ယူရို ၂၀၂၄ နောက်ဆုံး ဗိုလ်လုပွဲအဖြစ် တနင်္ဂနွေနေ့ညက စပိန်နဲ့ အင်္ဂလန်အသင်းတို့ ယှဉ်ပြိုင်ကစားကြတာမှာ စပိန်အသင်းက ၂ ဂိုး ၁ ဂိုးနဲ့အနိုင်ရသွားပါတယ်။
စပိန်အတွက် အနိုင်ဂိုးတွေကိုတော့ ဒုတိယပိုင်းပွဲချိန် ၄၇ မိနစ်မှာ ဝီလျံစ်က ၁ ဂိုးနဲ့ ပွဲချိန် ၈၆ မိနစ်မှာ မိုက်ခဲလ်အိုယာဇဘဲလ်က ၁ ဂိုးသွင်းယူခဲ့တာဖြစ်ပြီး အင်္ဂလန်အတွက် ချေပဂိုးကိုတော့ ပွဲချိန် ၇၃ မိနစ်မှာ လူစားဝင်ကစားသမား ပေါလ်မာက သွင်းယူပေးခဲ့တာဖြစ်ပါတယ်။
စပိန်အသင်းဟာ အခုနှစ်ပြိုင်ပွဲမှာ ၄ ကြိမ်မြောက် ချန်ပီယံဆုဖလားကို ရရှိခဲ့တာဖြစ်ပြီး ယူရိုပြိုင်ပွဲရဲ့ ဆုဖလားအများဆုံးအသင်းအဖြစ် မှတ်တမ်းတင်နိုင်ခဲ့ပါတယ်။
ဒါ့အပြင် စပိန်အသင်းဟာ အခုနှစ်ပြိုင်ပွဲယှဉ်ပြိုင်ကစားခဲ့တဲ့ ပွဲစဉ် ၇ ပွဲစလုံးမှာ အနိုင်ရခဲ့ပြီး အဓိက နိုင်ငံတကာပြိုင်ပွဲတခုမှာ ၇ ပွဲဆက်တိုက်အနိုင်ရခဲ့တဲ့ ပထမဆုံး ဥရောပအသင်း အဖြစ်လည်းမှတ်တမ်းဝင်သွားခဲ့ပါတယ်။
ဒီနှစ်ပြိုင်ပွဲရဲ့ အကောင်းဆုံး ဘောလုံးသမားဆုကိုတော့ စပိန်ကွင်းလယ်ကစားသမား ရိုဒရီက ရရှိသွားသလို အကောင်းဆုံးလူငယ်ကစားသမားဆုကိုလည်း အသက် ၁၆ နှစ်အရွယ် စပိန်တောင်ပံကစားသမား လာမိန်းယာမဲလ်က ရရှိသွားပါတယ်။
အင်္ဂလန် အသင်းခေါင်းဆောင် တိုက်စစ်မှူး ဟယ်ရီကိန်းကတော့ ဒီပြိုင်ပွဲမှာ ၃ ဂိုးသွင်းယူခဲ့ပြီး တခြား ကစားသမား ၅ ဦးနဲ့အတူ ပြိုင်ပွဲ တလျှောက်သွင်းဂိုးအများဆုံးသူကိုချီးမြှင့်တဲ့ ရွှေဖိနပ်ဆု ရရှိခဲ့ပါတယ်။
အင်္ဂလန်အသင်းကတော့ ၁၉၆၆ ခုနှစ် ကမ္ဘာ့ဖလားရပြီးကတည်းက နိုင်ငံတကာပြိုင်ပွဲတွေမှာ ဆုဖလားမရတာ နှစ်ပေါင်း ၅၈ နှစ်ကြာရှိနေပြီဖြစ်ပါတယ်။
