တနင်္သာရီတိုင်း၊ ကော့သောင်းခရိုင်၊ ဘုတ်ပြင်းမြို့ အားကစားခန်းမမှာ ဖမ်းဆီးထိန်းသိမ်းထားတဲ့ ရိုဟင်ဂျာတွေကို ထောင်ဒဏ် ၂ နှစ်ချမှတ်လိုက်ပြီးတော့ ကော့သောင်းမြို့ အကျဉ်းထောင်ကို ပို့ဆောင်လိုက်တယ်လို့ ဘုတ်ပြင်းဒေသခံတွေဆီက သိရပါတယ်။
ဖမ်းဆီးခံရတဲ့ ရိုဟင်ဂျာ ၁၀၂ ဦးကို ဖေဖော်ဝါရီ ၂၁ ရက်နေ့မှာ မြန်မာနိင်ငံအတွင်း နေထိုင်သူများမှတ်ပုံတင်ရေး အက်ဥပဒေ နဲ့ ထောင်ဒဏ် ၂ နှစ်စီ အမိန့်ချမှတ်လိုက်တယ်လို့ ဘုတ်ပြင်းဒေသခံတယောက်က ပြောပါတယ်။
“ထောင်ချလိုက်တာ တယောက်ကို ၂ နှစ်စီချလိုက်တယ်၊ ကလေးတွေလည်းပါတယ်။ ကလေးတွေက ရင်ခွင်ပိုက်တွေမဟုတ်ဘူး။ မိခင်တွေကို ချလို့ သူတို့ပါ ချလိုက်တာမျိုးမဟုတ်ဘူး။ သူတို့ကိုပါ အပြစ်ဒဏ်ပေးတယ်။ မြန်မာလို့ တယောက်မှလည်း ကောင်းကောင်းပြောမတတ်ကြဘူး။ နားလည်းမလည်ကြဘူး။”
ထောင်ဒဏ် ၂ နှစ်ချမှတ်ခံရတဲ့ ရိုဟင်ဂျာ ၁၀၂ ဦးထဲမှာ အမျိုးသား ၉၅ ဦး၊ အမျိုးသမီး ၂ ဦး အပါအဝင် ဆယ်ကျော်သက်အရွယ်လူငယ် ၅ ဦးလည်း ပါဝင်ပြီး အမိန့်ချပြီးနောက်တရက် မနက် ၄ နာရီလောက်မှာ ကော့သောင်းကို ကားနဲ့ပို့ဆောင်ခဲ့တယ်လို့ ဆိုပါတယ်။
“သူတို့မှာက နိင်ငံသားမှတ်ပုံတင်မရှိကြဘူးလေ။ ဖမ်းမိကတည်းက ဘုတ်ပြင်းမြို့အားကစားရုံမှာပဲ ထားတယ်။ တရားမဝင်လို့ ထောင်ချတာတော့ လက်ခံပေးတယ်။ ကလေးတွေပါ ထောင်ချတာဆိုတော့ မလုပ်သင့်တဲ့ကိစ္စပါ။”
ထိုင်းနိင်ငံထဲ ခိုးဝင်ဖို့လာတဲ့ ရိုဟင်ဂျာလူမျိုး ၁၀၂ ဦးကို ဖေဖော်ဝါရီ ၅ ရက်နေ့က ဘုတ်ပြင်းမြို့နယ် ထောင်ကမတ်ကျေးရွာအုပ်စု ဆီအုန်းတောသင်္ချိုင်းအနီးမှာ စစ်ကောင်စီနဲ့ ရဲတပ်ဖွဲ့တွေက သေနတ်တွေနဲ့ ပစ်ခတ်ဖမ်းဆီးခဲ့တယ်လို့ ဒေသခံတွေဆီက သိရပါတယ်။
အဆိုပါနေ့က ဖြစ်စဉ်အတွင်း ပစ်ခတ်ဖမ်းဆီးတာကြောင့် အသက် ၃၀ ကျော်အရွယ် အမျိုးသား ၁ ဦး သေဆုံးခဲ့ပြီး ၆ ဦး ဒဏ်ရာရခဲ့တယ်လို့ ဒေသခံပြည်သူတွေက ဆိုပါတယ်။
အဲ့ဒီရိုဟင်ဂျာ ၁၀၂ ဦးဟာ ရခိုင်ပြည်နယ်၊ စစ်တွေမြို့ဘက်ကနေ စက်လှေနဲ့ ထွက်ခွာလာတာဖြစ်ပြီး ပွဲစားကနေတဆင့် ချိတ်ဆက်ပြီးလာတာလို့ ဒေသခံတွေရဲ့ပြောပြချက်အရ သိရပါတယ်။
ပြီးခဲ့တဲ့ နှစ်ကလည်း ထိုင်းနိင်ငံကို နယ်စပ်ဘက်ကနေ တရားမဝင်လမ်းကြောင်းနဲ့ ဝင်ဖို့လုပ်တဲ့ လူငယ်တွေ အများအပြားပါလာတဲ့ ကားတစီးအား မြိတ်မြို့၊ ကျွဲကူးကျေးရွာဘက်မှာ စစ်ကောင်စီတပ်က စစ်ဆေးဖမ်းဆီးမိခဲ့တယ်လို့ မြိတ်ဒေသခံတွေဆီက သိရပါတယ်။
