လုပ်ခတိုးမြင့်ပေးဖို့ တောင်းဆိုခဲ့ကြတဲ့ Spring Moon စက်ရုံမှာ အလုပ်ရှင်နဲ့ အလုပ်သမားအကြား သြဂုတ် ၁၁ ရက်က ပြေလည်မှုရရှိသွားပြီး နှစ်ဖက် သဘောတူ လက်မှတ်ရေးထိုးခဲ့ကြတယ်လို့ ကူညီဆောင်ရွက်ပေးခဲ့တဲ့ သွေးစည်းညီညွတ်သောသမဂ္ဂများအဖွဲ့ချုပ်(STUM) က ထုတ်ပြန်ပါတယ်။
အဲဒီစက်ရုံအလုပ်သမားတွေက ဇူလိုင် ၁၈ ရက်ကတည်းက တောင်းဆိုခဲ့ကြတာဖြစ်ပြီး ရက်ပေါင်း ၃၀ ကျော် ကြာမြင့်ခဲ့ကာ အခုနောက်ဆုံး တောင်းဆိုချက် ၄ ချက်ကို သဘောတူညီမှုရရှိခဲ့တာပါ။
STUM တာဝန်ရှိသူတယောက်က “ရက်ပေါင်း ၃၀ ကျော်ကြာမြင့်တဲ့ တောင်းဆိုမှုပြဿနာမှာ အေးချမ်းစွာ ပြီးဆုံးသွားခဲ့ပြီ"လို့ ပြောပါတယ်။
အလုပ်သမားတွေ တောင်းဆိုတဲ့ Day ကြေး ကျပ် ၁၀,၀၀၀ အစား ကျပ် ၁၃,၀၀၀ ၊ အချိန်ပို (OT) ကြေး ကျပ် ၂,၀၀၀ အစား အချိန်ပို ၂၈ နာရီအထိ ကျပ် ၂,၂၀၀၊ ၂၈ နာရီ ကျော်ရင် ကျော်တဲ့နာရီတွေအတွက် ကျပ် ၂,၃၀၀ နှုန်းပေးဖို့ သဘောတူခဲ့ပါတယ်။
ဒါ့အပြင် စက်လိုင်းစံချိန်ပြည့်ကြေး အထည်စံချိန်ပြည့်မီရင် တလ ကျပ် ၁၅,၀၀၀ နှုန်းပေးဖို့ တခြားဌာန စံချိန်ပြည့်ကြေး: Finishing QC၊ မီးပူရိုက်နဲ့ ကြယ်သီးရိုက် အလုပ်သမားတွေအတွက် စံချိန်ပြည့်မီရင် တလ ကျပ် ၆,၀၀၀ နှုန်းပေးဖို့လည်း သဘောတူခဲ့ပါတယ်။
အလုပ်သမားတွေရဲ့ တောင်းဆိုမှုနဲ့ပတ်သက်လို့ သြဂုတ် ၁၁ ရက်မှာ တိုင်းဒေသကြီးပေါင်းစပ်အဖွဲ့က ဝင်ရောက်ညှိနိူင်းပေးခဲ့တာကနေ အလုပ်ရှင်နဲ့ အလုပ်သမားအကြား သဘောတူညီမှု ရရှိခဲ့တာလို့ STUM က အသိပေးထားပါတယ်။
တရုတ်နိုင်ငံသား ပိုင်ဆိုင်တဲ့ Spring Moon စက်ရုံကို လှိုင်င်သာယာမြို့နယ်မှာ ဖွင့်လှစ်ထားတာ ဖြစ်ပြီး အလုပ်သမားအယောက် ၂၈၀ လောက်ရှိတဲ့ထဲက အယောက် ၁၃၀ ကျော်က လစာတိုးမြှင့် ရရှိအောင် လုပ်ငန်းခွင်ရပ်နား တောင်းဆိုခဲ့ကြတာပါ။
အခု နှစ်ဖက်သဘောတူညီချက် စာချုပ်မှာ ၂၀၂၆ ဩဂုတ် ၁ ရက်ကစပြီး အကျိုးသက်ရောက်မှာ ဖြစ်ကာ တောင်းဆိုတဲ့အထဲ ပါဝင်တဲ့ အလုပ်သမား ၁၃၃ ယောက်စလုံး ဩဂုတ် ၁၂ ရက်မှာ လုပ်ငန်းခွင်ထဲ ပုံမှန်ပြန်လည်ဝင်ရောက်လုပ်ကိုင်ကြမှာလို့ သိရပါတယ်။
ဒါ့အပြင် သဘောတူထားတဲ့ အချက်တွေနဲ့ပတ်သက်ပြီး ထပ်မံတောင်းဆိုတာ မပြုလုပ်ဖို့ အလုပ်သမားတွေဘက်က သဘောတူ လက်ခံခဲ့ကြတယ်လို့လည်း STUM က ပြောပါတယ်။
