တောင်တရုတ်ပင်လယ်ပြင်မှာဖြစ်ပေါ်နေတဲ့ တိုင်ဖွန်းမုန်တိုင်း ရင်ရှင်း (YINXING) ဟာ အနောက်ဘက်ကို ရွေ့လျားနိုင်ပြီး ဒီကနေ့ နိုဝင်ဘာလ ၉ ရက်နေ့ကစလို့ နောက် ၂ ရက်အထိ နိုင်ငံတဝန်း မိုးရွာနိုင်တယ်လို့ စစ်ကောင်စီဩဇာခံ မိုးလေဝသနဲ့ ဇလဗေဒညွှန်ကြားမှုဦးစီးဌာနက ထုတ်ပြန်ပါတယ်။

စစ်ကိုင်းတိုင်းအထက်ပိုင်းနဲ့ ကချင်ပြည်နယ်တို့မှာ နေရာကွက်ကျား၊ စစ်ကိုင်းတိုင်းအောက်ပိုင်း၊ မန္တလေးတိုင်း၊ မကွေးတိုင်း၊ ရှမ်းပြည်မြောက်ပိုင်း၊ ချင်းပြည်နယ်နဲ့ ရခိုင်တို့မှာ နေရာကျဲကျဲ၊ တနင်္သာရီတိုင်းနဲ့ ကရင်ပြည်နယ်တို့မှာ နေရာစိပ်စိပ်နဲ့ ကျန်တိုင်းနဲ့ ပြည်နယ်တို့မှာ နေရာအနှံ့အပြားမိုးရွာသွန်းပြီး ဧရာဝတီတိုင်းမှာတော့ နေရာကွက်မိုးကြီးမယ်လို့ မိုးဇလက ဆိုပါတယ်။

နောက်ထပ် ၂ ရက်အထိ နေပြည်တော်၊ ရှမ်းပြည်နယ်၊ ကယားပြည်နယ်၊ ကရင်ပြည်နယ်နဲ့ မွန်ပြည်နယ်တို့မှာလည်း နေရာကျဲကျဲကနေ နေရာစိပ်စိပ် မိုးထစ်ချုန်းရွာသွန်းနိုင်တယ်လို့လည်း ခန့်မှန်းထားပါတယ်။

တောင်တရုတ်ပင်လယ်ပြင်မှာဖြစ်ပေါ်ခဲ့တဲ့ လေပွေလှိုင်းနဲ့ ကပ္ပလီပင်လယ်ပြင်နဲ့ ဘင်္ဂလားပင်လယ်အော် အရှေ့တောင်ပိုင်းမှာဖြစ်ပေါ်နေတဲ့ လေထုမငြိမ်သက်မှုတွေကြောင့် နိုဝင်ဘာ ၇ ရက်နေ့ကစပြီး နိုင်ငံတဝန်း မိုးရွာသွန်းနေတာဖြစ်ပါတယ်။

မိုးလေဝသပညာရှင်တယောက်ဖြစ်သူ ဦးဝင်းနိုင်ကလည်း နိုဝင်ဘာ ၈ ရက် မနက် ၁ နာရီကနေ ၉ ရက်နေ့ မနက် ၁ နာရီအထိ ၂၄ နာရီအတွင်း ဧရာဝတီတိုင်းနဲ့ ရန်ကုန်တိုင်းတို့မှာ မိုးများနိုင်ပြီး အထူးသဖြင့် ငပုတော၊ ကျုံမငေး၊ ဝါးခယ်မ၊ ဘိုကလေး၊ လပွတ္တာခရိုင်တို့မှာ ၂၄ နာရီအတွင်းရွာနိုင်မဲ့ မိုးရေချိန်ဟာ ၂၄၃ ဒသမ ၄ မီလီမီတာ (၉ ဒသမ ၅၈ လက်မ)အထိရှိနိုင်တယ်လို့ ဆိုပါတယ်။

နိုဝင်ဘာ ၉ ရက်နေ့ မွန်းလွဲ ၂ နာရီကနေ ၁၀ ရက်နေ့ မွန်းလွဲ ၂ နာရီအထိ ၂၄ နာရီအတွင်း ဧရာဝတီမြစ်ဝကျွန်းပေါ် ကမ်းရိုးတန်းဒေသတွေအပါအဝင် တနိုင်ငံလုံးအတိုင်းအတာနဲ့ မိုးရွာတာ မရှိသလောက်ဖြစ်ပြီး နိုဝင်ဘာ ၁၀ ရက်နေ့ကစလို့ နေပြန်ပွင့်ပြီး ရာသီဥတု ပြန်လည်သာယာနိုင်မယ်လို့ သူက ခန့်မှန်းထားပါတယ်။