မြန်မာနိုင်ငံကထွက်တဲ့ ပဲတွေရဲ့ အဓိက ပို့ကုန်ဈေးကွက်ဖြစ်တဲ့ အိန္ဒိယနိုင်ငံဟာ မြန်မာနိုင်ငံကနေ မတ်ပဲနဲ့ ပဲစင်းငုံကို နှစ်ဆတိုးပြီး ဝယ်ယူသွားဖို့ ရှိနေတယ်လို့ စစ်ကောင်စီရဲ့ စီးပွားကူးသန်းဝန်ကြီးဌာနက သိရပါတယ်။

အခုလက်ရှိမှာ အိန္ဒိယနိုင်ငံဟာ နှစ်နိုင်ငံချုပ်ဆိုထားတဲ့ နားလည်မှုစာချွန်လွှာ (MOU) အရ နှစ်စဉ် မတ်ပဲတန်ချိန် ၂ ဒသမ ၅ သိန်းနဲ့ ပဲစင်းငုံတန်ချိန် ၁ သိန်း မြန်မာနိုင်ငံကနေ တင်သွင်းနေတာပါ။

အဲဒီ နားလည်မှုစာချွန်လွှာဟာ ၂၀၂၅-၂၆ ဘဏ္ဍာနှစ်မှာ သက်တမ်းကုန်ဆုံးမှာဖြစ်ပြီး အသစ်ချုပ်မယ့် နားလည်မှုစာချွန်လွှာအသစ်မှာ တနှစ်ကို မတ်ပဲတန်ချိန် ၅ သိန်း၊ ပဲတီစိမ်းတန်ချိန် ၂ သိန်း တိုးမြှင့်ဝယ်ယူဖို့ ထည့်သွင်းချုပ်ဆိုသွားမယ်လို့ သိရပါတယ်။

ဒါ့အပြင် အသစ်ချုပ်ဆိုမယ့် နားလည်မှုစာချွန်လွှာမှာ ပဲတီစိမ်းတန်ချိန် ၂ သိန်းနဲ့ ပြောင်းတန်ချိန် ၅ သိန်း မြန်မာနိုင်ငံကနေ အိန္ဒိယနိုင်ငံကို တင်သွင်းဖို့လည်း ထည့်သွင်းချုပ်ဆိုပေးဖို့ မြန်မာဘက်က အဆိုပြုခဲ့တယ်လို့ သိရပါတယ်။

မြန်မာနဲ့ အိန္ဒိယနိုင်ငံတို့အကြား မတ်ပဲနဲ့ ပဲစင်းငုံ ကုန်သွယ်မှု ပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာအရ ဒုတိယအကြိမ် မြန်မာ-အိန္ဒိယ ပူးတွဲကြီးကြပ်ရေးကော်မတီ အစည်းအဝေးမှာ အဆိုပြုခဲ့တာ ဖြစ်ပါတယ်။

မြန်မာနိုင်ငံက ထွက်ရှိတဲ့ ပဲတွေအတွက် အဓိကဈေးကွက်ဖြစ်တဲ့ အိန္ဒိယနိုင်ငံက အခုလို တိုးမြှင့်ဝယ်လာမယ့် အလားအလာဟာ ပဲစိုက်တောင်သူတွေအတွက် ကောင်းမွန်တဲ့ အခြေအနေတရပ် ဖြစ်တယ်လို့ ဈေးကွက်စောင့်ကြည့်လေ့လာသူတယောက်က ပြောပါတယ်။

ဒါ့အပြင် အသစ်ချုပ်မယ့် နားလည်မှုစာချွန်လွှာမှာ ပြောင်းတန်ချိန် ၅ သိန်း ဝယ်ယူပေးဖို့ အဆိုပြုချက်ကလည်း ထိုင်းဈေးကွက်ကို မှီခိုနေရတဲ့ မြန်မာ့ပြောင်းအတွက် ဈေးကွက်ချဲ့ထွင်နိုင်မယ့် အလားအလာကောင်းဖြစ်တယ်လို့ သူကဆိုပါတယ်။

လက်ရှိမှာလည်း အိန္ဒိယနိုင်ငံက မြန်မာနိုင်ငံက ပြောင်းကို အကောက်ခွန်ကင်းလွတ်ခွင့် အစီအစဉ်နဲ့ စတင်တင်သွင်းနေပြီဖြစ်ပြီး အခုနှစ်မှာ တန်ချိန် ၅ သိန်း တင်ပို့ထားပြီး ဖြစ်တယ်လို့ သိရပါတယ်။

နှစ်စဉ် ပြောင်းတန်ချိန် ၂ သန်းခွဲကျော်ထွက်တဲ့ မြန်မာနိုင်ငံဟာ ထိုင်းနိုင်ငံကို နှစ်စဉ် ပြောင်းတန်ချိန် ၁ သန်းကျော် တင်ပို့နေပါတယ်။ ဒါဟာ မြန်မာနိုင်ငံက ထွက်ရှိတဲ့ ပြောင်းထုတ်လုပ်မှုရဲ့ ၇၀ ရာခိုင်နှုန်းကို ထိုင်းနိုင်ငံကို တင်ပို့နေဝာာပါ။

ထိုင်းနိုင်ငံကလည်း နှစ်စဉ် ဖေဖော်ဝါရီ ၁ ရက်နေ ဩဂုတ်လကုန်အထိ မြန်မာနိုင်ငံက ပြောင်းတွေကို အခွန်လွတ်တင်သွင်းခွင့် ပြုနေပါတယ်။

ဒါပေမဲ့ အခုလက်ရှိမှာ တိုက်ပွဲတွေကြောင့် အာရှလမ်းမကြီး ပိတ်နေပြီး မြန်မာနိုင်ငံက ပြောင်းကို မြဝတီနယ်စပ်ကတဆင့် တင်ပို့ဖို့ ခက်ခဲနေပြီး ကော့သောင်း-ရနောင်း လမ်းကြောင်းနေတဆင့် ပြောင်းလဲတင်ပို့နေရတာ ဖြစ်ပါတယ်။