ထိုင်ဝမ်ကျွန်းရှိ ဧရိယာအကြီးဆုံး ကောင်တီဖြစ်တဲ့ ဟွာလျန်ကောင်တီ ရေပြင်မှာ ပေကျင်းစံတော်ချိန် မနက် ၇ နာရီ ၃၅ မိနစ်က ပြင်းအား ၆ ဒသမ ၁ ရစ်ချ်တာစကေးရှိ ငလျင်တခု လှုပ်ခတ်ခဲ့ကြောင်း တရုတ် ငလျင်ကွန်ရက်စင်တာ (CENC) အရ သိရပါတယ်။
ငလျင်ဗဟိုချက်ကို မြောက်လတ္တီကျု ၂၃ ဒသမ ၇၄ ဒီဂရီနဲ့ အရှေ့လောင်ဂျီကျု ၁၂၁ ဒသမ ၉၅ ဒီဂရီမှာ စောင့်ကြည့်ခဲ့ပြီး ငလျင်ဟာ အနက် ၁၆ ကီလိုမီတာမှာ လှုပ်ခတ်ခဲ့ကြောင်း CENC က ထုတ်ပြန်တဲ့ အစီရင်ခံစာမှာ ဖော်ပြထားပါတယ်။
ထိုင်ပေရှိ ဒေသခံတွေ စက္ကန့်အတော်ကြာကြာ လှုပ်ခတ်သွားခဲ့တာကို သိသိသာသာ ခံစားခဲ့ရကြောင်း သိရပါတယ်။ အသေအပျောက်သတင်းကိုတော့ အခုချိန်ထိ မကြားသိရသေးပါဘူး။
ထိုင်ဝမ်မိုးလေဝသဌာနကတော့ သောကြာနေ့က ပြင်းအား ၆ ဒသမ ၃ အဆင့်ရှိ ငလျင်တခု ဟွာလျန်ခရိုင်ရုံးရဲ့ အရှေ့တောင်ဘက် ၃၄ ဒသမ ၂ ကီလိုမီတာ အကွာမှာ လှုပ်ခတ်သွားခဲ့ကြောင်း ပြောကြားခဲ့ပြီး ပျက်စီးဆုံးရှုံးမှုကို ချက်ချင်းသတင်းထုတ်ပြန်ခြင်း မရှိပါဘူး။
ဖူးကျိုး၊ ကျန်းကျိုး၊ ချန်ကျိုးနဲ့ ရှာ့မန်တို့ အပါအဝင် တရုတ်နိုင်ငံအရှေ့ပိုင်း ဖူကျန်းပြည်နယ်ရှိ မြို့အများအပြားမှာလည်း ငလျင်လှုပ်ခတ်မှုကို ခံစားခဲ့ရပါတယ်။
မိုးလေဝသ တာဝန်ရှိသူတွေကတော့ လာမယ့်ရက်အနည်းငယ်အတွင်း ပြင်းအား ၅ ဒသမ ၅ အဆင့်ရှိ နောက်ဆက်တွဲငလျင်တွေ လှုပ်ခတ်နိုင်ကြောင်း မိုးလေဝသတာဝန်ရှိသူတွေက သတိပေးထားပါတယ်။
ဒီနေ့မနက်ပိုင်း ငလျင်ကြီး လှုပ်ပြီးကတည်းက ဟွာလျန်အနီးမှာ ငလျင်တဒါဇင်လောက် လှုပ်ခတ်ခဲ့ကြောင်း မှတ်တမ်းတင်ထားပါတယ်။
Source-Reuters
