အီသီယိုပီးယားလေကြောင်းလိုင်းဟာ အာဖရိကအကြီးဆုံး လေဆိပ်တည်ဆောက်ဖို့ သဘောတူစာချုပ် ချုပ် ဆိုခဲ့ပါတယ်။
ပြေးလမ်း ၄ ခုပါဝင်တဲ့ လေဆိပ်အသစ်ကြီးကို ၂၀၂၉ ခုနှစ်မှာ အပြီးတည်ဆောက်ဖို့ သဘောတူ စာချုပ် ချုပ်ဆိုခဲ့တယ်လို့ လေကြောင်းလိုင်းက ထုတ်ပြန်ခဲ့တာဖြစ်ပါတယ်။
အီသီယိုပီးယားမြို့တော်နဲ့ ၂၈ မိုင်အကွာ ဘီရှောတူမြို့အနီးမှာ တည်ဆောက်မှာဖြစ်ပါတယ်။
ဒီလေဆိပ်ဟာ ၁ နှစ်ကို ခရီးသည်ပေါင်း သန်း ၁၀၀ ခရီးသွားနိုင်ဖို့ စွမ်းဆောင်ပေးနိုင်မှာဖြစ်ပြီး လေယာဉ်အစင်း ၂၇၀ ရပ်နားနိုင်မယ်လို့ သတင်းစာ ရှင်းလင်းပွဲမှာ ပြောဆိုခဲ့တာပါ။
လေဆိပ်အသစ်ကြီးကို ဒူဘိုင်းအခြေစိုက် အင်ဂျင်နီယာတွေက တည်ဆောက်မှာဖြစ်ပြီး ဆီဒီရာရဲ့ ဒီဇိုင်းနဲ့ ဖန်တီးမှာဖြစ်ပါတယ်။
အာဖရိကတိုက်ရဲ့ အကြီးဆုံးလေယာဉ်ကွင်း ဆောက်မယ်လို့ ၂၀၁၈ ခုနှစ်မှာ ပထမဆုံး ကြေညာခဲ့ပြီးနောက် ၅ နှစ်စီမံကိန်းနဲ့ လေဆိပ်သစ်ကြီး တည်ဆောက်မယ်လို့ အတည်ပြုခဲ့တာ ဖြစ်ပါတယ်။
လေဆိပ်သစ် တည်ဆောက်ဖို့ ဒေါ်လာ ၆ ဘီလီယံ အနည်းဆုံး ကုန်ကျမှာဖြစ်ပြီး ချေးငွေတွေ၊ ကုမ္ပဏီတွေရဲ့ အရင်းအနှီးထည့်ဝင်မှုတွေနဲ့ တည်ဆောက်မှာဖြစ်ပါတယ်။
အီသီယိုပီးယားလေကြောင်းလိုင်းဟာ ၂၀၂၃-၂၄ ဘဏ္ဍာနှစ်မှာ ခရီးသည် ၁၇ သန်းကျော် ဝန်ဆောင်မှု ပေးနိုင်ခဲ့ပြီး လာမယ့် ဘဏ္ဍာနှစ်မှာ သန်း ၂၀ အထိ တိုးမြှင့်နိုင်မယ်လို့ မျှော်လင့် ထားပါတယ်။
