စစ်ကောင်စီက ဧရာဝတီတိုင်းမှာ ပြီးခဲ့တဲ့တလအတွင်း စစ်ဘေးရှောင် ၁၀၂ ယောက်အထိ အကြမ်းဖက်အဖွဲ့ဝင်တွေလို့ စွပ်စွဲကာ ဖမ်းခဲ့တယ်လို့ စစ်ဘေးရှောင်အရေး ကူညီပေးနေသူတွေဆီက သိရပါတယ်။

ဧရာဝတီတိုင်းမှာ ပြီးခဲ့တဲ့ ဖေဖော်ဝါရီ ၁ ရက်မှ ၂၈ ရက်အထိ တလအတွင်း စစ်ဘေးရှောင် အမျိုးသား ၇၆ ယောက်၊ အမျိုးသမီး ၂၁ ယောက်၊ ကလေးငယ် ၄ ယောက်တို့ကို စစ်ကောင်စီတပ်နဲ့ ရဲတွေက ဖမ်းဆီးခဲ့တာလို့ သိရပါတယ်။

စစ်ဘေးရှောင်တွေကို ကူညီပေးနေသူတယောက်က “စစ်ရှောင်လာရင်း အဖမ်းခံရတာ များတယ်။ အဖမ်းခံရသူတွေကို PDF တွေ၊ AA တပ်ဖွဲ့ဝင်တွေလို့ စွပ်စွဲဖမ်းခဲ့တာ။ အဖမ်းခံရသူတွေက စစ်ရှောင်တွေပါ။ ကလေးတွေလည်း ပါတယ်” လို့ ပြောပါတယ်။

အဲဒီ စစ်ဘေးရှောင်တွေကို စစ်ကောင်စီတပ်နဲ့ ရဲတပ်ဖွဲ့က အကြမ်းဖက်ဥပဒေတွေနဲ့ အမှုဖွင့် အရေးယူထားတာ ရှိသလို ဘယ်ပုဒ်မနဲ့မှ အရေးယူခြင်းမရှိသေးဘဲ ဖမ်းဆီးထားတာတွေလည်း ရှိတယ်လို့ စစ်ကောင်စီတပ်နဲ့ နီးစပ်တွေဆီက သိရပါတယ်။

တိုင်းရဲတပ်ဖွဲ့နဲ့ နီးစပ်သူတယောက်က “အဖမ်းခံရသူတွေထဲ အမျိုးသားတချို့ကို အကြမ်းဖက်ဥပဒေနဲ့ အမှုဖွင့်ထားတယ်လို့ သိရတယ်။ အဖမ်းခံရသူတွေကို သက်ဆိုင်ရာ မြို့နယ်ရဲစခန်းတွေမှာ ဖမ်းဆီးထားတယ်လို့ သိရတယ်” လို့ ပြောပါတယ်။

ပြီးခဲ့တဲ့တလအတွင်း စစ်ကောင်စီက ဖမ်းဆီးခဲ့တဲ့ စစ်ဘေးရှောင် ၁၀၂ ယောက်ဟာ ငပုတော၊ သာပေါင်း၊ ရေကြည်၊ ငါးသိုင်းချောင်း၊ ကြံခင်း၊ ဟိုင်းကြီးကျွန်း၊ ငရုတ်ကောင်း၊ ပုသိမ်၊ ရွှေသောင်ယံ စတဲ့မြို့နယ်တွေကနေ အများဆုံး ဖမ်းဆီးခံခဲ့ရတာလို့ ဆိုပါတယ်။