ချင်းပြည်နယ်မှာ စစ်ကောင်စီတပ်သားသစ် ၄ ယောက် လက်နက်တွေနဲ့အတူ ဖေဖော်ဝါရီ ၅ ရက်က ချင်းအမျိုးသားတပ်မတော် (CNA) ဆီကို အလင်းဝင်ရောက်လာတယ်လို့ Chinland Information Center ဆီကနေ သိရပါတယ်။
Chinland Information Center ရဲ့ ပြောရေးဆိုခွင့်ရှိသူတယောက်က “သူတို့ ၄ ယောက်လုံးက ဟားခါးနဲ့ ထန်တလန်ကြားမှာရှိတဲ့ Point 3 ရှေ့တန်းစခန်းကပါ။ စစ်မှုထမ်းဥပဒေနဲ့ ပေါ်တာဆွဲ ဖမ်းဆီးခံရပြီးတော့ စစ်သင်တန်းဆင်းကနေ ရှေ့တန်းကို ရောက်လာကြသူတွေဖြစ်တယ်” လို့ ပြောပါတယ်။
အဆိုပါ အလင်းဝင်ရောက်လာကြသူ ၄ ယောက်ဟာ သေနတ် ၃ လက်နဲ့ ခဲယမ်းတချို့ ယူဆောင်လာတာကြောင့်လည်း ဆုကြေးငွေ ချီးမြှင့်ပေးခဲ့တယ်လို့ ဆိုပါတယ်။
Chin National Army (CNA) ရဲ့ ပြောရေးဆိုခွင့်ရှိသူတယောက်က “သူတို့ ၄ ယောက် အလင်းဝင်လာတဲ့အခါမှာ ၃ ယောက်က သေနတ်ပါလာတယ်။ တယောက်ကတော့ အခွင့်မသာလို့ လက်နက်ယူမလာနိုင်ခဲ့ဘူး။ သူတို့တွေကို သတ်မှတ်ထားတဲ့ ဆုကြေးငွေတွေ ချီးမြှင့်ပြီးတော့ လုံခြုံတဲ့နေရာကို ပို့ဆောင်ထားပြီးပြီ” လို့ DVB ကို ပြောပါတယ်။
ပြီးခဲ့တဲ့ ဖေဖော်ဝါရီ ၅ ရက်က အလင်းဝင်ရောက်လာကြတဲ့ အဆိုပါ စစ်ကောင်စီတပ်ဖွဲ့ဝင် ၄ ယောက်ထဲက လက်နက်ပါလာသူ ၃ ယောက်ကို ဖေဖော်ဝါရီ ၈ ရက်မှာ သေနတ်တလက်အတွက် သိန်း ၅၀ စီ ချီးမြှင့်ပေးထားတယ်လို့လည်း သူက ဆက်ပြောပါတယ်။
ဇန်နဝါရီ ၃ ရက်၊ ၆ ရက်နဲ့ ၇ ရက်နေ့တွေကလည်း ဟားခါးမြို့ပေါ်က ပြည်သူ့စစ် ၃ ယောက်နဲ့ ဇန်နဝါရီ ၈ ရက်နဲ့ ၁၄ ရက်နေ့တွေမှာလည်း ဟားခါးမြို့ပေါ်က ပြည်သူ့စစ် ၄ ယောက်တို့ဟာ ဟားခါး CDF ဆီကို အလင်းဝင်ရောက်ခဲ့ကြပါသေးတယ်။
စစ်ကောင်စီလက်အောက်မှာ ကျန်ရှိနေသေးတဲ့ စစ်ကောင်စီတပ်ဖွဲ့ဝင်တွေ အနေနဲ့လည်း နီးစပ်ရာ တော်လှန်ရေးတပ်ဖွဲ့တွေဆီကို လက်နက်ချ အလင်းဝင်ရောက်ကြဖို့ ဖေဖော်ဝါရီ ၆ ရက်မှာ ဖလမ်းမြို့သိမ်း စစ်ဆင်ရေးအတွင်း ချင်းညီနောင်နဲ့ မဟာမိတ်တပ်ဖွဲ့တွေက ဖမ်းဆီးရမိခဲ့တဲ့ စစ်ကောင်စီလက်အောက်ခံ ပြည်သူ့စစ်အဖွဲ့ဝင်တွေက တိုက်တွန်းထားပါတယ်။
