ဧရာဝတီတိုင်း၊ ကျုံပျော်မြို့၊ အောင်ဆန်းရပ်ကွက်မှာ မတ် ၂ ရက် ည ၉ နာရီကျော်လောက်က စစ်ကောင်စီတပ်ဖွဲ့ဝင်တွေနဲ့ ရဲတွေက လူငယ် ၇ ယောက်ကို ဧည့်စာရင်းစစ်တာ အကြောင်းပြပြီး စစ်မှုထမ်းဖို့ ဖမ်းဆီးခေါ်ဆောင်သွားတယ်လို့ ရပ်ကွက်နေပြည်သူတွေဆီက သိရပါတယ်။

စစ်ကောင်စီက စစ်မှုထမ်းဖို့ မြို့ပေါ်ရပ်ကွက် တရပ်ကွက်ကို ၁၀ ယောက်ဆီ ရပ်ကွက်အုပ်ချုပ်ရေးမှူးတွေကတဆင့် ခေါ်ယူနေတဲ့အပြင် အောင်ဆန်းရပ်ကွက်က လူငယ် ၇ ယောက်ကို စစ်တပ်၊ ရဲနဲ့ အုပ်ချုပ်ရေးအဖွဲ့တွေက အိမ်ထဲအထိ ဝင်ရောက်ဖမ်းဆီးသွားတာလို့ ဆိုပါတယ်။

မျက်မြင်တွေ့ရှိသူက “ရပ်ကွက်ထဲ ဧည့်စာရင်းစစ်ဖို့ဆိုပြီး စစ်သားတွေရောက်လာတယ်။ ပြီးတော့ အောင်မင်းတင်တို့အိမ်ကို ဝင်တယ်။ နောက် ပြန်ထွက်သွားတော့ အောင်မင်းတင် အပါအဝင် လူငယ် ၇ ဦးကို ဖမ်းဆီးသွားတာတွေ့တယ်” လို့ DVB ကို ပြောပါတယ်။

ပြီးခဲ့တဲ့ရက်ပိုင်းတွေကစပြီး ကျုံပျော်မြို့နယ်ထဲက ကျေးရွာတွေမှာ စစ်မှုထမ်းဖို့ စစ်ကောင်စီတပ်ဖွဲ့ဝင်တွေက လူငယ်တွေကို လိုက်လံဖမ်းဆီးတာတွေ လုပ်ခဲ့တဲ့အပြင် ဧည့်စာရင်းစစ်ပြီး လူငယ်တွေကို လိုက်ဖမ်းနေတာကြောင့် အိမ်တွေမှာ ညဘက်ဆို မနေရဲကြတော့ဘဲ ဘေးလွတ်ရာတွေမှာ ရှောင်တိမ်းနေရတယ်လို့ ဆိုပါတယ်။

ကျုံပျော်မြို့မှာ မြို့ပေါ်ရပ်ကွက် ၄ ရပ်ကွက်နဲ့ ကျေးရွာအုပ်စု ၉၇ အုပ်စုရှိပြီး စစ်ကောင်စီတပ်က တရပ်ကွက်ကို လူ ၁၀ ယောက်၊ ကျေးရွာအုပ်စုတစုကို ၁၀ ယောက်ဆီ စစ်မှုထမ်းဖို့ ဆင့်ခေါ်ခဲ့ရာ လူမပြည့်တာကြောင့် အိမ်တွေအထိ လိုက်လံဖမ်းဆီးတာတွေ လုပ်နေတာလို့ ကျုံပျော်ဒေသခံတွေဆီက သိရပါတယ်။

ဖေဖော်ဝါရီ ၂၇ ရက်ကလည်း ကျုံပျော်မြို့နယ်၊ ခဲဘောင်ကျေးရွာက လူငယ်တွေကို စစ်ကောင်စီတပ်နဲ့ ရဲတွေက ဝင်ရောက်ဖမ်းဆီးခဲ့ပြီး လူငယ် ၄ ယောက်ကို စစ်မှုထမ်းဖို့ ခေါ်ဆောင်သွားခဲ့တယ်လို့ ခဲဘောင်ကျေးရွာ ဒေသခံတွေဆီက သိရပါတယ်။