ချင်းပြည်နယ်၊ ဟားခါးနဲ့ ထန်တလန်ကြားက စစ်ကောင်စီတပ်စခန်းငယ် ၃ ခုကို ချင်းပူးပေါင်းတပ်ဖွဲ့တွေ သိမ်းပိုက်ရရှိခဲ့ပြီး တိုက်ပွဲအတွင်း စစ်ကောင်စီဘက်က တပ်ရင်းမှူး ၂ ယောက်နဲ့ အရာရှိတွေအပါအဝင် အများအပြားသေဆုံးတယ်လို့ CNF/CNA ရဲ့ တာဝန်ခံတယောက်က ပါတယ်။
“ဟားခါးနဲ့ထန်တလန်ကြားက စစ်ကောင်စီရဲ့တပ်စခန်းငယ် ၃ ခုကို သိမ်းပိုက်နိုင်တာခဲ့တာပါ။ တိုက်ပွဲကာလ တပတ်အတွင်းမှာ သူတို့ဘက်က တပ်ရင်းမှူး ၂ ဦးနဲ့ အရာရှိ ၄ ဦးအပြင် ၃၀ နီးပါးသေတယ်။ လက်နက်ခဲယမ်းအများအပြားလည်း ရပါတယ်။”
ချင်းပူးပေါင်းတပ်ဖွဲ့တွေဟာ ဟားခါးနဲ့ထန်တလန်ကြားက စစ်ကောင်စီရဲ့တပ်စခန်းတွေကို နိုဝင်ဘာ ၂၂ ရက်ကနေ စတင်တိုက်ခိုက်ခဲ့ကြတာဖြစ်ပြီး နိုဝင်ဘာ ၃၀ ရက်အထိ စစ်ကောင်စီတပ်စခန်းငယ် ၃ ခုအထိ တိုက်ခိုက်သိမ်းပိုက်နိုင်ခဲ့တာလို့ ဆိုပါတယ်။
CNF/CNA ရဲ့ ပြောရေးဆိုခွင့်ရှိတဲ့ ဆလိုင်းထက်နီက “တိုက်ပွဲစတဲ့အချိန်ကနေ ဒီနေ့အထိ သူတို့တပ်စခန်းငယ် ၃ ခုကို ရတယ်ပေါ့။ တိုက်ပွဲတွေထဲမှာ ခလရ ၂၂၂ တပ်ရင်းမှူး၊ ခလရ ၂၆၆ တပ်ရင်းမှူးနဲ့ အရာရှိတွေ ၄ ယောက်လောက်ကျသွားတော့ သူတို့ဘက်က အတော်လေး အထိနာတယ်။ ခလရ ၂၆၆ တပ်ရင်းမှူးက ၂၃ ရက်နေ့တိုက်ပွဲမှာ ဒဏ်ရာအပြင်းအထန်ရသွားလို့ ဆေးကုနေတာ အခုနောက်ဆုံးသတင်းအရကတော့ သေသွားပြီလို့ သိရတာပေါ့နော်။ သိမ်းမိတဲ့စခန်း ၃ လုံးကနေ သူတို့ဘက်က ၂၀ ကျော် ၃၀ နီးပါးသေတယ်။ ဒဏ်ရာရတဲ့ ၂၀ နီးပါးကိုလည်း အရှင်မိထားပါတယ်” လို့ DVB ကို ပြောပါတယ်။
သိမ်းပိုက်ရရှိတဲ့ စစ်ကောင်စီတပ်စခန်း ၃ ခုကနေ လက်နက်အလက် ၅၀ ကျော်၊ ကျည်ဆန် ၅၀၀၀ ကျော်၊ ဒရုန်းတွေအပြင် Jummer တွေနဲ့ အခြားစစ်အသုံးအဆောင်တွေကိုလည်း သိမ်းဆည်းရရှိခဲ့တယ်လို့ သူကဆက်ပြောပါတယ်။
တိုက်ပွဲတွေအတွင်း ဒဏ်ရာရရှိပြီး အရှင်ဖမ်းမိထားတဲ့ စစ်ကောင်စီတပ်ဖွဲ့ဝင်တွေကို ဆေးကုသပေးနေပြီး စစ်သုံ့ပန်း ဥပဒေတွေနဲ့အညီ ထိန်းသိမ်းထားတယ်လို့လည်း သိရပါတယ်။
စခန်းသိမ်းတိုက်ပွဲတွေအတွင်း ချင်းတော်လှန်ရေးပူးပေါင်းတပ်တွေဘက်က တပ်ဖွဲ့ဝင် ၉ ယောက် ထိခိုက်ဒဏ်ရာရှိသလို အဲဒီထဲက ၂ ယောက်ကတော့ ဒဏ်ရာပြင်းထန်ပြီး ချင်းတော်လှန်ရေးတပ်ဖွဲ့ဝင် ၃ ယောက်လည်း တိုက်ပွဲအတွင်းကျဆုံးသွားခဲ့တယ်လို့ ချင်းအမျိုးသားတပ်ဦး/ချင်းအမျိုးသားတပ်မတော် (CNF/CNA) ဆီကနေသိရပါတယ်။
တိုက်ပွဲတွေအတွင်း မြေပြင်မှာထိခိုက်သေဆုံးမှုများနေတဲ့ စစ်ကောင်စီတပ်ဟာ တိုက်ပွဲဖြစ်ပွားရာ နေရာတွေကို နေ့စဥ် ၃ ကြိမ်ထက်မနည်း လေကြောင်းတိုက်ခိုက်မှုတွေ အပြင်းအထန် ဆက်တိုက်ပြုလုပ်နေတယ်လို့လည်း ချင်းတော်လှန်ရေးတပ်ဖွဲ့တွေဆီကနေ သိရပါတယ်။
ပြီးခဲ့တဲ့ နိုဝင်ဘာ ၂၅ ရက်နေ့ကလည်း စစ်ရေးအတွက် အရေးပါတဲ့ ဟားခါးနဲ့ ထန်တလန်မြို့ကြားက ပွိုင့်သရီးစစ်ကောင်စီတပ် အထိုင်စခန်းကို တိုက်ခိုက်သိမ်းပိုက်ရရှိခဲ့တာလည်း ဖြစ်ပါတယ်။
အဆိုပါစစ်ကောင်စီတပ်စခန်းတွေ တိုက်ခိုက်သိမ်းပိုက်ခံရတာနဲ့ပတ်သက်လို့ စစ်ကောင်စီဘက်ကတော့ သတင်းတစုံတရာထုတ်ပြန်လာတာ မရှိသေးပါဘူး။
