တနင်္သာရီတိုင်းထဲက ထိုင်း-မြန်မာနယ်စပ် မောတောင် ကားလမ်းပိုင်းမှာ တိုက်ပွဲဖြစ်ပွားခဲ့ပြီး စစ်ကောင်စီက လေကြောင်းပစ်ကူအသုံးပြု တိုက်ခိုက်ခဲ့သလို မြေပြင်စစ်ကြောင်းက ပြန်ဆုတ်ခွာချိန်မှာ နေအိမ် ၅ လုံးကို မီးရှို့ဖျက်ဆီးသွားတယ်လို့ ဒေသတွင်း တော်လှန်ရေးတပ်ဖွဲ့တွေဆီက သိရပါတယ်။
တိုက်ပွဲဖြစ်ပွားနေတဲ့ တနင်္သာရီ-မောတောင် ကားလမ်းပိုင်းမှာ ဖေဖော်ဝါရီ ၁၅ ရက် မနက်ပိုင်းက သိန်ခွန်းကျေးရွာ ဘုန်းကြီးကျောင်းလမ်းပိုင်းမှာ စုဝေးနေကြတဲ့ စစ်ကောင်စီတပ်သားတွေကို တော်လှန်ရေး ပူးပေါင်းတပ်ဖွဲ့တွေက ကြားညှပ်တိုက်ခိုက်ခဲ့တာကြောင့် အထိနာခဲ့ပြီးနောက် လေကြောင်းပစ်ကူနဲ့ လာရောက်ဗုံးကြဲ တိုက်ခိုက်ခဲ့ကြတယ်လို့ ပြောပါတယ်။
လေကြောင်းပစ်ကူတိုက်ခိုက်ချိန် စစ်ကောင်စီတပ်သားတွေဟာ တိုက်ပွဲဖြစ်ပွားတဲ့ စာသင်ကျောင်းအနီးက နေအိမ် ၅ ဆောင်ကို မီးရှို့ဖျက်ဆီးသွားပြီးနောက် ဘုန်းကြီးကျောင်းဘက်ကို ပြန်ဆုတ်ခွာသွားတယ်လို့ KTLA-tcjf-Tanintharyi ရဲ့ ပြန်ကြားရေးတာဝန်ခံ ကိုစိုင်းညီက ပြောပါတယ်။
“လေကြောင်းပစ်ကူ တောင်းတာပေါ့၊ မနေ့က ရဟတ်ယာဉ်နဲ့ တခါ၊ လေယာဉ်နဲ့ဆို ၃ ခါ ဗုံးလာကြဲတယ်။ အားလုံး ၄ ကြိမ်ပေါ့။ အဲဒီအချိန် စာသင်ကျောင်းနားမှာရှိတဲ့ ထိတွေ့မှုဖြစ်ထားတဲ့ နေအိမ်တွေကို သူတို့က တပြိုင်တည်း မီးလာရှို့တာပေါ့၊ မီးရှို့ပြီးတော့ ဘုန်းကြီးကျောင်းဘက်ကို ပြန်ဆုတ်သွားတယ်။”
စာသင်ကျောင်းအနီးရှိ မီးရှို့ခံရတဲ့ နေအိမ်တွေထဲမှာ သိန်ခွန်းရွာ ကျောင်းဆရာနေအိမ်တလုံးနဲ့ ကျန်းမာရေးမှူးနေအိမ်တလုံးတို့လည်း ပါသွားခဲ့ပြီး အနီးကပ်စုံစမ်းလို့ မရတဲ့အတွက် နေအိမ် ၅ လုံး မီးလောင်သွားတာလောက်ပဲ အတည်ပြုလို့ ရပါတယ်လို့ ပြန်ကြားရေးတာဝန်ခံ ကိုစိုင်းညီက ဆက်ပြောပါတယ်။
“အိမ်က ဒရုန်းမှတ်တမ်းအရဆို အိမ် ၅ လုံးလောက် ပါသွားတယ်။ ရွာသားတွေကလည်း အကုန်မရှိကြတော့ဘူးဆိုတော့ အချက်အလက်တွေကို အနီးကပ်မရနိုင်ဘူး။”
ထိတွေ့တိုက်ပွဲစဖြစ်တဲ့ ၂၀၂၄ ခုနှစ်၊ ဒီဇင်ဘာ ၁၈ ရက်ကလည်း သိန်ခွန်းကျေးရွာ အပါအဝင် ထုံခါးကျေးရွာက ကျောက်မိုင်းနဲ့ ချောင်းနှစ်ပေါက်ကျေးရွာတို့မှာ လေကြောင်းကနေ ဗုံးကြဲတိုက်ခိုက်ခဲ့သေးတယ်လို့ ပြောပါတယ်။
စစ်ရေးအခြေအနေ တင်းမာနေတဲ့အတွက် ထိုင်း-မြန်မာနယ်စပ် မောတောင်ကားလမ်းပိုင်းကို ဖြတ်သန်းသွားလာခွင့် မပြုကြဖို့လည်း တော်လှန်ရေးတပ်ဖွဲ့တွေဘက်က အသိပေး ထုတ်ပြန်ထားပါတယ်။
