ပဲခူးတိုင်း၊ သာယာဝတီခရိုင်၊ အုတ်ဖိုမြို့နယ်မှာ စစ်အုပ်စုရဲ့ ထုတ်ကုန်တွေဖြစ်တဲ့ အရက်နဲ့ ဘီယာ အပါအဝင် တခြားဆက်စပ်ပစ္စည်းတွေကို အသုံးမပြုကြဖို့အတွက် သာယာဝတီခရိုင် တပ်ရင်း ၃၈၀၂၊ တပ်ခွဲ ၄ မြေအောက်ပြောက်ကျားတပ်ဖွဲ့ - အုတ်ဖိုက သတိပေးထားပါတယ်။

အုတ်ဖိုမြို့နယ်အတွင်းရှိ ဈေးဆိုင်တွေမှာ စစ်အုပ်စုထုတ်ကုန်ဖြစ်တဲ့ အရက်နဲ့ ဘီယာတွေ ရောင်းချနေတာကို ပြီးခဲ့တဲ့ ဒီဇင်ဘာ ၂၀ ရက်က ရှောင်တခင် ဝင်ရောက်စစ်ဆေးခဲ့ပြီး ဖမ်းဆီး အရေးယူခဲ့​တယ်လို့ မြေအောက်ပြောက်ကျားတပ်ဖွဲ့ တာဝန်ခံက ပြောပါတယ်။

“ကျနော်တို့ရှောင်တခင် ဝင်ရောက်ပြီးဖမ်းဆီးခဲ့တာ အရေအတွက်က အရမ်းမများပါဘူး။ တန်ဖိုးအားဖြင့် သိန်းဂဏန်းလောက်ပဲ ရှိပါတယ်။ အားလုံးကို ဖျက်ဆီးပစ်ခဲ့သလို နောက်နောင်ထပ်ပြီး အသုံးမပြုကြဖို့ကိုလည်း သတိပေး တားမြစ်ခဲ့တာပါ။"

ဒါ့အပြင် ပြည်သူလူထုကို ဖမ်းဆီးသတ်ဖြတ်ကာ အမျိုးမျိုး ဒုက္ခပေးနေတဲ့ စစ်တပ်ကို ၀င်ငွေရစေတဲ့ စစ်တပ်ထုတ် အရက်၊ ဘီယာ ရောင်းချနေတဲ့ ဆိုင်တွေကို ၀င်ရောက် ဖမ်းဆီးဖျက်ဆီးမှုတွေ ထိရောက်စွာ ဆက်လက်လုပ်ဆောင်သွားမယ်လို့လည်း ပြောပါတယ်။

တားမြစ်ထားတဲ့ စစ်အုပ်စုထုတ်ကုန်တွေကတော့ နန်းမြိုင်ကော်ဖီ၊  Army Rum၊ Andaman Gold Blue၊ Andaman Gold Special၊ Army Rum၊ Black Shield Stout၊ Dagon Dairy Plant ထုတ်ကုန်များ၊  မြန်မာဘီယာ၊ မန္တလေးဘီယာ၊ Red Ruby ဆေးလိပ်၊ Premium Gold ဆေးလိပ်၊ ရွှေဖီဦး လက်ဖက်ရည်ထုပ် စတဲ့ စားသောက်ကုန် ပါဝင်ပါတယ်။

စစ်အုပ်စုအတွက် ဝင်ငွေရလမ်းတွေဖြစ်တဲ့ အရက်နဲ့ ဘီယာ အပါအဝင် စစ်တပ် ထုတ်ကုန်ပစ္စည်းတွေကို နွေဦးတော်လှန်ရေးအစပိုင်းမှာ ပြည်သူတွေက အင်တိုက်အားတိုက် သပိတ်ဆန့်ကျင်ခဲ့ကြပေမဲ့  အချိန်ကာလ ရှည်ကြာလာတဲ့အမျှ ပြန်လည်အသုံးပြုလာကြတဲ့ အချိန်မှာ တော်လှန်ရေးတပ်ဖွဲ့တွေက အခုလို ထပ်မံသတိပေးလိုက်တာ ဖြစ်ပါတယ်။