ရခိုင်ပြည်နယ်၊ တောင်ကုတ်မြို့သိမ်းတိုက်ပွဲကို ၂၀၂၄ ခုနှစ်၊ နိုဝင်ဘာ ၄ ရက်ကနေ ၂၀ ရက်ထိ ၁၇ ရက်ကြာ ထိုးစစ်ဆင်တိုက်ခိုက်ခဲ့ပြီး နိုဝင်ဘာ ၂၄ ရက်မှာ တောင်ကုတ်မြို့ တခုလုံးကို အလုံးစုံ ထိန်းချုပ်ထားနိုင်ခဲ့ပြီလို့ အာရက္ခတပ်တော် (AA) က နိုဝင်ဘာ ၂၈ ရက်မှာ ထုတ်ပြန်လိုက်ပါတယ်။

လက်ရှိမှာ တောင်ကုတ်မြို့အတွင်း စစ်ကောင်စီတပ်ဖွဲ့ဝင်တွေ တယောက်မှ မရှိတော့ဘဲ အာရက္ခတပ်တော်က ထိန်းချုပ်လိုက်ပြီလည်း ဖြစ်ပါတယ်။

AA က တောင်ကုတ်မြို့ပြင်ပ စစ်ကောင်စီရဲ့ မောင်းတံဂိတ်စခန်း၊ တက္ကသိုလ်ကျောင်းဝင်း စခန်း၊ အာလိမ်ငါးဆင့်ဘုရားကုန်းစခန်း၊ ဖုန်ညိုရွာတံတားအနီးစခန်း၊ တောင်ကုတ်မြို့အဝင် စကခ ၅ တပ်မဌာနချုပ် ဂိတ်စခန်း၊ ဆုတောင်းပြည့်ဘုရားကုန်းစခန်း၊ ကြိုးကြာကွင်း ဂိတ်စခန်း၊ ကိုင်းရှည်တံတားထိပ်စခန်း၊ သီရိဆေးရုံစခန်းနဲ့ တောင်ကုတ်မြို့မရဲစခန်းတွေကို သိမ်းပိုက်ရရှိခဲ့တယ်လို့ ဆိုပါတယ်။

လက်ရှိမှာ တောင်ကုတ်မြို့အနီးပတ်ဝန်းကျင်က ကျန်ရှိနေတဲ့ တောင်ကုတ်မြို့အခြေစိုက် စကခ ၅ တပ်မဌာနချုပ်နဲ့ လက်အောက်ခံတပ်ရင်းတွေဖြစ်တဲ့ ခမရ ၃၄၆ နဲ့ ခမရ ၅၄၄ တပ်ရင်းစခန်းတွေကို တပြိုင်နက်တည်း ထိုးစစ်ဆင် တိုက်ခိုက်နေတယ်လို့လည်း သိရပါတယ်။

ဒါ့အပြင် မြို့သိမ်းတိုက်ပွဲတွေ ဆင်နွှဲနေတဲ့ ဂွမြို့နယ်၊ အမ်းမြို့အခြေစိုက် နပခ ဌာနချုပ်နဲ့ မောင်တောမြို့ နခခ ၅ စခန်းတွေကိုလည်း အပြီးသတ်သိမ်းပိုက်နိုင်ဖို့ အရှိန်အဟုန်မြှင့် ထိုးစစ်ဆင် တိုက်ခိုက်နေတယ်လို့ ဆိုပါတယ်။

ရခိုင်က တက်ကြွလှုပ်ရှားသူတယောက်က “ရခိုင်က မြို့နယ်တခုကတော့ ထပ်ပြီး စစ်ဖိနပ်ချုပ်ချယ်မှုအောက်က လွတ်လာပြီဆိုတော့ မင်္ဂလာတပါးပါပဲ” လို့ ပြောပါတယ်။

ရခိုင်မှာ တိုက်ပွဲစဖြစ်တဲ့ နိုဝင်ဘာ ၁၃ ရက်ကနေ တနှစ်ကျော်အတွင်းမှာ အာရက္ခတပ်တော်က မြို့နယ် ၁၁ ခုအထိ သိမ်းပိုက်ရရှိထားတာဖြစ်ပါတယ်။

ကေခိုင်