အာဆင်နယ်အသင်းခေါင်းဆောင် အိုဒီဂတ်ဟာ ခြေချင်းဝတ်ဒဏ်ရာကြောင့် အနည်းဆုံး ၃ ပတ် ကြာ အနားယူရမယ်လို့ သိရပါတယ်။
အိုဒီဂတ်ဟာ သြစတြီးယားကို ၂ ဂိုး ၁ ဂိုးနဲ့ အနိုင်ရတဲ့ နေးရှင်းလိဂ်ပွဲစဉ်မှာ ခြေချင်းဝတ်ဒဏ်ရာရရှိခဲ့တာဖြစ်ပြီး ကွင်းထဲကနေ မျက်ရည်တွေနဲ့ ထွက်ခွာခဲ့ရတာပါ။
အာဆင်နယ်အသင်းဘက်က အိုဒီဂတ်ရဲ့ ဒဏ်ရာအခြေအနေကို စစ်ဆေးနေဆဲဖြစ်ပေမဲ့ နော်ဝေအသင်း ဆရာဝန်ကတော့ အနည်းဆုံး သုံးပတ်လောက် အနားယူရလိမ့်မယ်လို့ မှတ်ချက်ပေးခဲ့တာပါ။
အိုဒီဂတ်ရဲ့ ခြေချင်းဝတ်ဒဏ်ရာက အရိုးကို မထိပေမဲ့ ရောင်ရမ်းနေဆဲဖြစ်ပြီး အနည်းဆုံး ၃ ပတ်လောက် အနားယူရနိုင်တဲ့ အခြေအနေဖြစ်ကြောင်း၊ အဲဒီကာလထက်လည်း ပိုမိုအနားယူရနိုင်ကြောင်း နော်ဝေအသင်းဆရာဝန် အိုလာဆန်က ပြောသွားပါတယ်။
အာဆင်နယ်အသင်းဟာ လာမယ့် တနင်္ဂနွေနေ့ မှာ စပါးအသင်းနဲ့ မြောက်လန်ဒန်ဒါဘီပွဲ နွှဲရမှာဖြစ်ပြီး ဒက်ကလန်ရိုက်စ်နဲ့ အိုဒီဂတ်နဲ့ လွဲချော်မှာက အားနည်းချက် ဖြစ်သွားနိုင်ပါတယ်။
