ရှမ်းပြည်နယ်တောင်ပိုင်း၊ ဖယ်ခုံမြို့နယ်၊ မိုးဗြဲမြို့ကို စစ်ကောင်စီတပ်က အင်အား ၇၀၀ ဝန်းကျင်နဲ့ ထိုးစစ်ဆင်တိုက်ခိုက်နေတဲ့အတွက် တိုက်ပွဲတွေပြင်းထန် ဖြစ်ပွားနေတယ်လို့ မိုးဗြဲ ပြည်သူ့ကာကွယ်ရေးတပ်ဖွဲ့ထံက သိရပါတယ်။
၂၀၂၄ နှစ်ကုန်ကစပြီး စစ်ကောင်စီက မိုးဗြဲ-လွိုင်ကော်လမ်းပိုင်းကို ပြန်လည်ထိန်းချုပ်နိုင်ဖို့ အပြင်းအထန် ထိုးစစ်ဆင်နေတာမှာ ၂၀၂၅ နှစ်ဆန်းပိုင်းမှာတော့ အင်အား အလုံးအရင်းဖြည့်တင်း တိုက်ခိုက်နေတာကြောင့် နေ့စဥ်ရက်ဆက် တိုက်ပွဲပြင်းထန်နေကာ နှစ်ဖက် အထိအခိုက် အကျအဆုံးများနေတယ်လို့ အမှတ် (၁၀၀၁) တပ်ရင်း၊ မိုးဗြဲပြည်သူ့ကာကွယ်ရေးတပ်ရဲ့ တာဝန်ရှိသူ ကိုဝေလက DVB ကို ပြောပါတယ်။
“လက်ရှိမှာ နှစ်ဘက် ပြင်းထန်နေပါတယ်။ နှစ်ဘက် အထိခိုက်၊ သေဆုံးမှုလည်းများတယ်။ မိုးဗြဲမှာ တိုက်ပွဲတလျှောက် ဒီတရက်နှစ်ရက်မှ ပိုပြီးစိပ်လာတယ်။ စစ်ကောင်စီက အလုံးအရင်းပဲ အင်အားခန့်မှန်းခြေ ၇၀၀ ဝန်းကျင်လောက်ပေါ့။”
မိုးဗြဲတိုက်ပွဲကို စစ်ကောင်စီဘက်က လက်နက်ကြီးပစ်ကူ၊ ဒရုန်းနဲ့ လေကြောင်းပစ်ကူကို အဆမတန် အသုံးပြုတိုက်ခိုက်နေပြီး တိုက်ပွဲဧရိယာမဟုတ်ဘဲ စစ်ဘေးရှောင်ပြည်သူတွေ ရှိတဲ့နေရာတွေကိုလည်း လက်နက်ကြီးတွေနဲ့ပစ်ခတ်တာ၊ လေယာဥ်နဲ့ ဗုံးကြဲတိုက်ခိုက်တာကြောင့် အရပ်သား ထိခိုက်သေဆုံးမှုတွေလည်းရှိတယ်လို့ MPDF က အသိပေး ထုတ်ပြန်ထားပါတယ်။
ဇန်နဝါရီ ၂၀ ရက် တိုက်ပွဲအတွင်း စစ်ကောင်စီတပ်သားအလောင်း ၁၂ လောင်းနဲ့ လက်နက်ခဲယမ်း တချို့ကို သိမ်းဆည်းရရှိခဲ့ပြီး မိုးဗြဲမြို့ကို စစ်ကောင်စီရဲ့လက်အောက် မကျရောက်ရေး အပြင်းအထန် ခုခံနေရလို့ အကူအညီတွေလည်း လိုအပ်နေတယ်လို့ ကိုဝေလက ပြောပါတယ်။
“စကစ ဘက်က ခလရ ၄၂၂၊ စစ်မှုထမ်းဆင်း အပတ်စဉ် ၁ ၊ ၄၊ ၅၊ ၇ တပ်ရင်းတပ်ဖွဲ့တွေ များပါတယ်။ အရေးကြီးလိုအပ်ချက်တွေကတော့ ဆေးဝါးအထောက်အကူနဲ့ စစ်အသုံးဆောင် အထောက်အကူတွေပါ။”
လက်ရှိအခြေအနေအရ မိုးဗြဲမြို့ကို တော်လှန်ရေးပူးပေါင်းတပ်တွေ ထိန်းချုပ်ထားဆဲ ဖြစ်ပြီး တိုက်ပွဲချိန်ကြာလာတာနဲ့အမျှ စစ်ရေးလိုအပ်ချက်များလာလို့ ပြည်တွင်း ပြည်ပကနေ ကူညီပံ့ပိုးပေးကြဖို့ မိုးဗြဲပြည်သူကာကွယ်ရေးတပ်က အကူအညီတောင်းထားပါတယ်။
