ဧရာဝတီတိုင်း၊ ဖျာပုံမြို့နယ်မှာ စစ်ကောင်စီတပ်က VPN အသုံးပြုလို့ ဖမ်းဆီးခဲ့တဲ့ ဒေသခံ ၃ ယောက်ကို တယောက်ငွေ ၅ သိန်းအထိ တောင်းယူပြီး ပြန်လွှတ်ပေးခဲ့တယ်လို့ ဒေသခံတွေဆီက သိရပါတယ်။ 

စစ်ကောင်စီတပ်နဲ့ စစ်ကောင်စီလက်အောက်ခံ ရဲတွေက ပြီးခဲ့တဲ့ ဇူလိုင် ၂၄ ရက်နဲ့ ၂၅ ရက်က ဒေသခံတွေရဲ့ လက်ကိုင်ဖုန်းတွေကို စစ်ဆေးကာ ဖုန်းထဲမှာ VPN တွေ့ရှိတာကြောင့် အရပ်သားဒေသခံ ၃ ယောက်ကို ဖမ်းဆီးခဲ့ပြီးနောက် သြဂုတ် ၁၀ ရက်မှာ လူတယောက်ကို ကျပ် ၅ သိန်း တောင်းပြီး ပြန်လွှတ်ပေးခဲ့တာလို့ ဆိုပါတယ်။ 

အဖမ်းခံရသူတွေနဲ့ နီးစပ်တဲ့ ဒေသခံတယောက်က “အုပ်ချုပ်ရေးမှူးက တပ်ကို ငွေပေးရင် အဆင်ပြေတယ်ပေါ့ ပေးဖို့ ပြောတာ။ ငွေညှစ်ဖို့တခုပဲ သိတယ် စစ်ကောင်စီတပ်နဲ့ ရဲတွေက။ ပုံစံအမျိုးမျိုးနဲ့ စစ်ကောင်စီတပ်က ငွေညှစ်နေတာ။ အခုက တယောက်ကို ၅ သိန်းစီ တောင်းတာ။ ထောင်ချလို့ရတဲ့ ပြစ်မှုလို့ပြောပြီး ငွေတောင်းတာ။ VPN မသုံးဖို့ VPN က တရားမဝင်ဘူးပြောပြီး ငွေယူပြီး ပြန်လွှတ်ပေးတာ” လို့ ပြောပါတယ်။ 

ဖမ်းဆီးထားသူတွေကို စစ်ကောင်စီတပ်နဲ့ လက်အောက်ခံရဲတွေက ဖျာပုံမြို့နယ်ရဲစခန်းမှာ ချုပ်နှောင်ထားပြီး ပြန်လွှတ်ပေးဖို့အတွက် ရပ်/ကျေး အုပ်ချုပ်ရေးမှူးတွေကတဆင့် စစ်ကောင်စီတပ်ကို ငွေပေးဖို့ ပြောဆိုတောင်းယူတာလို့ ဆိုပါတယ်။ 

စစ်ကောင်စီတပ်နဲ့ နီးစပ်သူတယောက်က “စစ်ကောင်စီတပ်က ထောင်ကျလိမ့်မယ်လို့ ခြိမ်းခြောက်တော့ ဖမ်းခံရသူတွေက ထောင်ကျမခံနိုင်တော့ ကြောက်ပြီး တောင်းတဲ့ငွေအတိုင်း ပေးတာပေ့ါ။ ငွေပေးရတဲ့သူတွေထဲ မပြေလည်တဲ့သူတွေပါတယ်လေ။ ငွေပေးရတဲ့အကြောင်း အပြင်မှာ ထုတ်မပြောဖို့ စစ်ကောင်စီတပ်က တခါတည်း မှာလွှတ်လိုက်တာ” လို့ ပြောပါတယ်။ 

ဖျာပုံမြို့နယ်မှာ စစ်ကောင်စီတပ်နဲ့ ရဲတွေက ဇူလိုင် ၁ ရက်ကနေ ၃၁ ရက်အထိ ဒေသခံ အရပ်သားတွေရဲ့ လက်ကိုင်ဖုန်းတွေကို အတင်းလုယူစစ်ဆေးပြီး VPN တွေ့လို့ ဖမ်းဆီးကာ ငွေညှစ်ခံရသူ ၉ ယောက်ထက်မနည်း ရှိတယ်လို့ စစ်ကောင်စီတပ်နဲ့ နီးစပ်သူတွေဆီက သိရပါတယ်။