မန္တလေးတိုင်း၊ သပိတ်ကျင်းမြို့နယ်က အာဏာသိမ်းစစ်ကောင်စီရဲ့ တပ်ရင်းနဲ့ တပ်စခန်း ၉ ခုအထိ သိမ်းပိုက်ရရှိထားပြီး ဖြစ်တယ်လို့ ပြည်သူ့ကာကွယ်ရေးတပ်မတော်-မန္တလေး (MDY-PDF) က ဒီကနေ့ သြဂုတ် ၁၂ ရက်မှာ ထုတ်ပြန်ပါတယ်။
MDY-PDF ရဲ့ စစ်ဆင်ရေးတာဝန်ခံတဦးက “ဒီမြို့နယ်မှာ အရင်ရက်ပိုင်းက စစ်တပ်စခန်းတွေ ၈ ခု သိမ်းပိုက်ထားနိုင်ခဲ့ပြီး နောက်ထပ် သိမ်းပိုက်နိုင်တဲ့ စစ်တပ်စခန်းဟာ ဇရပ်ကွင်းနယ်မြေရဲစခန်း ဖြစ်ပါတယ်” လို့ DVB ကို အတည်ပြု ပြောပါတယ်။
အဆိုပါ ဇရပ်ကွင်းနယ်မြေရဲစခန်းကို မနေ့ ဩဂုတ် ၁၁ ရက်မှာ တိုက်ခိုက်သိမ်းပိုက်ရရှိခဲ့ပြီး လက်နက်ခဲယမ်းတွေလည်း သိမ်းဆည်းရရှိခဲ့တယ်လို့ ဆိုပါတယ်။
MDY-PDF တာဝန်ခံတဦးက “သပိတ်ကျင်းမြို့နယ်ကို စစ်ကောင်စီကင်းစင်နယ်မြေ ဖြစ်အောင် သတ်မှတ်ထားတဲ့ စစ်ရေးပစ်မှတ်တွေကို ဆက်လက်ထိုးစစ်ဆင် တိုက်ခိုက်နေပါတယ်။ သေနတ်ကိုင်ပြီး တိုက်ရတဲ့တိုက်ပွဲ ဖြစ်တဲ့အတွက် ကျနော်တို့ဘက်ကလည်း အထိုက်အလျောက် ပေးဆပ်ရမှုတွေ ရှိခဲ့ပါတယ်” လို့ ပြောပါတယ်။
ပြည်သူ့ကာကွယ်ရေးတပ်မတော်-မန္တလေး (MDY-PDF) နဲ့ တော်လှန်ရေး တပ်ပေါင်းစုတွေဟာ သပိတ်ကျင်းမြိုနယ်ထဲက စစ်ကောင်စီတပ်စခန်းတွေဖြစ်ကြတဲ့ ကွင်း ၃၀ ကျေးရွာတပ်စခန်း၊ လက်ပံပြန့်ကျေးရွာတပ်စခန်း၊ ဖိုကုန်းတပ်စခန်း၊ ဝက်သေကျေးရွာတပ်စခန်း၊ ဖက်ရှည်ကျေးရွာတပ်စခန်း၊ ခလရ ၁၄၈ တပ်စခန်း၊ ကျောက်ဖြူကျေးရွာတပ်စခန်း၊ လိပ်ကျကျေးရွာတပ်စခန်းနဲ့ ဇရပ်ကွင်းနယ်မြေရဲစခန်းတွေကို အပြီးသတ် တိုက်ခိုက်သိမ်းပိုက်ရရှိထားပြီး ဖြစ်တယ်လို့ သိရပါတယ်။
