ချင်းပြည်နယ်၊ မင်းတပ်မြို့ကို စစ်ကောင်စီတပ်က ဒီဇင်ဘာ ၁၂ ရက် တရက်တည်းမှာ လေကြောင်းကနေ ဗုံးအလုံး ၈၀ နီးပါးကြဲချခဲ့တယ်လို့ ဒေသခံတော်လှန်ရေးအဖွဲ့တွေထံက သိရပါတယ်။
မင်းတပ်မြို့နယ်ပြည်သူ့အုပ်ချုပ်ရေးအဖွဲ့ရဲ့ တာ၀န်ရှိသူတယောက်က “မနက် ၈ နာရီလောက်ကနေ ၁၀ နာရီလောက်အထိ မင်းတပ်မြို့ပေါ်ကို တောက်လျှောက်ကြဲတာ။ မြို့ပေါ်ကိုဆက်သွယ်ဖို့ခက်ခဲနေတော့ အထိအခိုက်အပျက်အစီးတွေတော့ မသိရသေးဘူး” လို့ ပြောပါတယ်။
နိုဝင်ဘာ ၉ ရက်ကစလို့ မင်းတပ်မြို့သိမ်းတိုက်ပွဲအတွက် ချင်းပူးပေါင်းတပ်ဖွဲ့တွေနဲ့ စစ်ကောင်စီတပ်တို့ကြားတိုက်ပွဲတွေပြင်းထန်နေပြီး စစ်ကောင်စီတပ်ဘက်ကလည်း လေကြောင်းတိုက်ခိုက်တာတွေနေ့စဥ် ပြုလုပ်နေပါတယ်။
CDF Mindat ရဲ့တာ၀န်ခံက “တိုက်ပွဲတွေကလည်း ပြင်းထန်နေတယ်။ လေကြောင်းတိုက်ခိုက်တာက အရင်ရက်တွေကထက်ပိုဆိုးတာပေါ့။ မကွေးဘက်ကတက်လာတဲ့ ဂျက်ဖိုက်တာ Y12 ဗုံးကြဲလေယာဉ်တွေနဲ့ တမနက်လုံးကြဲတာ။ ၁၂၀ မမ ဗုံးသီး ၁၀ လုံးတွဲ၊ ၇ လုံးတွဲ၊ ၅ လုံးတွဲတွေ၊ ပေါင် ၅၀၀ ဗုံးကလည်း ၄ လုံးလောက်ပါတယ်။ အားလုံးဆို ဗုံးအလုံး ၈၀ လောက်ရှိတယ်” လို့ DVB ကို ပြောပါတယ်။
မင်းတပ်မြို့ပေါ်မှာတပ်စွဲနေကြတဲ့ စစ်ကောင်စီတပ်ဖွဲ့ဝင်တွေဟာ ဒီဇင်ဘာ ၁၀ ရက် ညနေပိုင်းကလည်း မင်းတပ်မြို့ ၃ မိုင်အနီးက လူနေအိမ်တွေကို ထပ်မံ မီးရှို့ဖျက်ဆီးသွားပါတယ်။
အဆိုပါစစ်ကောင်စီတပ်ဖွဲ့ဝင်တွေဟာ ပြီးခဲ့တဲ့ နိုဝင်ဘာလလယ်ပိုင်းကလည်း မင်းတပ်မြို့မှာ အခြေစိုက်တဲ့စစ်ကောင်စီတပ်ရဲ့ ခလရ ၂၇၄ အနီးမှာရှိတဲ့ စစ်ဘေးရှောင်ပြည်သူတွေရဲ့ နေအိမ်တွေကို မီးရှို့ဖျက်ဆီးခဲ့သလို နိုဝင်ဘာ ၃ ရက် ညနေပိုင်းကလည်း မင်းတပ်မြို့ ဆည်မြောင်းဝန်ထမ်းအိမ်ယာကို မီးရှို့ဖျက်ဆီးခဲ့ ပါတယ်။
ချင်းညီနောင်မဟာမိတ်တပ်ဖွဲ့တွေဟာ မင်းတပ်မြို့က စစ်ကောင်စီတပ်စခန်းတွေကို ထိုးစစ်ဆင်တိုက်ခိုက်နေလို့ တိုက်ပွဲတွေပြင်းထန်နေတာလို့ CDF Mindat ရဲ့တာ၀န်ခံက ပြောပေမဲ့ တိုက်ပွဲရဲ့အသေးစိတ်အခြေအနေကိုတော့ မသိရ သေးပါဘူး။
နှစ်ဖက်တိုက်ပွဲတွေကြောင့် မင်းတပ်မြို့ပေါ်က ဒေသခံပြည်သူအများစုဟာ ဘေးလွတ်ရာနေရာတွေကိုထွက်ပြေးနေကြရတာ နှစ်ချီကြာမြင့်နေပြီ ဖြစ်ပါတယ်။
