ကျောက်ဖြူတို့မှာ တိုက်ပွဲပြင်းထန်နေပါတယ်။