စစ်ကောင်စီတပ်က အရာရှိတွေနဲ့ Non CDM ဝန်ထမ်းတွေ ဖမ်းဆီးခံရပြီးနောက် ရန်ကုန်-မန္တလေး အမြန်လမ်းကို ဇန်နဝါရီ ၁၄ ရက်မှာ စစ်တပ်က အင်အားတိုးမြှင့်ချထားတယ်လို့ ခရီးသွားလာသူတွေဆီက သိရပါတယ်။
ရန်ကုန်-မန္တလေး အမြန်လမ်း နတ်မောက်-ပျော်ဘွယ် မိုင်တိုင်အမှတ် ၂၆၂ မှာ ဒီမနက်က စစ် ကောင်စီတပ်က ရဲတွေ အင်အားတိုးမြှင့်ချထားတာလို့ ခရီးသွားယာဥ်မောင်းတယောက်က ပြောပါတယ်။
“ဒီနေ့ ၂၆၂ မိုင်မှာ စစ်တယ်။ ရဲက များတယ်။ စစ်သားက အနည်းအကျဥ်းပဲ။ ကိုယ်ပိုင်ကားတွေဆို လူတွေကို ဆင်းခိုင်းပြီး ကားနောက်ဖုံးတွေပါ လှန်ပြီးစစ်တာ။ ခရီးဆောင်အိတ်တွေ ဖွင့်ပြီး စစ်တယ်၊ ဖုန်းတွေ စစ်တယ်။”
ရန်ကုန်-မန္တလေး အမြန်လမ်း မိတ္တီလာနဲ့ နွားထိုးကြီးမြို့နယ်အစပ် မိုင်တိုင်အမှတ် ၃၁၉ /၆ မှာ လည်း အမြန်လမ်းက ရဲအင်အားတိုးမြှင့်ထားပြီး စစ်ဆေးနေတယ်လို့ မိတ္တီလာမြို့ခံက ပြောပါတယ်။
“သူတို့က ကားတွေနဲ့လျှောက်ပတ်နေတာ ၃၁၉ မိုင်မှာ စစ်တယ်။ ခဏပဲ တံတားပေါ်မှာ လူအင်အားနဲ့ ဓာတ်ပုံရိုက်ပြီးရင် တခြားနေရာဆက်သွားတာ။”
ဒီလိုစစ်ဆေးတာဟာ စစ်ကောင်စီတပ်က အရာရှိလင်မယား၊ ဌာနဆိုင်ရာဝန်ထမ်း ၅ ယောက် ဖမ်းဆီးခံရတာကြောင့် ဖြစ်တယ်လို့ အမြန်လမ်းရဲတပ်ဖွဲ့နဲ့နီးစပ်တဲ့ သတင်းရင်းမြစ်က ပြောပါတယ်။
“ဌာနဆိုင်ရာဝန်ထမ်း အဖမ်းခံရတဲ့သတင်းက လူကြီးတွေနားပေါက်သွားလို့ စစ်တာ။ လုံခြုံရေးအရ အခုလို စစ်တာကောင်းတယ်။ ဒါပေမဲ့ လုံခြုံရေးကို အကြောင်းပြုပြီး ငွေတောင်းတာတို့၊ ဖမ်းဆီးပြီး ငွေညှစ်မှာ စိုးရိမ်တာ။”
ရန်ကုန်-မန္တလေး အမြန်လမ်းအနီး နတ်မောက်-ပျော်ဘွယ်လမ်းပေါ်မှာ ၂၀၂၄ ခုနှစ် ဒီဇင်ဘာ ၂၇ ရက်နဲ့ ၃၁ ရက်အတွင်း မီးသတ်ဦးစီးဌာန ညွှန်ကြားရေးမှူးနဲ့ ဇနီး၊ ဗိုလ်ကြီးတယောက်ရဲ့ ဇနီး၊ အခြားအဆင့် ၂ ယောက်နဲ့ ပျူစောထီးတယောက်တို့ကို ပြည်သူ့ကာကွယ်ရေးတပ်ဖွဲ့ (PDF) အဖွဲ့တွေက ဖမ်းဆီးရမိခဲ့တာ ဖြစ်ပါတယ်။
အလားတူ ပြီးခဲ့တဲ့ ရက်ပိုင်းအတွင်းကလည်း မိုင်တိုင်အမှတ် ၂၆၂ မှာပဲ စစ်ကောင်စီလက်အောက်ခံ ဆောက်လုပ်ရေးဝန်ကြီးဌာနမှ လက်ထောက်ညွှန်ကြားရေးမှူးတယောက်ကို PDF တွေက ဖမ်းဆီးရမိခဲ့ပါတယ်။
