ချင်းပြည်နယ်၊ ထန်တလန်မြို့ရဲ့ ရာခိုင်နှုန်း ၉၀ ကျော်ကိုထိန်းချုပ်ထားနိုင်ပြီလို့ ချင်းအမျိုးသားတပ်ဦး/ချင်းအမျိုးသားတပ်မတော် (CNF/CNA) ရဲ့ ပြောခွင့်ရပုဂ္ဂိုလ် ဆလိုင်းထက်နီက DVB ကို ပြောပါတယ်။
ထန်တလန်မြို့က စစ်ကောင်စီ တပ်သားတွေ တပ်စွဲနေထိုင်နေတဲ့နေရာတွေကို ချင်းပြည်အစိုးရပူးပေါင်းတပ်ဖွဲ့တွေက ဆက်လက်ထိုးစစ်ဆင်တိုက်ခိုက်ခဲ့ရာ ဒီနေ့မှာလည်း စစ်ကောင်စီတပ်သားတွေတပ်စွဲထားတဲ့ CB Bank ကို တိုက်ခိုက်သိမ်းပိုက်နိုင်ခဲ့တာကြောင့် ထန်တလန်မြို့ရဲ့ ၉၀ ရာခိုင်နှုန်းကျော်ကို ထိန်းချုပ်ထားနိုင်ပြီလို့ ဆလိုင်းထက်နီက ပြောပါတယ်။
“ထန်တလန်မြို့ မိန်းလမ်းမပေါ်မှာ ခြေကုတ်ယူထားတဲ့ CB Bank က စခန်းကို ကျနော်တို့ ဝင်စီးလိုက်နိုင်တယ်။ အလောင်း ၃ လောင်း ရထားတယ်။ လက်နက်အနည်းငယ်ရထားတယ်။ အခုက နယ်မြေရှင်းလင်းရေး လုပ်ဆောင်နေတယ်။ အသေးစိတ်ကတော့ သတင်းဝင်မလားသေးဘူးခင်ဗျ။”
ထန်တလန် မြို့ပြင်မှာရှိတဲ့ NLD ရုံးနဲ့ ရဲစခန်းအဟောင်းတို့မှာ လက်ရှိ တပ်စွဲထားတဲ့ စစ်ကောင်စီ စခန်း ၂ ခုသာ ကျန်တော့တာကြောင့် တမြို့လုံးကို ချင်းပြည်အစိုးရတပ်ဖွဲ့တွေ ထိန်းချုပ်ထားနိုင်တဲ့ အခြေအနေရှိပြီလို့ ဆိုပါတယ်။
ဆလိုင်းထက်နီက “ထန်တလန်မြို့ထဲနဲ့ အဓိက မိန်းလမ်းမကြီးတွေကို ကျနော်တို့ ထိန်းထားနိုင်ပါပြီ။ ၉၀ ရာခိုင်နှုန်းကျော်လောက်ထိန်းထားနိုင်ပြီလို့ ပြောလို့ရပါတယ်” လို့ ပြောပါတယ်။
ဇူလိုင် ၂၂ ရက်နေ့ကတည်းက Tilim Operation-4 အမည်နဲ့ စတင်တိုက်ခိုက်ခဲ့တဲ့ ထန်တလန်မြို့သိမ်း တိုက်ပွဲအတွင်း Auto တောင်စခန်း ၃ ခု၊ ထန်တလန် - ဟားခါးလမ်းပိုင်းရှိ စစ်တပ်စခန်းတွေနဲ့ ထန်တလန်မြို့တွင်းရှိ အခိုင်အမာတပ်စွဲထားတဲ့ လိုင်ဗီလာ (Lai Villa) တည်းခိုခန်း စခန်းတို့ကို သိမ်းပိုက်ရရှိထားပါတယ်။
